ເກີດລະເບີດຂ້າຕົວຕາຍໃກ້ ສະຖານທູດອາເມລິກາ ຢູ່ນະຄອນຫລວງກາບູນ ເສຍຊີວິດ 4 ຄົນ
ເຈົ້າໜ້າທີ່ອັບການິດສະຖານກ່າວວ່າ: ເກີດລະເບີດໃກ້ສະຖານທູດອາເມລິກາທີ່ມີການປ້ອງກັນຢ່າງແໜ້ນໜາໃຈກາງນະຄອນຫລວງກາບູນ ໃນວັນທີ 29 ສິງຫານີ້ ເຮັດໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ແລະ ບາດເຈັບອີກປະມານ 10 ຄົນ.
ສຳນັກຂ່າວຕ່າງປະເທດລາຍງານຈາກນະຄອນຫລວງກາບູນ ປະເທດອັບການິດສະຖານ ໃນວັນທີ 29 ສິງຫານີ້ວ່າ: ສຳນັກງານຕຳຫລວດນະຄອນຫລວງກາບູນລາຍງານການເກີດເຫດລະເບີດຂ້າຕົວຕາຍໃກ້ກັບປະຕູທາງເຂົ້າທະນາຄານກາບູນ ເຊິ່ງເປັນສະຖາບັນການເງິນຂອງເອກະຊົນ ຕັ້ງຢູ່ບໍລິເວນສະໜາມມາສຊູດ ໃນເຂດໃຈກາງນະຄອນຫລວງກາບູນ ເວລາ 10:00 ໂມງຕາມເວລາທ້ອງຖິ່ນ ຫລື ເວລາ 12:30 ໂມງເວລາຢູ່ລາວ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ແລະ ໄດ້ຮັບບາດເຈັບອີກປະມານ 10 ຄົນ.
ທັງນີ້, ພື້ນທີ່ດັ່ງກ່າວຖືເປັນໜຶ່ງໃນເຂດການຄ້າຂອງເມືອງຫລວງອັບການິດສະຖານ ແລະ ຕັ້ງຢູ່ໃກ້ສະຖານເອກອັກຄະລັດຖະທູດອາເມລິກາປະຈຳນະຄອນຫລວງກາບູນ ເຊິ່ງຖືເປັນພື້ນທີ່ຢູ່ພາຍໃຕ້ມາດຕະການຮັກສາຄວາມປອດໄພແໜ້ນໜາ, ຫລັງເກີດເຫດຍັງບໍ່ມີບຸກຄົນກຸ່ມໃດອ້າງການມີສ່ວນກ່ຽວຂ້ອງ ຫລື ຢູ່ເບື້ອງຫລັງ, ແຕ່ເຫດການເກີດຂຶ້ນພຽງ 1 ອາທິດ ຫລັງປະທານາທິບໍດີ ໂດນັນ ທຣຳ ປະກາດແນວທາງແຜນຍຸດທະສາດທາງທະຫານຂອງອາເມລິກາຢູ່ອັບການິດສະຖານ ລວມທັງການເພີ່ມກຳລັງທະຫານອາເມລິກາອີກປະມານ 4.000 ຄົນ ແລະ ຄົງກຳລັງພົນຂອງກອງທັບອາເມລິກາໄວ້ຢູ່ອັບການິດສະຖານແບບບໍ່ມີກຳນົດ ຫລັງປະຈຳການໄວ້ປະມານ 8.400 ຄົນນັບແຕ່ທ້າຍປີ 2011 ເມື່ອກອງກຳລັງປະສົມໃນນາມອົງການສົນທິສັນຍາອັດລັງຕິກເໜືອ (ນາໂຕ) ຖອນທະຫານເກືອບ 100.000 ຄົນ ທີ່ສົ່ງເຂົ້າມາເຮັດສົງຄາມໂຄ່ນອຳນາດລັດຖະບານຕາລີບັນ ໃນປີ 2001.
