ຜູ້ໃຊ້ “ທະວິດເຕີ” ໂຫວດ “ອີລອນ ມັສ” ລົງຈາກຕຳແໜ່ງຜູ້ບໍລິຫານ

ວັນທີ 20 ທັນວາ, ສຳນັກຂ່າວຊິນຮົວລາຍງານວ່າ: ການສຳຫລວດຄວາມຄິດເຫັນຈາກກຸ່ມຜູ້ໃຊ້ “ທະວິດເຕີ” ປະມານ 12 ຊົ່ວໂມງ ໃນທ້າຍອາທິດຜ່ານມາ ພົບສຽງສ່ວນຫລາຍ ຫລື 57,5% ຂອງການໂຫວດ 17,5 ລ້ານສຽງ ເບິ່ງວ່າ “ອີລອນ ມັສ” ຄວນລົງຈາກຕຳແໜ່ງຜູ້ບໍລິຫານຂອງທະວິດເຕີ, ຂະນະທີ່ 42,5% ເບິ່ງວ່າລາວຄວນດຳລົງຕຳແໜ່ງຕໍ່ໄປ.

ສື່ທ້ອງຖິ່ນອາເມລິກາລາຍງານຜົນສຳຫລວດດັ່ງກ່າວປາກົດຂຶ້ນຫລັງຈາກມີການຖົກຖຽງໃນທະວິດເຕີ ແພກຟອມສັງຄົມອອນລາຍທີ່ເກີດຄວາມວຸ້ນວາຍນັບແຕ່ ມັສ ເຂົ້າຊື້ກິດຈະການໃນເດືອນຕຸລາ ແລະ ສັ່ງເລີກຈ້າງພະນັກງານຈຳນວນຫລາຍໃນເວລາຕໍ່ມາ.

ກ່ອນໜ້ານີ້ວັນທີ 18 ທັນວາ, ທະວິດເຕີປະກາດແຜນຫ້າມຜູ້ໃຊ້ຊັກຊວນຜູ້ຕິດຕາມໃນທະວິດເຕີໄປຕິດຕາມພວກເຂົາໃນອິນສະຕາແກມ, ເຟສບຸກ ຫລື ມາສໂຕດອນ (Mastodon) ພ້ອມເຕືອນວ່າ: ຜູ້ໃຊ້ທະວິດເຕີທີ່ລະເມີດກົດໃໝ່ນີ້ຫລາຍຄັ້ງຈະຖືກໂຈະບັນຊີການນຳໃຊ້ຖາວອນ.

ເຖິງຢ່າງໃດກໍດີ, ບັນດາຜູ້ໃຊ້ທະວິດເຕີຕໍ່ຕ້ານກົດໃໝ່ຢ່າງຮຸນແຮງ ເຮັດໃຫ້ ມັສ ອອກມາໂພສຂໍ້ຄວາມຂໍໂທດໃນວັນດຽວກັນວ່າ: “ການປ່ຽນແປງນະໂຍບາຍສຳຄັນໃນອະນາຄົດຈະໃຊ້ວິທີໂຫວດ” ແລະ ທະວິດເຕີລົບໂພສ ແລະ ປະກາດກ່ຽວກັບກົດໃໝ່ດັ່ງກ່າວ.

ນອກຈາກນັ້ນ ມັສ ຍັງເຊີນຊວນຜູ້ໃຊ້ທະວິດເຕີໂຫວດວ່າລາວຄວນກ້າວລົງຈາກຕຳແໜ່ງປະທານທະວິດເຕີ ຫລື ບໍ່ ແລະ ສັນຍາວ່າຈະເຮັດຕາມຜົນໂຫວດ. ຕໍ່ມາ ລາວໂພສຂໍ້ຄວາມທຳນອງວ່າບໍ່ມີໃຜຕ້ອງການເປັນຜູ້ບໍລິຫານຄົນໃໝ່ຂອງບໍລິສັດຄືທະວິດເຕີທີ່ໃກ້ຈະລົ້ມລະລາຍນີ້.