ຜູ້ມີວຽກເຮັດງານທຳຂອງກຳລັງແຮງງານທັງໝົດໃນປີ 2022 ມີ 2,4 ລ້ານຄົນ ແລະ ອັດຕາວ່າງງານ ມີ 61.207 ຄົນ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 9 ທັນວາ 2022, ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານກ່ຽວກັບການສ້າງອາຊີບ, ການພັດທະນາສີມືແຮງງານ ເພື່ອການມີວຽກເຮັດງານທຳ ແລະ ແກ້ໄຂບັນຫາການວ່າງງານ ວ່າ: ອີງຕາມຜົນຂອງການສຳຫລວດກຳລັງແຮງງານ ປີ 2022 ໄດ້ສະແດງໃຫ້ເຫັນວ່າໃນຈຳນວນພົນລະເມືອງມີທັງໝົດ 7,4 ລ້ານຄົນ, ມີຜູ້ຢູ່ໃນເກນອາຍຸອອກແຮງງານ 15 ປີ ຂຶ້ນໄປ ມີ 5,3 ລ້ານຄົນ, ກຳລັງແຮງງານມີ 2,5 ລ້ານຄົນ, ໃນນີ້ ຜູ້ມີວຽກເຮັດງານທຳ 2,4 ລ້ານຄົນ ເທົ່າກັບ 97,6% ຂອງກຳລັງແຮງງານທັງໝົດ. ໂຄງປະກອບກຳລັງແຮງງານທີ່ມີວຽກເຮັດງານທຳດັ່ງກ່າວໄດ້ແຍກຕາມໂຄງປະກອບເສດຖະກິດຄື: ຂະແໜງກະສິກຳກວມ 1,4 ລ້ານຄົນ, ເທົ່າກັບ 56,8%; ອຸດສາຫະກຳກວມ 252,4 ພັນຄົນ, ເທົ່າກັບ 10,2% ແລະ ບໍລິການ ກວມ 814,3 ພັນຄົນ, ເທົ່າກັບ 32,9%.

ສຳລັບການສ້າງວຽກເຮັດງານທຳ ແລະ ການພັດທະນາສີມືແຮງງານ  ເພື່ອໃຫ້ຜູ້ອອກແຮງງານເຂົ້າເຖິງຕະຫລາດແຮງງານພາຍໃນ-ຕ່າງປະເທດ, ສົ່ງເສີມໃຫ້ປະກອບອາຊີບອິດສະລະ, ໃນໄລຍະ 11 ເດືອນຜ່ານມາ ຂະແໜງແຮງງານ ແລະ ສະຫວັດດີການສັງຄົມໄດ້ເອົາໃຈໃສ່ປະສານສົມທົບກັບຫລາຍພາກສ່ວນຂະແໜງການສູນກາງ-ທ້ອງຖິ່ນ, ຜູ້ຕາງໜ້າອົງການຜູ້ອອກແຮງງານ ແລະ ໃຊ້ແຮງງານ ໄດ້ສ້າງນິຕິກຳນະໂຍບາຍຈຳນວນໜຶ່ງ ເພື່ອເປັນບ່ອນອີງສົ່ງເສີມໃຫ້ຜູ້ອອກແຮງງານໄດ້ມີວຽກທີ່ໝັ້ນຄົງ ມີລາຍໄດ້ທີ່ສົມເຫດສົມຜົນ ທັງເປັນການປົກປ້ອງສິດທິຜົນປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານ ເປັນຕົ້ນດຳລັດວ່າດ້ວຍຂໍ້ມູນຂ່າວສານຕະຫລາດແຮງງານ, ຍຸດທະສາດແຫ່ງຊາດເພື່ອການສົ່ງເສີມການມີວຽກເຮັດງານທຳໃນຊົນນະບົດ, ດຳລັດວ່າດ້ວຍການຈັດສົ່ງແຮງງານໄປເຮັດວຽກຢູ່ຕ່າງປະເທດ, ຂໍ້ຕົກລົງວ່າດ້ວຍການຄຸ້ມຄອງວິສາຫະກິດການຈັດຫາງານ, ຂໍ້ຕົກລົງວ່າດ້ວຍການຂຶ້ນທະບຽນຜູ້ວ່າງງານ.

ສ່ວນການຈັດຫາວຽກເຮັດງານທຳ ແລະ ການແກ້ໄຂອັດຕາວ່າງງານກະຊວງແຮງງານ ແລະ ສະຫວັດດີການສັງຄົມ ໄດ້ສົ່ງເສີມທຸກຫົວໜ່ວຍເສດຖະກິດ ທັງພາກລັດ, ວິສາຫະກິດ, ເຂດເສດຖະກິດພິເສດ ແລະ ໂຄງການລົງທຶນຕ່າງໆ ຈັດຫາວຽກເຮັດງານທຳເຂົ້າສູ່ຕຳແໜ່ງງານພາຍໃນ ແລະ ຕ່າງປະເທດ ຕິດພັນກັບວາລະແຫ່ງຊາດ ໄດ້ 73.541 ຄົນ, ລື່ນແຜນການປີ 34,9%,ໃນນີ້ ເຂົ້າສູ່ຕຳແໜ່ງງານພາຍໃນໄດ້ 20.930 ຄົນ ແລະ ຕ່າງປະເທດ 52.611 ຄົນ.ຈາກຄວາມພະຍາຍາມໃນການສົ່ງເສີມຈັດຫາວຽກເຮັດງານທຳໃຫ້ເຂົ້າສູ່ຕຳແໜ່ງງານພາຍໃນ ແລະ ຕ່າງປະເທດ ໄດ້ເຮັດໃຫ້ຜູ້ທີວ່າງງານໃນປີ 2021 ຈຳນວນ 496.918 ຄົນ, ເທົ່າກັບ 21,8% ມີທ່າອ່ຽງຫລຸດລົງ ຊຶ່ງຕາມການຄິດໄລໂດຍໃຊ້ຂໍ້ມູມລາຍງານແບບບໍລິຫານອັດຕາການວ່າງງານໃນປີ 2022 ຢູ່ໃນລະດັບ 18,5% (423.427 ຄົນ) ຊຶ່ງຕົວເລກຈັດຫາງານນີ້ ບໍ່ລວມແຮງງານທີ່ເຮັດວຽກດ້ວຍຕົນເອງ ແລະ ເຮັດວຽກຊ່ວຍທຸລະກິດຄອບຄົວ. ສຳລັບອັດຕາວ່າງງານຕາມຜົນການສຳຫລວດກຳລັງແຮງງານ ປີ 2022 ແມ່ນ 2,4% (61.207 ຄົນ).