10 ອັນດັບອຸບັດຕິເຫດທີ່ຮຸນແຮງທີ່ສຸດໃນປີ 2022

ຕາມໜັງສືພິມຄວາມສະຫງົບ ງານວ່າ: ປີ 2022 ມີອຸບັດຕິເຫດເກີດຂຶ້ນທັງໝົດ 5.852 ຄັ້ງ, ພາຫະນະເປ່ເພ 10.320 ຄັນ, ຄົນໄດ້ຮັບບາດເຈັບ 9.224 ຄົນ, ເສຍຊີວິດ 851 ຄົນ; ທຽບໃສ່ປີ 2021 ເພີ່ມຂຶ້ນ 276 ຄັ້ງ, ຄົນເສຍຊີວິດເພີ່ມຂຶ້ນ 20 ຄົນ; ເຊິ່ງປີນີ້, 10 ອັນດັບ ອຸບັດຕິເຫດທີ່ຮຸນແຮງທີ່ສຸດໃນທົ່ວປະເທດປະຈຳ ທີ່ກົມຕໍາຫລວດຈະລາຈອນ ກົມໃຫຍ່ຕໍາ ຫລວດກະຊວງ ປກສ ສະຫລຸບໄວ້ລາຍລະອຽດມີດັ່ງລຸ່ມນີ້:

ອັນດັບ 10: ອຸບັດຕິເຫດລົດຈັກຕຳລົດຍົນ

ເຫດເກີດຂຶ້ນໃນເວລາປະມານ 15:30 ໂມງ ຂອງວັນທີ 25 ມັງກອນ 2022 ຢູ່ເຂດບ້ານນາຊາຍ, ເມືອງອຸທຸມພອນ ແຂວງສະຫວັນນະເຂດ ສົ່ງຜົນເຮັດໃຫ້ມີຜູ້ເສຍຊີວິດ 2 ຄົນ, ສາເຫດໃນການເກີດອຸບັດຕິເຫດຍ້ອນຂັບຂີ່ລົດໄວ.

ອັນດັບ 9: ອຸບັດຕິເຫດລົດບັນທຸກຕໍາທ້າຍລົດເມ

ເວລາ 11:30 ໂມງ ຂອງວັນທີ 13 ພຶດສະພາ 2022, ເກີດອຸບັດຕິເຫດລົດບັນທຸກຕໍາທ້າຍລົດເມຢູ່ເສັ້ນທາງເຂດບ້ານໃໝ່ນໍ້າປະກັນ ເມືອງຫີນບູນ ແຂວງຄຳມ່ວນ ເຮັດໃຫ້ມີຜູ້ເສຍຊີວິດ 2 ຄົນ, ສາເຫດພາໃຫ້ເກີດອຸບັດຕິເຫດໃນຄັ້ງນີ້ເກີດຈາກຂັບ ຂີ່ລົດດ້ວຍຄວາມປະໝາດ.

ອັນດັບ 8: ອຸບັດຕິເຫດລົດບັນທຸກເສຍຫລັກລົງເຫວ

ໃນເວລາ 9:00 ໂມງຂອງວັນທີ 13 ກຸມພາ 2022, ເກີດອຸບັດຕິເຫດລົດບັນທຸກເສຍຫລັກລົງເຫວຢູ່ເຂດບ້ານພູສະຄາຍກຸ່ມງານ ເມືອງຄູນ, ແຂວງຊຽງຂວາງ ເຮັດໃຫ້ມີຜູ້ເສຍຊີວິດ 3 ຄົນ, ສາເຫດທີ່ເກີດອຸບັດຕິເຫດຍ້ອນຂັບຂີ່ລົດໄວ.

ອັນດັບ7: ອຸບັດຕິເຫດລົດບັນທຸກຕໍາລົດຈິບ

ເວລາ 10:00 ໂມງ ວັນທີ 12 ມີນາ 2022, ເກີດອຸບັດຕິເຫດລົດບັນທຸກ 70-6643 (ອຸບົນລາຊະທານີ) ຕໍາລົດຈິບ ກກ 1795 ຢູ່ເສັ້ນທາງ ເລກ 9 ເຂດບ້ານຫົວເມືອງ ເມືອງພະລານໄຊ ແຂວງສະຫວັນນະເຂດ ເຮັດໃຫ້ມີຜູ້ເສຍຊີວິດ 3 ຄົນ, ສາເຫດໃນການເກີດຍ້ອນຜູ້ຂັບຂີ່ບໍ່ຄຳນວນສາຍທາງ.

ອັນດັບ 6: ອຸບັດຕິເຫດລົດບັນທຸກປີ້ນເອງ

ໃນວັນທີ 12 ມິຖຸນາ 2022, ເວລາປະມານ 11:30 ໂມງ ເກີດອຸບັດຕິເຫດລົດບັນທຸກເສຍຫລັກປີ້ນເອງຢູ່ຂອບເຂດບ້ານກະຊະໃຫຍ່ ເມືອງສາລະວັນ ແຂວງສາລະວັນ ສົ່ງຜົນເຮັດໃຫ້ຜູ້ເສຍຊີວິດ 3 ຄົນສາເຫດໃນການເກີດອຸບັດຕິເຫດໃນຄັ້ງນີ້, ເກີດຈາກຂັບຂີ່ລົດໄວເກີນກໍານົດ.

ອັນດັບ 5: ອຸບັດຕິເຫດລົດບັນທຸກ 10 ລໍ້ ຕຳລົດຈັກຕໍາເຮືອນ

ເຫດດັ່ງກ່າວເກີດຂຶ້ນໃນເວລາປະມານ 16:30 ໂມງຂອງວັນທີ 14 ມິຖຸນາ 2022, ຢູ່ເສັ້ນທາງເຂດບ້ານຖິ່ນເພຍ ເມືອງຫາດຊາຍຟອງນະ ຄອນຫລວງວຽງຈັນ ສົ່ງຜົນເຮັດໃຫ້ມີຜູ້ເສຍຊີວິດ 3 ຄົນ, ເຊິ່ງສາເທດພາໃຫ້ເກີດອຸບັດຕິເຫດຍ້ອນຜູ້ຂັບຂີ່ລົດໄວເກີນຂອບເຂດ.

ອັນດັບ 4: ອຸບັດຕິເຫດລົດບັນທຸກປີ້ນເອງ

ໃນວັນທີ 12 ພະຈິກ 2022, ເວລາ 9:00 ໂມງ ເກີດອຸບັດຕິເຫດລົດບັນທຸກເສຍຫລັກປີ້ນເອງຢູ່ເສັ້ນທາງເຂດບ້ານເຜົ່າສຳພັນ ເມືອງໄຊເສດຖາ ແຂວງອັດຕະປື ສົ່ງຜົນເຮັດໃຫ້ມີຜູ້ເສຍຊີວິດ 3 ຄົນ, ເຊິ່ງສາເຫດທີ່ພາໃຫ້ເກີດອຸບັດຕິເຫດໃນຄັ້ງນີ້, ຍ້ອນຂັບລົດໄວ.

ອັນດັບ 3: ອຸບັດຕິເຫດລົດບັນທຸກຕໍາເຮືອນຕໍາຮ້ານຂາຍເຄື່ອງ.

ເກີດອຸບັດຕິເຫດ ລົດບັນທຸກ ໝາຍເລກທະບຽນ ບກ/ສຂ 2118 ຕໍາເຮືອນ ແລ້ວຕຳຮ້ານຂາຍເຄື່ອງ ໃນເວລາ 16:30 ໂມງຂອງວັນທີ 22 ພະຈິກ 2022, ຢູ່ເສັ້ນທາງເຂດເກີດບ້ານພູຜານາງ ເມືອງທ່າປາງທອງ ແຂວງສະຫວັນນະເຂດ ສົ່ງຜົນເຮັດໃຫ້ມີຜູ້ເສຍຊີວິດ 4 ຄົນ ຍິງ 1 ຄົນ ສາເຫດໃນການເກີດອຸບັດຕິເຫດຍ້ອນຂັບຂີ່ລົດໄວ.

ອັນດັບ 2: ອຸບັດຕິເຫດລົດກະບະເສຍຫລັກຕົກຂົວ

ເວລາປະມານ 12:54 ໂມງ ຂອງວັນທີ 7 ທັນວາ 2022 ເກີດອຸບັດຕິເຫດລົດກະບະ TOYOTA, ລຸ້ນ V IGO ສີປອນເງິນ, ໝາຍເລກ ທະບຽນ ກກ 9789 ຫລວງນໍ້າທາ ເສຍຫລັກຕົກຂົວນໍ້າອີງ ຢູ່ເຂດບ້ານດອນສະອາດ ເມືອງຫລາ ແຂວງອຸດົມໄຊ ສົ່ງຜົນເຮັດໃຫ້ຜູ້ຂັບ ແລະ ຜູ້ໂດຍສານທີ່ນັ່ງມານໍາຈົມນໍ້າໄປກັບລົດ ເສຍຊີວິດຄາທີ່ 4 ຄົນ, ສາເຫດພາໃຫ້ເກີດອຸບັດຕິເຫດຍ້ອນຂັບຂີ່ລົດໄວ.

ອັນດັບ 1: ອຸບັດຕິເຫດລົດບັນທຸກຕໍາລົດເມ

ໃນວັນທີ 31 ກໍລະກົດ 2022, ເວລາປະມານ 21:40 ໂມງ, ເກີດອຸບັດຕິເຫດລົດບັນທຸກ ຕໍາກັບລົດເມທີ່ບັນທຸກຜູ້ໂດຍສານມານໍາຢູ່ເສັ້ນທາງເຂດບ້ານຫລຽນໄຊ ເມືອງອາດສະພັງທອງ ແຂວງສະຫວັນນະເຂດ ຢ່າງແຮງ ເຮັດໃຫ້ຫົວລົດເມຫຍໍ້ເຂົ້າ ແລ້ວຟົ້ງຕົກລົງຂ້າງທາງ ສົ່ງຜົນ ເຮັດໃຫ້ມີຜູ້ເສຍຊີວິດ 6 ຄົນ ແລະ ບາດເຈັບເປັນຈໍານວນຫລາຍ, ສາເຫດໃນການເກີດອຸບັດຕິເຫດໃນຄັ້ງນີ້, ຍ້ອນລົດທັງ 2 ຄັນ ຂັບຂີ່ມາດ້ວຍ ຄວາມໄວ.