ປກສ ເມືອງຄໍາເກີດ ສາມາດຈັບຊາຍໜຸ່ມ 23 ປີ ທີ່ເຄື່ອນໄຫວລັກຊັບມາແລ້ວ 4 ຄັ້ງ ມາດຳເນີນຄະດີ

ເຈົ້າໜ້າທີ່ວິຊາສະເພາະ ປກສ ເມືອງຄໍາເກີດ ແຂວງບໍລິຄໍາໄຊ ໃຫ້ຮູ້ວ່າ: ໃນວັນທີ 16 ທັນວາ 2022 ສາມາດກັກຕົວຜູ້ຖືກຫາທີ່ກະທໍາຜິດໃນຂໍ້ຫາລັກຊັບພົນລະເມືອງໄດ້ 1 ຄົນ ຄື: ທ້າວ ຈິດຕະກອນ ໂສລັດຕະນະວົງ ອາຍຸ 23 ປີ, ປະຊາຊົນ ບ້ານໂພນໄຊ ເມືອງຄໍາເກີດ ແຂວງບໍລິຄໍາໄຊ ມາສືບສວນ-ສອບສວນ ເຊິ່ງຜູ້ຖືກຫາໄດ້ຮັບສາລະພາບຕໍ່ເຈົ້າໜ້າທີ່ວ່າ: ໃນໄລຍະຜ່ານມາຜູ້ກ່ຽວແມ່ນເຄື່ອນໄຫວລັກຊັບມາແລ້ວ 4 ຄັ້ງ ແລະ ແຕ່ລະຄັ້ງທີ່ຈະລົງມືແມ່ນໄດ້ຕິດຕາມການເຄື່ອນໄຫວຂອງເປົ້າໝາຍ ເປັນເວລາ 1 ວັນ.

ຄັ້ງທີ 1 ແລະ ຄັ້ງທີ 2 ໃນໄລຍະກາງປີ 2022 ແມ່ນໄດ້ກໍ່ເຫດລັກຊັບຢູ່ຮ້ານຂາຍເຄື່ອງປະດັບ, ຮ້ານຊື້-ຂາຍ ເງິນ-ຄໍາ ພາຍໃນຕະຫລາດແສນອຸດົມ ເມືອງຄໍາເກີດ ແຂວງບໍລິຄໍາໄຊ ໂດຍໃຊ້ຄີມ ແລະ ໄຂຄວງ ເຈາະເພດານແລ້ວປີນຂື້ນຕາມໂຄງເຫລັກແລ້ວລົງສູ່ຮ້ານ ໄດ້ເອົາສາຍຄໍຄໍາ ປະມານ 30 ກວ່າເສັ້ນ, ສາຍແຂນຄໍາ 8 ເສັ້ນ, ແຫວນສີເຫລືອງ 15 ວົງ, ປອກຂາຄໍາ 1 ເສັ້ນ, ສາຍແຂນເງິນ ປະມານ 3 ເສັ້ນ ແລະ ເງິນສົດ 2.900.000 ກີບ. ຈາກນັ້ນ 2 ວັນຕໍ່ມາໄດ້ນໍາເອົາວັດຖຸທີ່ລັກໄປນັ້ນໄປຂາຍຢູ່ຮ້ານຂາຍຄໍາແຫ່ງໜຶ່ງໃນນະຄອນຫລວງວຽງຈັນ ໄດ້ເງິນຈໍານວນ 28.000.000 ກີບ ແລະ ວັດຖຸຈໍານວນໜຶ່ງ ແມ່ນເປັນຂອງປອມຈຶ່ງບໍ່ໄດ້ຂາຍ ສ່ວນເງິນຈໍານວນດັ່ງກ່າວແມ່ນໃຊ້ຈ່າຍຈົນໝົດ.

ຄັ້ງທີ 3: ໃນເວລາປະມານ 23 ໂມງ ຂອງວັນທີ 23 ພະຈິກ 2022 ໄດ້ກໍ່ເຫດລັກຊັບຢູ່ຮ້ານຊື້ຂາຍເງິນ-ຄໍາ ເພັນ ກີມເຮີຍ ບ້ານຫລັກ20 ເມືອງຄໍາເກີດ ດ້ວຍການປີນຂຶ້ນຕາມຄອມແອ ເຂົ້າຊ່ອງວ່າງເທິງເພດານແລ້ວໃຊ້ໄຂຄວງ ແລະ ສີ່ວເຈາະເພດານເປັນຮູພໍຫລົມໂຕແລ້ວລອດລົງໄປໃນຮ້ານໄດ້ລັກເອົາສາຍແຂນຄໍາປະມານ 10 ເສັ້ນ, ຕ້າງຫູຄໍາປະມານ 10 ຄູ່, ແຜ່ນຄໍາປະມານ 5 ແຜ່ນນ້ອຍ, ເງິນຈໍານວນ 25.000.000 ກີບ, ຈາກນັ້ນ 3 ວັນຕໍ່ມາ ຜູ້ກ່ຽວໄດ້ນໍາເອົາຄໍາຈໍານວນດັ່ງກ່າວມາຈູດເພື່ອຫລອມໃຫ້ເປັນກ້ອນດຽວຈົນສໍາເລັດແລ້ວນໍາເອົາຄໍາຈໍານວນນັ້ນໄປຂາຍຢູ່ນະຄອນຫລວງວຽງຈັນ ໄດ້ເງິນສົດຈໍານວນ 26.000.000 ກີບ ແລ້ວນໍາໄປໃຊ້ຈ່າຍຈົນໝົດ.

ຄັ້ງທີ 4: ໃນເວລາປະມານ 22 ໂມງ ຂອງວັນທີ 10 ທັນວາ 2022 ຜູ້ກ່ຽວໄດ້ກໍ່ເຫດລັກຊັບ ໂດຍໃຊ້ມີດງັດປະຕູ ແລະ ເຫລັກກັນຂະໂມຍທາງດ້ານຫລັງຂອງຮ້ານ ຂອງນາງ ສຸກັນດາ ທີ່ຢູ່ດ້ານນອກຂອງຕະຫລາດແສນອຸດົມ ເມື່ອເຂົ້າໄປໄດ້ຜູ້ກ່ຽວໄດ້ລັກເອົາສາຍຄໍເງິນ ປະມານ 10 ກວ່າເສັ້ນ, ສາຍແຂນເງິນ ປະມານ 7 ເສັ້ນ, ແຫວນເງິນ ປະມານ 20 ວົງ, ເງິນບາດ 1.020 ບາດ, ເງິນກີບ 175.000 ກີບ ສໍາເລັດແລ້ວຈຶ່ງໄດ້ກັບອອກມາທາງເກົ່າ ແລ້ວສືບຕໍ່ລັກຊັບທີ່ຮ້ານຂາຍຄໍາຂອງທ້າວຄໍານຸ່ນ ທີ່ຢູ່ໃກ້ກັນກັບຮ້ານ ນາງ ສຸກັນດາ ໂດຍໃຊ້ມີດງັດເງະທາງຊ່ອງດູດອາກາດຫ້ອງນໍ້າ ແລ້ວປີນເຂົ້າໄປລັກເອົາຊັບສິນມີຄ່າຄື: ເງິນກີບຫົວໜາມ 37 ກີບ, ເງິນຝັກ 5 ຝັກ, ເຕົ້າປູນ 2 ອັນ, ພະ 3 ອົງ, ຊີ້ນສ່ວນຂອງເງິນ ປະມານ 3 ກິໂລ ເມື່ອສໍາເລັດກໍໄດ້ກັບອອກມາທາງເກົ່າແລ້ວ ກັບຄືນເມືອເຮືອນຂອງຜູ້ກ່ຽວເຮັດຄືບໍ່ມີຫຍັງເກີດຂື້ນ.

ມາຮອດ ວັນທີ 16 ທັນວາ 2022 ໃນລະຫວ່າງທີ່ຜູ້ກ່ຽວນໍາເອົາວັດຖຸມີຄ່າ ໄປສະກັດເພື່ອເອົາຄໍາອອກຈາກເງິນ ຢູ່ທີ່ຮ້ານແຫ່ງໜຶ່ງພາຍໃນເມືອງ ຄໍາເກີດ ເມືອເຫັນດັ່ງນັ້ນເຈົ້າຂອງຮ້ານຈຶ່ງມີຄວາມສົງໃສ ແລະ ບອກວ່າບໍ່ວ່າງຖ້າຈະສະກັດຕ້ອງແມ່ນມື້ຕໍ່ໄປ, ຈາກນັ້ນກໍໄດ້ແຈ້ງເຈົ້າໜ້າທີ່ເພື່ອຊາບ ແລະ ຕົກມາຮອດເວລາປະມານ 19 ໂມງຂອງວັນດຽວກັນ ເຈົ້າໜ້າທີ່ວິຊາສະເພາະໄດ້ນໍາກໍາລັງໄປກັກຕົວຜູ້ກ່ຽວມາດໍາເນີນຄະດີຕາມກົດໝາຍ.