ເອີຣົບ ລະດົມງົບປະມານ 20 ຕື້ເອີໂຣ ເພື່ອຫຼຸດຜ່ອນການອີງໃສ່ນ້ຳມັນ-ອາຍແກັສ ຈາກ ຣັດເຊຍ
ຂ່າວຕ່າງປະເທດລາຍງານວ່າ: ວັນທີ 14 ທັນວາ 2022 ຜ່ານມາສະຫະພາບເອີຣົບ (ອີຢູ) ບັນລຸຂໍ້ຕົກລົງດ້ານການເມືອງ ເພື່ອຈະລະດົມທຶນຕື່ມອີກ 20 ຕື້ເອີໂຣ ຈາກບັນດາຕະຫຼາດກາກບອນ ເພື່ອຊ່ວຍອຸປະຖຳໃຫ້ແກ່ແຜນການຢຸດຕິການອີງໃສ່ເຊື້ອເພີງຟອກຊິວຂອງ ຣັດເຊຍ.
60% ຂອງງົບປະມານດັ່ງກ່າວແມ່ນໄດ້ລະດົມຈາກກອງທຶນປ່ຽນແປງໃໝ່ ເອີຣົບ, ປັດຈຸບັນ ໄດ້ນຳໃຊ້ງົບປະມານສ່ວນ ໜຶ່ງເຂົ້າໃນຂົງເຂດເຕັກໂນໂລຊີສີຂຽວ ທີ່ມີລັກສະນະກ້າວກະໂດດຂັ້ນ.
ໃນຂະນະນັ້ນ, 40% ທີ່ຍັງເຫຼືອ ຈະໄດ້ລະດົມຈາກການໃຫ້ໃບອະນຸຍາດປ່ອຍອາຍພິດ CO2 ທີ່ໄດ້ອອກກ່ອນທີ່ແຜນການດັ່ງກ່າວໄດ້ຈັດຕັ້ງຜັນຂະຫຍາຍ.
ຂໍ້ຕົກລົງດັ່ງກ່າວ ຈະມີຜົນສັກສິດຢ່າງເປັນທາງການໃນປີ 2023. ບັນດານັກເຈລະຈາ ເອີຣົບ ກໍຄາດວ່າຈະບັນລຸໄດ້ຂໍ້ຕົກລົງສະບັບໜຶ່ງໃນທ້າຍອາທິດນີ້ ເພື່ອດຳເນີນການປະຕິຮູບຄັ້ງໃຫຍ່ສຳລັບຕະຫຼາດກາກບອນ.
ນີ້ແມ່ນເນື້ອໃນຈຸດສຸມໃນເປົ້າໝາຍຂອງ ເອີຣົບ ເພື່ອແນໃສ່ຮອດປີ 2030 ຈະຫຼຸດປະລິມານປ່ອຍອາຍພິດເຮືອນແກ້ວລົງ 55% ເມື່ອທຽບໃສ່ລະດັບຂອງປີ 1990.
