ປະທານປະເທດເນັ້ນ ພັດທະນາຊັບພະຍາກອນມະນຸດ ໃຫ້ມີຄຸນນະພາບ ຮອງຮັບການຫັນເປັນດີຈິຕອລ

• ການພັດທະນາຊັບພະຍາກອນມະນຸດໃຫ້ມີຄຸນະພາບສູງ ເພື່ອຮອງຮັບການຫັນເປັນດີຈິຕອລຂອງປະເທດເຮົາ, ເອົາໃຈໃສ່ຍົກລະດັບ ແລະ ປັບປຸງເນື້ອໃນການສຶກສາ ແລະ ການຝຶກອົບຮົມເພື່ອໃຫ້ນັກຮຽນ, ນັກສຶກສາເຂົ້າເຖິງແຫລ່ງຄວາມຮູ້ທາງດ້ານດີຈິຕອລ, ມີຫົວຄິດປະດິດສ້າງ ແລະ ມີການພັດທະນາໃຫ້ທັນກັບຄວາມກ້າວໜ້າ ຂອງເຕັກໂນໂລຊີທີ່ປ່ຽນແປງຢູ່ສະເໝີ.
• ສົ່ງເສີມການຮຽນຮູ້ທັກສະທາງດ້ານເຕັກໂນໂລຊີດີຈິຕອລຂັ້ນພື້ນຖານ ແລະ ພາສາຕ່າງປະເທດເຂົ້າໃນຫລັກສູດການສຶກສາລະດັບສາມັນທົ່ວໄປ.
• ປັບປຸງວິທີການຮຽນການສອນໃຫ້ທັນສະໄໝ ບົນພື້ນຖານການນຳໃຊ້ເຕັກໂນໂລຊີດີຈິຕອລ; ຖືເອົາຄວາມຕ້ອງການທາງດ້ານຕະຫລາດແຮງງານ ແລະ ການປະເມີນຂອງວິສາຫະກິດ ເປັນຕົວຊີ້ວັດໃນການປັບປຸງຄຸນະພາບຂອງການຮຽນການສອນຢູ່ໃນມະຫາວິທະຍາໄລ; ສົ່ງເສີມໃຫ້ນັກຮຽນນັກສຶກສາສ້າງທັກສະທາງດ້ານດີຈິຕອລແລະ ແຂ່ງຂັນຄວາມຮູ້ກ່ຽວກັບເຕັກໂນໂລຊີດີຈິຕອລ.

ນອກຈາກນີ້ແລ້ວ ການຫັນເປັນດີຈິຕອລເປັນກະແສຟອງໃນທົ່ວໂລກໃນຍຸກແຫ່ງການປະຕິວັດອຸດສາຫະກຳຄັ້ງທີ 4 ຫລື ເອີ້ນວ່າຍຸກອຸດສາຫະກຳ 4.0, ສປປ ລາວ ຂອງພວກເຮົາມີຄວາມຈຳເປັນຕ້ອງຫັນເປັນດີຈິຕອລເພື່ອພັດທະນາປະເທດໃຫ້ທັນກັບກະແສຟອງຂອງຍຸກສະໄໝປັດຈຸບັນ. ຖ້າພວກເຮົາບໍ່ຫັນປ່ຽນ, ຖ້າພວກເຮົາຊັກຊ້າຈະເຮັດໃຫ້ການພັດທະນາປະເທດເຮົາຫລ້າຊ້າ ແລະ ທົດຖອຍລົງ, ຈະເຮັດໃຫ້ພວກເສຍກາລະໂອກາດ ແລະ ກາຍເປັນປະເທດທີ່ຫລ້າຫລັງ. ສະນັ້ນ ພວກເຮົາຈະຕ້ອງພ້ອມກັນຕັດສິນໃຈ ດຳເນີນພາ ລະກຳປະຫວັດສາດທີ່ສຳຄັນດັ່ງກ່າວ ເພື່ອພັດທະນາປະເທດຊາດ ໃຫ້ຈະເລີນຮຸ່ງເຮືອງຕາມແນວທາງຂອງພັກເຮົາວາງໄວ້. ຢາກເຮັດໄດ້ຄືແນວນັ້ນ, ກ່ອນອື່ນໝົດຄະນະພັກ ແລະ ອົງການປົກຄອງທຸກຂັ້ນຕ້ອງນຳພາ-ຊີ້ນຳການຫັນເປັນດີຈິຕອລໃນຂົງເຂດຂອງຕົນ ໃຫ້ປະສົບຜົນສຳເລັດເປັນຢ່າງດີ; ສະພາແຫ່ງຊາດ ເປັນເຈົ້າການສ້າງ ແລະ ປັບປຸງບັນດານິຕິກຳຕິດພັນກັບການພັດທະນາເສດຖະກິດດີຈິຕອລພ້ອມທັງຕິດຕາມ, ກວດກາ ການຈັດຕັ້ງປະຕິບັດໃຫ້ຖືກຕ້ອງຕາມລັດຖະທຳມະນູນ ແລະ ກົດໝາຍຂອງ ສປປ ລາວ, ລັດຖະບານເປັນເຈົ້າການໃນການຄົ້ນຄວ້າ ຜັນຂະຫຍາຍແຜນຍຸດທະສາດການພັດທະນາເສດຖະກິດດີຈິຕອລໃຫ້ເປັນນິຕິກຳ, ເປັນແຜນພັດທະນາ, ໂຄງການ ແລະ ຈັດຕັ້ງປະຕິບັດຕາມຄວາມເໝາະສົມ ແນໃສ່ຊຸກຍູ້ສົ່ງເສີມການຂະຫຍາຍຕົວເສດຖະກິດ ດີຈິຕອລຂອງປະເທດເຮົາໃຫ້ມີຄວາມວ່ອງໄວທັນກັບສະພາບການໃໝ່.