ປັດຈຸບັນນີ້ ປາກົດເຫັນມີການໂພສປະກາດຮັບຊື້ ວີແຊັດ ຢູ່ທາງສື່ອອນລາຍຈຳນວນຫລາຍ ໂດຍຜູ້ຂາຍບໍ່ຮູ້ວ່າຜູ້ຮັບຊື້ນຳເອົາໄປໃຊ້ເພື່ອຈຸດປະສົງໃດ?

ປັດຈຸບັນນີ້ ປາກົດເຫັນມີການໂພສປະກາດຊື້ ວີແຊັດ ຢູ່ທາງສື່ອອນລາຍຈຳນວນຫລາຍ ແລະ ຊື້ດ້ວຍລາຄາສູງ ແຕ່ 200.000 ກີບ ຫາ 1.500.000 ກີບ ກໍມີ ແຕ່ຜູ້ຂາຍ ແລະ ຜູ້ປະກາດຊື້ນັ້ນບໍ່ຮູ້ວ່າ ເຂົາຈະນຳບັນຊີວີແຊັດ ເຮົາໄປເຮັດຫຍັງ ເອົາໄປໃຊ້ຖືກລະບຽບກົດໝາຍຫລືບໍ່ ແລະ ຈະສ້າງບັນຫາມາຫາເຮົາຫລືບໍ່ໃນອານາຄົດ. ເພາະວ່າຜູ້ປະກາດຮັບຊື້ນັ້ນບໍ່ໄດ້ຊື້ໄປໃຊ້ເອງ ແຕ່ຮັບຊື້ເພື່ອນຳໄປຂາຍຕໍ່ໃຫ້ຄົນຈີນທີ່ອາໃສ ແລະ ເຮັດທຸລະກິດຢູ່ ສປປ ລາວ.

ໃນເດືອນມິຖຸນາ 2022 ທີ່ຜ່ານມາ, ຫ້ອງການ ທະນາຄານແຫ່ງ ສປປ ລາວ ກໍໄດ້ອອກແຈ້ງການເຖິງ: ພໍ່ແມ່ປະຊາຊົນ, ຊາວຄ້າຂາຍ, ພະນັກງານ, ທະຫານ ແລະ ຕຳຫລວດ ໃນຂອບເຂດທົ່ວປະເທດ ໃຫ້ເພີ່ມທະວີຄວາມມີສະຕິລະວັງຕົວໃນການຊຳລະ ແລະ ຮັບການຊຳລະ ຜ່ານ Alipay ແລະ Wechat Pay ຢູ່ ສປປ ລາວ. ເຊັ່ນ: ໃຫັຫລີກລຽງການຊຳລະ ຫລື ດຳເນີນທຸລະກຳຜ່ານ ຜ່ານ Alipay ຫລື Wechat Pay ທີ່ບໍ່ຜ່ານຊ່ອງທາງຂອງຜູ້ໃຫ້ບໍລິການຊຳລະທີ່ໄດ້ຮັບອະນຸຍາດຈາກ ທະນາຄານແຫ່ງ ສປປ ລາວ ເນື່ອງຈາກການຊຳລະດັ່ງກ່າວເປັນການຊຳລະນອກລະບົົບເຊິ່ງບໍ່ມີຂໍ້ມູນທະລະກຳຊຳລະ ເຖິ່ງວ່າການດຳເນີນການຊຳລະດັ່ງກ່າວ ຈະເກີດຂຶ້ນຢູ່ ສປປ ລາວ ກໍ່ຕາມ ແຕ່ຂໍ້ມູນທຸລະກຳຊຳລະ ແມ່ນເກີດຢູ່ຕ່າງປະເທດ ເມື່ອເກີດມີການສໍ້ໂກງ ຫລື ຂໍ້ຂັດແຍງແມ່ນຈະບໍ່ສາມາດກວດສອບ ແລະ ແກ້ໄຂຢູ່ ສປປ ລາວ ໄດ້.