ລັດຖະມົນຕີກະຊວງອຸດສາຫະກຳ ແລະ ການຄ້າ ຕອບຄຳຊັກຖາມຂອງ ສຊຊ ຕໍ່ນະໂຍບາຍນຳເຂົ້າລົດໄຟຟ້າ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ວັນທີ 7 ທັນວານີ້, ທ່ານ ທະນົງສິນ ກັນລະຍາ ສະມາຊິກສະພາແຫ່ງຊາດເຂດເລືອກຕັ້ງທີ 12 ແຂວງຄຳມ່ວນ ໄດ້ຊັກຖາມລັດຖະມົນຕີກະຊວງອຸດສາຫະກຳ ແລະ ການຄ້າວ່າ: ປັດຈຸບັນເລີ່ມມີນະໂຍບາຍນຳເຂົ້າລົດໄຟຟ້າ, ແຕ່ຢາກໃຫ້ກະ ຊວງອຸດສາຫະກຳ ແລະ ການຄ້າປະສານງານກັບກະຊວງທີ່ກ່ຽວຂ້ອງເພືີ່ອຫລຸດເງື່ອນໄຂຕ່າງໆນຳລົດໄຟ ຟ້າເຂົ້າມາພາຍໃນປະເທດ ເພາະວ່າໃນອະນາຄົດເຮົາຕ້ອງໄດ້ຫັນໄປໃຊ້ພະລັງງານໄຟຟ້າ.

ຕໍ່ການຊັກຖາມດັ່ງກ່າວ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງວ່າ: ປັດຈຸບັນ, ລັດຖະບານໄດ້ຫລຸດພາສີພາຫະນະນຳເຂົ້າໂດຍສະເພາະພະລັງງານໄຟຟ້າ ຖືວ່າອ່າວຕໍ່າ ຊຶ່ງກະຊວງອຸດສາຫະກຳ ແລະ ການຄ້າ ເອງພວມຄົ້ນຄວ້ານິຕິກຳຄຸ້ມຄອງເພື່ອຮັບປະກັນໃຫ້ລົດໄຟຟ້າທີ່ຈະນຳເຂົ້າໄດ້ຕາມເງື່ອນໄຂມາດຕະຖານ, ແຕ່ກໍຍັງເປັນບັນຫາໃໝ່ຕໍ່ຄວາມສາມາດການກວດກາລົດ ຫລື ເຕັກນິກລົດໄຟຟ້າຕ່າງໆ ພວກເຮົາຍັງຈຳເປັນຕ້ອງສຶກສາຄົ້ນຄວ້າຕື່ມ. ແນວໃດກໍດີໃນຕໍ່ໜ້າການສົ່ງເສີມຊຸກຍູ້ການນຳໃຊ້ລົດໄຟຟ້າເພື່ອທົດແທນການນຳເຂົ້າບວກໃສ່ການສົ່ງເສີມການນຳໃຊ້ພະ ລັງງານຈາກພືດ ໂດຍສະເພາະ ພະລັງງານໄບໂອ ຖືເປັນອັນໜຶ່ງທີ່ຈະຊ່ວຍພວກເຮົາຫລຸດຜ່ອນການນຳໃຊ້ນ້ຳມັນເຊື້ອໄຟ ແລະ ຫລຸດຜ່ອນເງິນຕາເພື່ອຊື້ນ້ຳມັນເຊື້ອໄຟ.