ສສຊ ເຂດ5 ແຂວງບໍ່ແກ້ວ ສະເໜີໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ກວດກາຄືນໃໝ່ຕໍ່ການແກ້ໄຂຄະດີຂອງຜູ້ມີເງື່ອນໄຂເສດຖະກິດດີ ແລະ ຜູ້ບໍ່ມີເງື່ອນໄຂ
ວັນທີ 27 ທັນວາ 2022 ນີ້, ທ່ານ ພັທ ເນັ່ງສີດາ ເບຼຍລືມົວ ສະມາຊິກສະພາແຫ່ງຊາດເຂດ 5 ແຂວງບໍ່ແກ້ວ ໄດ້ມີຄຳເຫັນສະເໜີຕໍ່ບົດລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ໃນກອງປະຊຸມສະໄໝາສາມັນເທື່ອທີ 4 ຂອງສະພາແຫ່ງຊາດຊຸດທີ IX ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ປະທານສະພາແຫ່ງຊາດ.
ທ່ານ ພັທ ເນັ່ງສີດາ ເບຼຍລືມົວ ມີຄຳເຫັນແລກປ່ຽນສະເໜີວ່າ: ຕາມການລາຍງານວຽກງານເຄື່ອນໄຫວ ແລະ ແກ້ໄຂຄະດີຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເຫັນວ່າການພິຈາລະນາຄະດີໃດໜຶ່ງບໍ່ແມ່ນບັນຫາງ່າຍດາຍ ແຕ່ເປັນຄະດີທີ່ຕ້ອງມີຄວາມລະອຽດ, ມີຂໍ້ມູນຫລັກຖານທີ່ຈະແຈ້ງ, ມີເງື່ອນໄຂເວລາ, ອົງປະກອບ ແລະ ງົບປະມານໃນການແກ້ໄຂ, ເຊິ່ງຈຸດນີ້ເຈົ້າໜ້າທີ່ແມ່ນໄດ້ເຮັດສຸດຄວາມສາມາດ ໂດຍໃນນາມສ່ວນຕົວກໍຂໍຊົມເຊີຍ. ແຕ່ເມື່ອທຽບໃສ່ຜົນສຳເລັດເຫັນວ່າ ສາມາດແກ້ໄຂຄະດີໄດ້ 6.851 ເລື່ອງ, ຍັງຄ້າງ 3.501 ເລື່ອງ ນີ້ຖືເປັນບັນຫາພົ້ນເດັ່ນ. ໃນນີ້ຂໍຍົກບັນຫາໃຫ້ເຫັນເຖິງວິທີແກ້ໄຂໃນຕໍ່ໜ້າໃຫ້ອົງການກ່ຽວຂ້ອງໄດ້ພິຈາລະນາຄື: 1). ການແກ້ໄຂຄະດີຍັງຊັກຊ້າເມື່ອທຽບຕົວເລກແມ່ນຍັງຊັກຊ້າຫລາຍ ເຊິ່ງຍັງຄ້າງ 3.000 ກວ່າເລື່ອງ ແຕ່ລະປີມີຄະດີເພີ່ມຂຶ້ນ 700 ເກົ່າເລື່ອງ;
2). ການເກັບກູ້ຊັບສິນຂອງສານຕັດສິນແມ່ນໜ້ອຍທີ່ສຸດຕາມການສະຫລຸບຂອງສານປະຊາຊົນສູງສຸດໃນການຮວບຮວມຊັບສິນຂອງສານຕັດສິນແລ້ວ ຮີບເປັນຂອງລັດຕາມຄຳສັ່ງ 07/ນຍ ເປັນເງິນກີບພຽງ 2.103.660.000 ກີບ ເຫັນວ່າຕົວເລກໜ້ອຍຫລາຍ, ເງິນບາດ 698.000 ບາດ, ເງິນໂດລາ 4.202 ໂດລາ, ເງິນດົງຫວຽດນາມ 10.000 ດົງ ແລະ ເງິນຢວນຈີນ 50 ຢວນ, ມີທີ່ດິນພ້ອມເຮືອນ 8 ຕອນ, ລົດໃຫຍ່ 12 ຄັນ, ລົດຈັກ 21 ຄັນ ແລະ ວັດຖຸມີຄ່າ 43 ລາຍການ ເຊິ່ງໃນນີ້ແມ່ນບໍ່ບັນລຸຕາມຄາດໝາຍ ກໍຂໍໃຫ້ເອົາໃຈໃສ່ກວດກາຄືນໃຫ້ສົມເຫດສົມຜົນກັບຕົວຈິງ ພ້ອມທັງຢາກໃຫ້ແຈ້ງແຈງເພີ່ມຕື່ມ
3). ຈຸດຂໍ້ຄົງຄ້າງບັນຫາທີ່ຈະຕ້ອງແກ້ໄຂ ໂດຍສະເພາະດ້ານຈັນຍາບັນ-ຈັນຍາທຳ ຂອງເຈົ້າໜ້າທີ່ສືບສວນ-ສອບສວນ, ຜູ້ພິພາກສາ-ຈ່າສານ ເພື່ອຕ້ານຫາງສຽງຂອງສັງຄົມ ແລະ ປະຊາຊົນຈຳນວນໜຶ່ງ ໃຫ້ມີຄວາມເຊື່ອໝັ້ນຕໍ່ເຈົ້າໜ້າທີ່ຕໍ່ການແກ້ໄຂຄະດີແມ່ນມີໜ້ອຍທີ່ສຸດ, ຄວາມປ່ວງໃສບໍ່ມີ ຖ້າມີກໍໜ້ອຍ, ມີແນວຄິດຜົນປະໂຫຍດເກີດຂຶ້ນຫລາຍ, ການວ່າເລື່ອງຄະດີແມ່ນຊັກຊ້າ, ບໍ່ຖືກຕ້ອງຕາມກໍານົດເວລາທີ່ກົດໝາຍກໍານົດ; ການຂໍອຸທອນ, ຂໍລົບລ້າງຄະດີ ແລະ ການແກ້ໄຂຄະດີຈໍານວນໜຶ່ງ ຍັງຫລົບໄປຫລົບມາຫລາຍຄັ້ງ. ແຕ່ທັງໝົດນັ້ນແມ່ນຍ້ອນມາຈາກບັນຫາແນວຄິດຜົນປະໂຫຍດຝ່າຍໃດຝ່າຍໜຶ່ງ, ເຊິ່ງໃນຕົວຈິງການແກ້ໄຂຄະດີຜ່ານມາໂດຍສະເພາະຜູ້ທີ່ກະທຳຜິດແທ້ ບາງຄັ້ງຄາວກໍກາຍເປັນຖືກ ສ່ວນຜູ້ຖືກແທ້ມີຈັນຍາທຳແທ້ກໍກາຍເປັນຜິດ, ອັນນີ້ກໍຂໍໃຫ້ກວດກາເບິ່ງຄືນໃໝ່ເຊິ່ງເຫັນເກີດຂຶ້ນຫລາຍ; ຜູ້ທີ່ມີເງື່ອນໄຂຖານະເສດຖະກິດດີ ການດຳເນີນຄະດີກໍງ່າຍໄປສະດວກບໍ່ຫຍຸ້ງຍາກ ແຕ່ກົງກັນຂ້າມສ່ວນຜູ້ທີ່ບໍ່ມີເງື່ອນໄຂໃນການແກ້ໄຂຄະດີແມ່ນຫຍຸ້ງຍາກຫລາຍ ທັງໝົດນີ້ເກີດຂຶ້ນຍ້ອນມີເລື່ອງຜົນປະໂຫຍດຕິດພັນຫລາຍ ແລະ ສະເໜີໃຫ້ສອງອົງການກ່ຽວຂ້ອງເອົາໃຈໃສ່ດ້ານຄວາມປ່ວງໃສ, ຈັນຍາບັນ-ຈັນຍາທຳ ຢາກໃຫ້ເບິ່ງຄືນຕື່ມ ເພື່ອຄວາມເຊື່ອຖືເຊື່ອໝັ້ນ ຈາກສັງຄົມ ແລະ ປະຊາຊົນທຸກຊັ້ນຄົນໃນທຸກຂົງເຂດ ເພື່ອເຄົາລົບກົດໝາຍໃຫ້ເຂັ້ມງວດຕື່ມ.
