ຊານໂຕສ ຊີ້ເຫດຜົນໃຫ້ ໂຣນັລໂດ ນັ່ງສຳຮອງ, ຣາມອສ ເປີດໃຈຫລັງຍິງແຮັດທຣິກທຳອິດບານໂລກ

ແຟນານໂດ ຊານໂຕສ ຜູ້ຈັດການທີມຊາດໂປຣຕຸເກສ ຊີ້ແຈງເຫດຜົນໃຫ້ ຄຣິສຕຽນໂນ ໂຣນັລໂດ ນັ່ງສຳຮອງ ໃນເກມຖະຫລົ່ມສະວິດເຊີແລນ ຂະນະທີ່ ກອນຊາໂລ ຣາມອສ ເປີດໃຈຫລັງຍິງແຮດທຣິກ ທຳອິດລາຍການນີ້.

ໂປຣຕຸເກສ ສ້າງຜົນງານໄດ້ຢ່າງໜ້າປະທັບໃຈ ຫລັງຖະຫລົ່ມເອົາຊະນະ ສະວິດເຊີແລນ ໄປແບບຂາດລອຍ 6-1 ໃນການແຂ່ງຂັນບານໂລກ 2022 ຮອບ 16 ທີມສຸດທ້າຍ ເມື່ອວັນທີ 6 ທັນວາທີ່ຜ່ານມາ ຈາກປະຕູຂອງ ກອນຊາໂລ ຣາມອສ ທີ່ຍິງແຮັດທຣິກ ນາທີ 17, 51 ແລະ 67, ເປເປ ນາທີ 33, ຣາຟາເອລ ເກເຣໂຣ ນາທີ 55 ແລະ ຣາຟາເອລ ເລເອົາ ນາທີ 90+2 ຂະນະທີ່ ສະວິດເຊີແລນ ຍິງຕີໄຂ່ແຕກຈາກ ມານູເອລ ອາຄັນຈີ ນາທີ 58.

ຈາກຜົນທີ່ເກີດຂຶ້ນເຮັດໃຫ້ ໂປຣຕຸເກສ ຜ່ານເຂົ້າສູ່ຮອບ 8 ທີມສຸດທ້າຍໄປພົບກັບ ໂມຣ໊ອກໂຄ ວັນທີ 10 ທັນວານີ້ ຂະນະທີ່ ຣາມອສ ເຮັດສະຖິຕິເປັນຜູ້ຫລິ້ນ ລາຍທຳອິດເຊິ່ງຍິງແຮັດທຣິກໃນບານໂລກ ຄັ້ງນີ້ ພ້ອມຍິງແຮັດທຣິກໄດ້ຕັ້ງແຕ່ລົງຫລິ້ນບານໂລກຄັ້ງທຳອິດຕໍ່ຈາກ ມິໂລສະລາຟ ໂຄລເຊ ອະດີດກອງໜ້າທີມຊາດເຢຍລະມັນເມື່ອປີ 2002.

ຫລັງເກມ ຊານໂຕສ ກ່າວເຖິງເລື່ອງການໃຫ້ ໂຣນັລໂດ ໄວ້ເປັນຕົວສຳຮອງໃນເກມນີ້ວ່າ : “ ໂຣນັລໂດ ແລະ ຣາມອສ ເປັນນັກເຕະທີ່ແຕກຕ່າງກັນ ບໍ່ມີບັນຫາກັບຕຳແໜ່ງຫົວໜ້າທີມຊາດ ມັນເປັນແທັກຕິກ ຜູ້ຫລິ້ນມີຄວາມແຕກຕ່າງກັນ ຂ້ອຍຍັງໃຫ້ ດາໂລ, ເກເຣໂຣ ເປັນຕົວຈິງ ເຖິງວ່າ ຄັນເຊໂລ ຈະເປັນຜູ້ຫລິ້ນທີ່ຍອດຢຽມ ”.

“ ນັ້ນຄືສິ່ງທີ່ຂ້ອຍຄິດສຳລັບເກມກັບ ສະວິດເຊີແລນ ໃນເກມອື່ນມັນອາດຈະແຕກຕ່າງໄປອີກ ເຮົາເປັນຫມູ່ກັນມາຫລາຍປີແລ້ວ ແລະ ບໍ່ມີຫຍັງກະ ທົບກະເທືອນເຮົາ ”.

ສ່ວນທາງດ້ານ ຣາມອສ ກ່າວເຖິງຄວາມຮູ້ສຶກຫລັງຍິງແຮັດທຣິກວ່າ : “ ເຖິງວ່າໃນຄວາມຝັນອັນສູງສຸດຂອງຂ້ອຍ ແລະ ຂ້ອຍຍັງບໍ່ຄິດເຖິງການເປັນ ຜູ້ຫລິ້ນຕົວຈິງໃຫ້ກັບທີມຊາດໃນຮອບນ໊ອກເອົາບານໂລກ ຂ້ອຍບໍ່ຮູ້ວ່າຈະໄດ້ເປັນຕົວຈິງໃນເກມໜ້າຫລື ບໍ່ ນັ້ນຂຶ້ນຢູ່ກັບຜູ້ຈັດການທີມ ຂ້ອຍຕ້ອງເຮັດວຽກໃຫ້ໜັກໃຫ້ຫລາຍທີ່ສຸດເທົ່າທີ່ຈະເຮັດໄດ້ ແລ້ວເຮົາຈະເຫັນມັນ.”

“ ຂະນະທີ່ ຄຣິສຕຽນໂນ ໂຣນັລໂດ ຄຸຍກັບ ແລະ ທຸກຄົນໃນທີມ ລາວເປັນຫົວໜ້າທີມຂອງເຮົາ ແລະ ພະຍາຍາມຊ່ວຍເຫລືອທຸກຄົນສະເຫມີ ”.