ເປຣູໄດ້ຜູ້ນຳຍິງຄົນທຳອິດ ຫລັງອະດີດປະທານາທິບໍດີ ຖືກປົດຕຳແໜ່ງ

ທ່ານ ນາງ ດິນາ ໂບລົວເຕ ຮອງປະທານາທິບໍດີເປຣູ ເຂົ້າຮັບຕຳແໜ່ງຜູ້ນຳປະເທດຄົນໃໝ່ ຫລັງທ່ານ ເປໂດຣ ກັສຕິໂຢ ປະທານາທິບໍດີເປຣູ ພະຍາຍາມຈະຍຸບສະພາຈົນເກີດວິກິດການທາງການເມືອງ ເຊິ່ງເປັນການກະທຳທີ່ສານລັດຖະທຳມະນູນລະບຸວ່າເປັນການກໍ່ລັດຖະປະຫານ.

ທ່ານ ນາງ ໂບລົວເຕ ເຂົ້າພິທີສາບານຕົນເປັນປະທານາທິບໍດີຄົນໃໝ່ພາຍໃນລັດຖະສະພາຢູ່ນະຄອນຫລວງລິມາໃນວັນທີ 7 ທັນວາ ເຊິ່ງຖືເປັນຜູ້ຍິງຄົນທຳອິດທີ່ໄດ້ຂຶ້ນເປັນຜູ້ນຳປະເທດເປຣູ ແລະ ເປັນປະທານາທິບໍດີຄົນທີ 6 ໃນຮອບ 4 ປີ ນັບແຕ່ປີ 2018. ຂະນະທີ່ທ່ານ ກັສຕິໂຢ ຖືກສະພາລົງມະຕິຢ່າງຫລວງຫລາຍໃນການຖອດຖອນທ່ານອອກຈາກຕຳແໜ່ງ ແລະ ທ່ານໄດ້ຖືກເຈົ້າໜ້າທີ່ຕຳຫລວດຄວບຄຸມຕົວໄວ້ແລ້ວ.

ຜູ້ນຳປະເທດຄົນໃໝ່ຂຶ້ນສູ່ຕຳແໜ່ງທ່າມກາງສະຖານະການການເມືອງທີ່ຕົກຢູ່ໃນຄວາມເຄັ່ງຕຶງ ແລະ ວຸ້ນວາຍ. ເຖິງຢ່າງໃດກໍຕາມ, ທ່ານ ນາງ ໂບລົວຕາ ກ່າວໃນການສາບານຕົນວ່າ: ນາງເຂົ້າຮັບຕຳແໜ່ງປະທານາທິບໍດີດ້ວຍຄວາມເນັ້ນໜັກຮູ້ໃນໜ້າທີ່ຄວາມຮັບຜິດຊອບຂອງຕົນເອງ ແລະ ໄດ້ກຽມຈັດຕັ້ງລັດຖະບານແຫ່ງຊາດທີ່ມີຄວາມເປັນອັນໜຶ່ງອັນດຽວກັນ. ພ້ອມໃຫ້ສັນຍາວ່າຈະຕໍ່ສູ້ກັບການທຸຈະລິດອັນໜ້າລະອາຍເຊິ່ງກັດກິນທຳລາຍປະເທດ.

ນອກຈາກນີ້, ທ່ານ ນາງ ໂບລົວເຕ ຍັງໄດ້ກ່າວປະນາມຄວາມພະຍາຍາມໃນການຍຸບສະພາຂອງທ່ານ ກັສຕິໂຢ ນຳອີກ ໂດຍລັດຖະສະພາຂອງເປຣູເປັນລະບົບສະພາດຽວ.

ສຳນັກຂ່າວບລູມເບິກລາຍງານວ່າ: ທ່ານ ກັສຕິໂຢ ພະຍາຍາມຈະຍຸບສະພາມາເປັນໄລຍະເວລາ 9 ເດືອນ ລວມທັງຂຽນລັດຖະທຳມະນູນສະບັບໃໝ່ ແລະ ປະກາດເຄີຟິວ ເຊິ່ງກໍ່ໃຫ້ເກີດກະແສຕໍ່ຕ້ານຢ່າງຮຸນແຮງຈາກສະມາຊິກສະພາ, ກອງທັບ, ຄະນະຕຸລາການສານລັດຖະທຳມູນນ ລວມທັງຄະນະລັດຖະບານຂອງທ່ານເອງ ແລະ ມີລັດຖະມົນຕີລາອອກເປັນຈຳນວນຫລາຍ.

ທັງນີ້, ໃນການລົງມະຕິຖອດຖອນທ່ານ ກັສຕິໂຢ ນັ້ນ, ສະມາຊິກສະພານິຕິບັນຍັດລົງມະຕິເຫັນພ້ອມ 101 ສຽງ, ຄັດຄ້ານ 6 ສຽງ ແລະ ບໍ່ອອກສຽງ 10 ສຽງ.