ເກີດເຫດຊາຍໄວກາງຄົນເມົາຢາເສບຕິດ ອາລະວາດຈູດເຄື່ອງໃສ່ແກັດເຈ້ຍແລ້ວໂຍນໃສ່ຫລັງຄາເຮືອນຕົນເອງ

ໜັງສືພິມບໍ່ແກ້ວ ລາຍງານວ່າ: ເວລາປະມານ 7:00 ໂມງ ວັນທີ 24 ທັນວາ 2022 ໄດ້ເກີດເຫດຊາຍໄວກາງຄົນອາລະວາດ ຈູດເຄື່ອງໃສ່ແກັດເຈ້ຍແລ້ວໂຍນໃສ່ຫລັງຄາເຮືອນຂອງຕົນເອງທີ່ໃກ້ເຂດຕະຫລາດ ມີຄວັນໄຟລຸກຂຶ້ນຢ່າງແຮງ, ເຮັດໃຫ້ພໍ່ຄ້າ-ຊາວຂາຍ ແລະ ປະຊາຊົນທີ່ມາຊື້ເຄື່ອງໃນຕະຫລາດແຕກຕື່ນ ຈຶ່ງພາກັນແລ່ນມາເບິ່ງມີເຫດຫຍັງເກີດຂຶ້ນ ແລະ ຊ່ວຍກັນເອົານ້ຳມາດັບໄຟ ເພື່ອບໍ່ໃຫ້ເກີດເປັນເພີງໃຫຍ່ລາມໄປເຮືອນຄົນອື່ນ, ພ້ອມທັງໂທຫາເຈົ້າໜ້າທີ່ຕຳຫລວດດັບເພີງມາຊ່ວຍ; ແຕ່ປະຊາຊົນສາມາດລະງັບໄຟໄວ້ໄດ້ກ່ອນ.

ສ່ວນຜູ້ກໍເຫດທາງເຈົ້າໜ້າທີ່ ປກສ ກຸ່ມບ້ານໄດ້ຄວບຄຸມຕົວເປັນທີ່ຮຽບຮ້ອຍແລ້ວ. ຜ່ານການສືບສວນ-ສອບສວນ ເບື້ອງຕົ້ນຂອງເຈົ້າໜ້າທີ່ໄດ້ຮູ້ວ່າຜູ້ກໍ່ເຫດຊື່ ທ້າວ ຫລ້າ ປະຊາຊົນບ້ານໃຫຍ່ຫ້ວຍຊາຍໃຕ້ ເມືອງຫ້ວຍຊາຍ ແຂວງບໍ່ແກ້ວ, ເຊິ່ງການກໍ່ເຫດແມ່ນເກີດຈາກອາການເມົາຢາເສບຕິດ ຈຶ່ງກະທຳເຫດດັ່ງກ່າວຂຶ້ນໂດຍບໍ່ຮູ້ຕົວ ແລະ ມີຫາງສຽງປະຊາຊົນຢູ່ອ້ອມຂ້າງລ້ວນແຕ່ເວົ້າເປັນສຽງດ່ຽວກັນວ່າ: ເກືອບທຸກໆຄືນບໍ່ໄດ້ນອນຍ້ອນຜູ້ກ່ຽວມີການອາລະວາດມີສຽງເນື່ອງ. ປັດຈຸບັນທາງເຈົ້າໜ້າທີ່ໄດ້ນໍາເອົາຜູ້ກ່ຽວໄປກັກຕົວຢູ່ທີ່ ປກສ ກຸ່ມບ້ານໃຫຍ່ຫ້ວຍຊາຍໃຕ້ ເພື່ອປະຕິບັດຕາມຂັ້ນຕອນ ຂອງກົດໝາຍບ້ານເມືອງ ພ້ອມທັງສຶກສາອົບຮົມໃຫ້ຜູ້ກ່ຽວປ່ຽນແປງພຶດຕິກຳໃຫ້ດີຂຶ້ນ.