ຟີລິບປິນຫລຸດທ່າອ່ຽງການເຕີບໃຫຍ່ເສດຖະກິດປີໜ້າ ແຕ່ເຊື່ອໝັ້ນປີນີ້ຍັງຕາມເປົ້າ
ລັດຖະບານຟີລິບປິນເຊື່ອໝັ້ນວ່າ: ການເຕີບໃຫຍ່ທາງເສດຖະກິດຂອງປະເທດປີນີ້ຈະຍັງເປັນໄປຕາມເປົ້າໝາຍ. ເຖິງຢ່າງໃດກໍດີ, ມີການຫລຸດຄາດຄະເນສຳລັບປີໜ້າ ເພາະສະພາບເງິນເຟີ້.
ວັນທີ 5 ທັນວາ 2022, ສຳນັກຂ່າວຕ່າງປະເທດລາຍງານວ່າ: ຄະນະກຳມາທິການຮ່ວມດ້ານການພັດທະນາງົບປະມານຂອງຟີລິບປິນ (DBCC) ປັບຫລຸດເປົ້າໝາຍການເຕີບໃຫຍ່ທາງເສດຖະກິດຂອງປະເທດໃນປີ 2023 ຈາກ 6,5-8,0% ລົງມາຢູ່ລະດັບ 6,0-7,0% ໂດຍປັດໄຈສຳຄັນກ່ຽວເນື່ອງກັບສະພາບເງິນເຟີ້ ເຊິ່ງສົ່ງຜົນໃຫ້ເງິນເປໂຊຟີລິບປິນຍັງອ່ອນຄ່າຢ່າງໜັກ ເມື່ອທຽບໃສ່ເງິນໂດລາສະຫະລັດ.
ເຖິງຢ່າງໃດກໍຕາມ, DBCC ຄາດຄະເນທ່າອ່ຽງການຂະຫຍາຍຕົວທາງເສດຖະກິດຂອງປະເທດ ລະຫວ່າງປີ 2024-2028 ຢູ່ລະຫວ່າງ 6,5-8,0%.
ຂະນະດຽວກັນ, ລາຍງານຂອງ DBCC ສະແດງຄວາມເຊື່ອວ່າ: ເສດຖະກິດຂອງຟີລິບປິນຈະເຕີບໃຫຍ່ຕາມເປົ້າໝາຍປະຈຳປີນີ້ ຄືລະຫວ່າງ 6,5-7,5% ເຊິ່ງຈະດີກວ່າສະຖິຕິຂອງປີ 2021 ເຊິ່ງຢູ່ລະດັບ 6,5% ເນື່ອງຈາກກິດຈະກຳທາງເສດຖະກິດໃນທຸກມິຕິ ກັບມາດຳເນີນການເຕັມຮ້ອຍເປີເຊັນແລ້ວ ຫລັງຜະເຊີນມາດຕະການຄວບຄຸມພາຍໃຕ້ເງື່ອນໄຂທາງສາທາລະນະສຸກ ຈາກວິກິດການແພ່ລະບາດຂອງພະຍາດໂຄວິດ-19 ໃນໄລຍະ 2 ປີຜ່ານມາ.
