ຈະສຸມໃສ່ບາງວຽກສຳຄັນຮີບດ່ວນ ເພື່ອເຮັດໃຫ້ການປະຕິບັດຄຳຕັດສິນຂອງສານທີ່ໃຊ້ໄດ້ເດັດຂາດ 

ເພື່ອເຮັດໃຫ້ການປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດຂອງສານປະຊາຊົນ ເຫັນວ່າຍັງຊັກຊ້າ ຍັງບໍ່ທັນບັນລຸຄາດໝາຍ 20% ຕາມມະຕິສະບັບເລກທີ 27/ສພຊ, ລົງວັນທີ 21 ພະຈິກ 2019 ຂອງຄະນະປະຈຳສະພາແຫ່ງຊາດ ຊຶ່ງເຮັດໃຫ້ຈໍານວນຄໍາຕັດສິນທີ່ໃຊ້ໄດ້ເດັດຂາດ ຄ້າງຄາເປັນຈຳນວນຫຼວງຫຼາຍ ຕໍ່ບັນຫານີ້, ກະຊວງຍຸຕິທຳໃນຖານະເປັນຜູ້ຮັບຜິດຊອບໂດຍກົງ ແມ່ນຈະໄດ້ສຸມໃສ່ປັບປຸງບາງວຽກທີ່ສຳຄັນຮີບດ່ວນ ເປັນຕົ້ນ: ການສ້າງນິຕິກຳ, ກົງຈັກການຈັດຕັ້ງ, ແບບແຜນວິທີເຮັດ ວຽກ, ການຈັດຕັ້ງປະຕິບັດຕົວຈິງ ແລະ ງົບປະມານ.

ທ່ານ ໄພວີ ສີບົວລີພາ ລັດຖະມົນຕີກະຊວງຍຸຕິທຳ ໄດ້ຂຶ້ນຊີ້ແຈງເພື່ອໃຫ້ຄວາມກະຈ່າງແຈ້ງ ຕໍ່ກັບຄໍາຊັກຖາມກ່ຽວກັບວຽກປະຕິບັດຄໍາຕັດສິນຂອງສານ ໂດຍສະເພາະກ່ຽວກັບທິດທາງ, ມາດຕະການແກ້ໄຂແນວໃດ ເພື່ອເຮັດໃຫ້ການປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ຂອງສານປະຊາຊົນ ເຫັນວ່າຍັງຊັກຊ້າຄ້າງຄາເປັນຈຳນວນຫຼວງຫຼາຍ ໃຫ້ດີຂຶ້ນວ່າ: ກະຊວງຍຸຕິທໍາ ໃນຖານະເປັນຜູ້ຮັບຜິດຊອບໂດຍກົງຕໍ່ວຽກງານດັ່ງກ່າວ ຕາມທີ່ກໍານົດໄວ້ໃນກົດໝາຍສະບັບປັບປຸງຈະຕ້ອງມີແຜນການ, ວິທີການ ເພື່ອປະຕິບັດຢ່າງເປັນລະບົບຖືກຕ້ອງ ຈຶ່ງຈະເຮັດໃຫ້ວຽກງານສຳເລັດຜົນຢ່າງມີຄຸນນະພາບ ຊຶ່ງກະຊວງຍຸຕິທຳ ໄດ້ກຳນົດທິດທາງ ເພື່ອຮັບປະກັນການປະຕິບັດຄໍາຕັດສິນຂອງສານ ໃຫ້ບັນລຸຄາດໝາຍ ຕາມມະຕິ 27/ສພຊ, ລົງວັນທີ 21 ພະຈິກ 2019 ໂດຍຈະສຸມໃສ່ປັບປຸງບາງວຽກທີ່ສຳຄັນຮີບດ່ວນ ເປັນຕົ້ນ: ການສ້າງນິຕິກຳ, ກົງຈັກການຈັດຕັ້ງ, ແບບແຜນວິທີເຮັດວຽກ, ການຈັດຕັ້ງປະຕິບັດຕົວຈິງ ແລະ ງົບປະມານ ຊຶ່ງມີວິທີການດັ່ງນີ້:
1). ດ້ານນິຕິກຳ ຈະຄົ້ນຄວ້າສ້າງ ແລະ ປັບປຸງນິຕິກຳໃຕ້ກົດໝາຍ ລວມທັງເອກະສານ ແລະ ຄູ່ມືຕ່າງໆກ່ຽວກັບການປະຕິບັດຄຳຕັດສິນຂອງສານໃຫ້ເປັນລະບົບຄົບຖ້ວນເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ ໃຫ້ມີຄວາມເປັນເອກະພາບໃນການໂຄສະນາເຜີຍແຜ່ໃຫ້ທົ່ວສັງຄົມໄດ້ຮັບຮູ້, ເຂົ້າໃຈ ແລະ ຕື່ນຕົວປະຕິບັດ.
2). ດ້ານແບບແຜນວິທີເຮັດວຽກ ກໍຈະປັບປຸງກົງຈັກການຈັດຕັ້ງຂອງອົງການປະຕິບັດຄໍາຕັດສິນຂອງສານ ໃຫ້ສອດຄ່ອງຕາມກົດໝາຍ ສະບັບປັບປຸງປີ 2021 ໂດຍຫັນຫ້ອງການ ແລະ ໜ່ວຍງານປະຕິບັດຄໍາຕັດສິນຂອງສານ ພະແນກຍຸຕິທໍາ ແລະ ຫ້ອງການຍຸຕິທຳເມືອງ ອອກມາເປັນກອງ ແລະ ຫ້ອງປະຕິບັດຄໍາຕັດສິນຂອງສານປະຈຳແຂວງ ແລະ ເມືອງ ຂຶ້ນກັບການຄຸ້ມຄອງຕາມສາຍຕັ້ງ. ພ້ອມ ນັ້ນ, ກໍສຸມໃສ່ກໍ່ສ້າງພະນັກງານທາງດ້ານຄຸນທາດການເມືອງ, ຄຸນສົມບັດສິນທໍາປະຕິບັດ, ຄວາມຮູ້, ຄວາມສາມາດ; ເດັດຂາດແກ້ໄຂພະນັກງານປະຕິບັດຄໍາຕັດສິນທີ່ຂາດຈັນຍາບັນ, ຈັນຍາທໍາ, ຂາດແບບແຜນວິທີເຮັດວຽກ, ບໍ່ມີຄວາມຫ້າວຫັນ.
3). ດ້ານແບບແຜນວິທີເຮັດວຽກ ຈະປັບປຸງແບບແຜນວິທີເຮັດວຽກຂອງອົງການປະຕິບັດຄໍາຕັດສິນຂອງສານ ໃຫ້ມີຄວາມວ່ອງໄວ, ໂປ່ງໃສ, ກວດກາໄດ້. ໃນນັ້ນ, ຈະຫັນການປະຕິບັດຄໍາຕັດສິນຂອງສານຈາກບຸກຄົນທີ່ຮັບຜິດຊອບສຳນວນຄໍາຕັດສິນຢ່າງຂາດຕົວ ມາເປັນຄວາມຮັບຜິດຊອບຂອງພະແນກ, ຂະ ແໜງ ແລະ ໜ່ວຍງານ ທີ່ຢູ່ໃນໂຄງປະກອບຂອງກົມ, ກອງ ແລະ ຫ້ອງປະຕິບັດຄໍາຕັດສິນຂອງສານ; ປັບປຸງວິທີການ, ເຂັ້ມງວດໃນການດໍາເນີນການກວດກາພາຍໃນ ໂດຍສະເພາະແມ່ນການປະຕິບັດແຜນການສູ້ຊົນເພື່ອບັນລຸໂຕເລກຄາດໝາຍທີ່ກໍານົດໄວ້ໃນແຕ່ລະໄລຍະ; ສູ້ຊົນຫັນເປັນທັນສະໄໝກ່ຽວກັບວຽກງານປະຕິບັດຄໍາຕັດສິນຂອງສານ ໂດຍສະເພາະການເກັບກຳສະຖິຕິຄຳຕັດສິນຂອງສານ, ການຄຸ້ມຄອງ, ການຮັບ-ຈ່າຍເງິນກ່ຽວກັບການປະຕິບັດຄໍາຕັດສິນຂອງສານ; ປັບປຸງກົນໄກປະສານງານໃຫ້ເປັນລະບົບກັບທຸກພາກສ່ວນທີ່ກ່ຽວຂ້ອງ ໂດຍສະເພາະບັນດາຂະແໜງການທີ່ກຳນົດໄວ້ ໃນກົດໝາຍວ່າດ້ວຍການປະຕິບັດຄໍາຕັດສິນຂອງສານ (ສະບັບປັບປຸງ) ປີ 2021.
4). ດ້ານການຈັດຕັ້ງປະຕິບັດຄໍາຕັດສິນຕົວຈິງ ຈະແຍກປະເພດຄໍາຕັດສິນໃຫ້ລະອຽດ, ຊັດເຈນ ແລະ ຊອກຫາສາເຫດຂອງການຊັກຊ້າ, ແກ່ຍາວ, ບໍ່ມີເງື່ອນໄຂປະຕິບັດ ແລະ ກຳນົດວິທີແກ້ໄຂ. ການ ຈັດຕັ້ງປະຕິບັດຕົວຈິງ 6 ເດືອນທ້າຍປີ 2022 ກະຊວງຍຸຕິທຳ ໄດ້ລົງຊຸກຍູ້ ແລະ ຊີ້ນໍາອົງການປະຕິບັດຄໍາຕັດສິນຂອງສານຢູ່ທ້ອງຖິ່ນ ກວດກາແຍກປະເພດຄໍາຕັດສິນໃຫ້ລະອຽດ ແລະ ໄດ້ເປີດກອງປະຊຸມຄົ້ນຄວ້າກຳນົດວິທີແກ້ໄຂການປະຕິບັດຄໍາຕັດສິນຊັກຊ້າ ແລະ ບໍ່ມີເງື່ອນໄຂປະຕິບັດ; ຫັນລົງສົມທົບກັບອົງການປົກຄອງບ້ານ, ໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ກ່ຽວກັບການກວດກາຊັບ, ການສົ່ງ ໝາຍຮຽກ, ໝາຍເຊີນ ລວມທັງການຈັດຕັ້ງປະຕິບັດຄໍາຕັດສິນຂອງສານ; ສົມທົບກັບເຈົ້າໜ້າທີ່ຕຳຫຼວດ, ໄອຍະການປະຊາຊົນ ໃນການນໍາໃຊ້ມາດຕະການຕໍ່ຜູ້ບໍ່ຍອມປະຕິບັດຄໍາຕັດສິນຂອງສານ; ປັບປຸງວິທີການ, ຂັ້ນຕອນ ໃນການຕີລາຄາຊັບ ເພື່ອຮັບປະກັນຄວາມເປັນທຳໃຫ້ແກ່ຄູ່ຄວາມ; ຄົ້ນຄວ້າອອກຄຳສັ່ງໂຈະການປະຕິບັດຄໍາຕັດສິນຂອງສານທີ່ບໍ່ມີເງື່ອນໄຂປະຕິບັດກ່ຽວກັບໜີ້ສິນ ແລະ ຄ່າເສຍຫາຍທາງແພ່ງ ແລ້ວແຈ້ງໃຫ້ຜູ້ຊະນະຄະດີ ຕິດຕາມຜູ້ຖືກປະຕິບັດ ຕາມທີ່ກຳນົດໄວ້ໃນມາດຕາ 43 ຂອງກົດໝາຍ ວ່າດ້ວຍການປະຕິບັດຄໍາຕັດສິນຂອງສານ (ສະບັບປັບປຸງ) ປີ 2021; ນອກນີ້, ຄະດີໃດທີ່ຜູ້ຖືກປະຕິບັດຄໍາຕັດສິນຂອງສານ ບໍ່ມີເງື່ອນໄຂຈ່າຍຄ່າອາກອນຂອງລັດ, ໂທດປັບໃໝ, ໂທດຮິບຊັບ, ຮິບວັດຖຸສິ່ງຂອງ ຈະໄດ້ອອກຄຳສັ່ງໂຈະການປະຕິບັດ, ເມື່ອໝົດກໍານົດເວລາຂອງການໂຈະແລ້ວຈະໄດ້ສະເໜີໃຫ້ອົງການໄອຍະການປະຊາຊົນຖະແຫຼງໃຫ້ສານປະຊາຊົນພິຈາລະນາຕັດສິນຍົກເລີກການປະຕິບັດ ຕາມທີ່ກຳນົດໄວ້ໃນ ມາດຕາ 74, 75, 76, 77 (ໃໝ່) ຂອງກົດໝາຍ ວ່າດ້ວຍການປະຕິບັດຄໍາຕັດສິນຂອງສານ (ສະບັບປັບປຸງ) ປີ 2021; ສຳລັບຜູ້ຖືກປະຕິບັດຄໍາຕັດສິນຂອງສານ ທີ່ມີເງື່ອນໄຂປ່ຽນໂທດປັບໃໝເປັນໂທດອື່ນ ຈະໄດ້ສະເໜີໃຫ້ພາກສ່ວນກ່ຽວຂ້ອງພິຈາລະນາຕາມທີ່ກໍານົດໄວ້ໃນມາດຕາ 46, 59 ຂອງປະມວນກົດ ໝາຍອາຍາ.
5). ດ້ານງົບປະມານ, ກໍຈະສູ້ຊົນສ້າງເງື່ອນໄຂເອື້ອອໍານວຍຄວາມສະດວກໃຫ້ອົງການປະຕິບັດຄໍາຕັດສິນຂອງສານ ໃນການປະຕິບັດາໜ້າທີ່ ເປັນຕົ້ນ ງົບປະມານ, ພາຫະນະ, ອຸປະກອນຮັບໃຊ້ ລວມທັງສະຖານທີ່ເຮັດວຽກ.