3 ນັດຜ່ານໄປ ! ຜູ້ເຂົ້າຊົມເຂົ້າເຊຍ ບານເຕະທີມຊາດລາວຫາຍໄປເກືອບໝົດ ທ່ານຄິດວ່າຍ້ອນຫຍັງ ?

ການແຂ່ງຂັນບານເຕະຊີງແຊັ້ມອາຊຽນ AFF MITSUBISHI Electric Cup ເປັນທີມຊາດຊຸດໃຫຍ່ (ບໍ່ໄດ້ກຳນົດອາຍຸ) ເຊິ່ງເລີ່ມເປີດສາກໃນວັນທີ 21 ທັນວາ 2022 ຜ່ານມາ ເປັນຮອບແບ່ງກຸ່ມ ໂດຍເບື້ອງຕົ້ນແມ່ນແບ່ງອອກເປັນ 2 ກຸ່ມຄື A ປະກອບມີ ໄທ, ຟິລິບປິນ, ອິນໂດເນເຊຍ, ບຮູໄນ ແລະ ກຳປູເຈຍ; ກຸ່ມ A ລາວ, ຫວຽດນາມ, ມາເລເຊຍ, ສິງກະໂປ ແລະ ມຽນມາ. ມີ 

ໃນຮອບແບ່ງກຸ່ມແມ່ນໄດ້ມີການໄດ້ມີການໝູນວຽນກັນເປັນເຈົ້າພາບ ປະເທດລະ 2 ນັດ ແລະ ທີມຊາດຂອງຕົນຈະໄດ້ໄປເຕະຢູ່ປະເທດອື່ນອີກ 2 ນັດ ໃນນີ້ທີມຊາດລາວແຂ່ງຂັນໄປແລ້ວ 3 ນັດ ເຊິ່ງ 2 ນັດລາວເຮົາເປັນເຈົ້າພາບ ລາວພົບກັບຫວຽນາມ ໃນວັນທີ 21 ທັນວາ ແລະ ລາວພົບກັບສິງກະໂປ 27 ທັນວາ, ອີກນັດໜຶ່ງແມ່ນລາວ ພົບກັບ ມາເລເຊຍ ໃນວັນທີ 24 ທັນວາ ຜ່ານມາ ແລະ ທີມຊາດລາວຈະໄປພົບກັບມຽນມາ ທີ່ປະເທດມຽນມາໃນວັນທີ 30 ທັນວາ ທີ່ຈະມາເຖິງນີ້.

ດ້ານການເຂົ້າຊົມເຊົ້າເຊຍເປັນກຳລັງໃຈໃຫ້ທີມຊາດລາວ ໂດຍສະເພາະລາວເຮົາເປັນເຈົ້າພາບ 2 ນັດຜ່ານໄປ ເຫັນໄດ້ວ່າ ນັດທຳອິດ ລາວພົບກັບຫວຽດນາມ ວັນທີ 21 ທັນວາ ຜ່ານມາ ມີຜູ້ຊົມຜູ້ເຊຍຢູ່ເດີ່ນບານ ໂຊນ A ແລະ C ຄັບຄາໜາແໜ້ນສົມຄວນ ບໍ່ຕໍ່າກວ່າ 1 ພັນຄົນ  ເນື່ອງຈາກວ່າ ຫ່າງເຫີນໄປດົນເຕີບກ່ອນຈະມາປະຈົບພົບພໍ້ກັນທີ່ເດີ່ນກິລາແຫ່ງຊາດ ຫລັກ 16 ອີກຄັ້ງໜຶ່ງ ແລະ ເປັນນັດຄາດຫວັງຂອງຄົນລາວທັງຊາດ ວ່າທີມຊາດລາວຈະສາມາດບັນລຸໄດ້ຢ່າງໜ້ອຍຈັກ 2 ຄະແນນ ຫລື ຫລາຍກວ່າ ຍ້ອນວ່າໄດ້ຄູເຝິກທີ່ດີ ມີປະສົບການສ້າງຊື່ສຽງມາແລ້ວ ແລະ ນອກຈາກແຟນບານທີ່ເດີນທາງໄປເບິ່ງຢູ່ສະໜາມກິລາແລ້ວ ຍັງມີມວນຊົນລາວເບິ່ງຜ່ານຖ່າຍທອດສົດຂອງເພຈ Happy World ທີ່ໄດ້ຮັບລິຂະສິດ ບໍ່ຕໍ່າກວ່າ 10 ພັນຄົນ ນັບວ່າເປັນການລວມໂຕກັນຂອງແຟນບານສົ່ງກຳລັງໃຈທີມຊາດລາວຢ່າງສຸດຂີດ ແຕ່ແລ້ວກໍຕ້ອງຜິດຫວັງໄປຕາມໆກັນ ເມື່ອຜົນການແຂ່ງຂັນ ທີມຊາດລາວເສຍໃຫ້ຫວຽດນາມ 6 ປະຕູ ຕໍ່ 0 ແລະ ນັດລາວພົບກັບ ມາເລເຊຍ ວັນທີ 24 ທັນວາ ແຟນບານຢູ່ລາວເຮົາໄດ້ໃຫ້ກຳລັງໃຈຜ່ານການຖ່າຍທອດສົດ ບໍ່ຕໍ່າກວ່າ 5 ພັນຄົນ ແຕ່ກໍຕ້ອງຜິດຫວັງໄປຕາມໆກັນອີກຄັ້ງ ເມື່ອຜົນການແຂ່ງຂັນ ເສຍໃຫ້ມາເລເຊຍ 5 ປະຕູຕໍ່ 0.

ຫລ້າສຸດວັນທີ 27 ທັນວາ  ຜ່ານມານີ້ ລາວເຮົາພົບກັບ ສິງກະໂປ ເຊິ່ງລາວເຮົາໄດ້ມີໂອກາດເປັນເຈົ້າພາບອີກຄັ້ງໜຶ່ງ ແຕ່ຮອບນີ້ຕ່າງຈາກຄັ້ງຜ່ານໆມາ, ແຟນບານເລີ່ມໃຈອອກ, ສິ້ນຫວັງ, ໝົດອາໄລຕາຍຢາກກັບນັກເຕະທີມຊາດລາວ, ຈາກບາງຄົນຫ້າວເປ້ງໆຢາກໄປຊົມໄປເຊຍ ນັດກັນໄປຢ່າງຈົບດີ ຮອດມື້ມາຊວນກໍຕອບແບບບໍ່ມີເຍື້ອໃຍ, ການໂຄສະນາຂາຍປີ້ຈາກສະຫະພັນບານເຕະກໍບໍ່ມີໃຜສົນໃຈ ຜົນສຸດທ້າຍຢູ່ເດີ່ນບານ ມີຜູ້ເຂົ້າຊົມບໍ່ຮອດ 1 ພັນຄົນ ແລະ ຄົນເຂົ້າຊົມເຂົ້າເຊຍຜ່ານການຖ່າຍທອດສົດກໍຫລຸດລົງໄປເປັນເຄິ່ງ ເຊິ່ງກໍເປັນໄປຕາມຄາດ ເສຍໃຫ້ທີມຊາດສິງກະໂປ 2 ປະຕູ ຕໍ່ 0.

ຄວາມຈິງແລ້ວ ບໍ່ແມ່ນຄົນລາວເຮົາບໍ່ມັກເບິ່ງບານ, ບໍ່ແມ່ນຄົນລາວເຮົາບໍ່ຢາກສະໜັບສະໜູນ ແຕ່ຜົນງານມັນຟ້ອງ ເຮັດໃຫ້ຄົນລາວບໍ່ຢາກສົນ ບໍ່ຢາກວົນກັບວົງການ ຫວັງວ່າອະນາຄົດ ທາງການລາວຈະໃຫ້ການສະໜັບສະນູນ, ສ້າງນັກກິລາບານເຕະຄຸນນະພາບຂຶ້ນມາ ຢ່າງໜ້ອຍກໍທຽບເທົ່າກັບປະເທດເພື່ອນບ້ານໃກ້ໆເຮົານີ້ກໍຍັງດີ ສ່ວນວ່າບານໂລກນັ້ນຍັງອີກໄກບໍ່ຕ້ອງເວົ້າເຖິງ.