ໂພສ ເມສຊີ ສະຫລອງແຊ໊ມ ຂຶ້ນແທ່ນໂພສນັກກິລາຄົນຖືກໃຈຫລາຍທີ່ສຸດ 44 ລ້ານຄັ້ງ
ໂພສສະຫລອງແຊ໊ມບານໂລກ ຂອງ ລີໂອເນລ ເມສຊີ ໃນອິນສະຕາແກຣມ ກາຍເປັນໂພສຂອງນັກກິລາທີ່ມີການກົດຖືກໃຈຫລາຍທີ່ສຸດ ໂດຍຕອນ ນີ້ມີຈຳນວນຄົນຖືກໃຈຫລາຍເຖິງ 44 ລ້ານຄັ້ງ.
ຫລັງຈາກຊ່ວຍທີມຊາດອາເຈນຕີນາ ສ້າງປະຫຍັດສາດຄວ້າແຊ໊ມບານໂລກ 2022 ທີ່ປະເທດກາຕ້າ ດ້ວຍການຍິງລູກໂທດເອົາຊະນະຝຣັ່ງ ແຊ໊ມເກ່ົາໄປໄດ້ ເຊິ່ງຫລັງເກມ ລີໂອເນລ ເມສຊີ ດາວຍິງຂອງທີມໄດ້ໂພສພາບສະຫລອງແຊ໊ມ ພ້ອມກັບພາບຊູຂັນແຊ໊ມບານໂລກ ລົງອິນສະຕາແກຣມສ່ວນຕົວ ແລະ ຂໍ້ຄວາມຂອບໃຈຄອບຄົວ ແລະ ແຟນບານທີ່ໃຫ້ການສະໜັບສະໜູນ ແລະ ເຊື່ອຫມັ້ນໃນຕົວລາວ ເຊິ່ງພາບດັ່ງກ່າວມີຜູ້ກົດຖືກໃຈໄປແລ້ວ 44 ລ້ານຄັ້ງ.
ຈາກຈຳນວນດັ່ງກ່າວ ເຮັດໃຫ້ໂພສນີ້ຂອງ ເມສຊີ ກາຍເປັນໂພສໃນອິນສະຕາແກຣມຂອງນັກກິລາທີ່ມີຍອດຖືກໃຈຫລາຍທີ່ສຸດໃນປະຫວັດສາດ ແລະ ໂພສດັ່ງກ່າວກໍມີຍອດຄອມເມັນຢູ່ປະມານ 1,3 ລ້ານຄອມເມັນ.
ສຳລັບ ເມສຊີ ໃນໄວ 35 ປີ ສ້າງສະຖິຕິໃນບານໂລກຄັ້ງນີ້ ດ້ວຍການເປັນນັກເຕະຄົນທຳອິດຂອງໂລກທີ່ຍິງປະຕູຄົບທຸກຮອບໃນບານໂລກຄັ້ງນີ້ ຕັ້ງແຕ່ ຮອບແບ່ງກຸ່ມ, ຮອບ 16 ທີມ, ຮອບ 8 ທີມສຸດ, ຮອບຮອງຊະນະເລີດ ແລະ ຮອບຊີງຊະນະເລີດ ລວມເຖິງເປັນນັກເຕະທີ່ລົງຫລິ້ນໃນບານໂລກຫລາຍທີ່ສຸດ ເຖິງ 26 ນັດ ທຳລາຍສະຖິຕິເກ່ົາຂອງ ໂລທາ ມັດເທອຸສ ຕຳນານນັກເຕະເຢຍລະມັນທີ່ເຮັດໄວ້ 25 ນັດ ລວມເຖິງຄວ້າລາງວັນ Player of the match ຄົນທຳອິດໃນປະຫວັດສາດທີ່ໄດ້ຮັບລາງວັນຜູ້ຫລິ້ນດີເດ່ັນປະຈຳການແຂ່ງຂັນບານໂລກເຖິງ 2 ສະໄຫມ ຫລັງໄດ້ລາງວັນດັ່ງກ່າວຄັ້ງທຳອິດເມື່ອປີ 2014 ແລະ ເປັນນັກເຕະທີ່ປະສົບຄວາມສຳເລັດຄົບຖ້ວນທັງໃນລະດັບສະໂມສອນ ແລະ ທີມຊາດ.
