ການນໍາກະຊວງປ້ອງກັນປະເທດ ເຊັນປຶ້ມໄວ້ອາໄລເຖິງ ທ່ານ ຈຽງເຈີໝິນ ອະດີດເລຂາທິການໃຫຍ່ ປະທານປະເທດແຫ່ງ ສປ ຈີນ

ວັນທີ 3 ທັນວາ 2022 ນີ້ ທີ່ສະຖານ ທູດຈີນ ປະຈໍາລາວ ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງ ສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນປະເທດພ້ອມດ້ວຍຄະນະ ໄດ້ວາງພວງມາລາ ແລະ ເຂົ້າເຊັນປຶ້ມໄວ້ອາໄລເຖິງດວງວິນຍານຂອງ ທ່ານ ຈຽງເຈີໝິນ ອະດີດເລຂາທິການໃຫຍ່ ປະທານປະເທດແຫ່ງ ສປ ຈີນ, ອະດີດປະທານກໍາມະທິການການທະຫານສູນກາງກອງທັບປົດປ່ອຍຈີນ.

ເນື່້ອໃນປຶ້ມໄວ້ອາໄລໄດ້ລະບຸວ່າ: ພວກຂ້າພະເຈົ້າມີຄວາມເສົ້າສະຫຼົດໃຈຢ່າງສຸດຊຶ້ງທີ່ໄດ້ຮູ້ຂ່າວຄາວວ່າ ທ່ານ ຈຽງເຈີໝິນ ອະດີດເລຂາທິການໃຫຍ່ ປະທານປະເທດແຫ່ງ ສປ ຈີນ, ອະດີດປະທານກໍາມະທິການການທະຫານສູນກາງກອງທັບປົດປ່ອຍຈີນ ໄດ້ເຖິງແກ່ມໍລະນະກໍາ ໃນເວລາ 12:13 ໂມງ ຂອງວັນທີ 30 ພະຈິກ 2022, ເຊິ່ງເປັນສູນເສຍຄັ້ງຍິ່ງໃຫຍ່ຂອງຜູ້ນໍາທີ່ແສນຄົບລົບຮັກຂອງປະຊາຊົນຈີນ ກໍຄືປະຊາຊົນລາວ ໃນນາມ ກະຊວງປ້ອງກັນປະເທດກໍຄືນາຍ ແລະ ພົນທະຫານໃນກອງທັບປະຊາຊົນລາວ ແລະ ໃນນາມສ່ວນຕົວ ຂໍໄວ້ອາໄລຢ່າງສຸດຊຶ້ງ ແລະ ບັນເທົາຄວາມທຸກໂສກ ຕໍ່ການຈາກໄປ ທ່ານ ຈຽງເຈີໝິນ ອະດີດເລຂາທິການໃຫຍ່  ປະທານປະເທດແຫ່ງ ສປ ຈີນ, ອະດີດປະທານກໍາມະທິການ ການທະຫານສູນກາງກອງທັບປົດປ່ອຍຈີນ ຕະຫຼອດໄລຍະຜ່ານມາ ທ່ານ ຍັງໄດ້ປະກອບສ່ວນສໍາຄັນ ຮັດແໜ້ນຄວາມສາມັກຄີ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ສປປ ລາວ ແລະ ສປ ຈີນ ຂໍໃຫ້ດວງວິນຍານຂອງ ທ່ານຈຽງເຈີໝິນ ຈົ່ງໄປສູ່ສຸຂະຕິ.