ຟີຟາ ສັ່ງສອບ ເຊເນກັລ ເຮັດຜິດກົດການແຂ່ງຂັນບານໂລກ 2022
ເຊເນກັລ ພວມພົບກັບບັນຫາໃຫຍ່ ຫລັງຟີຟາ ລົງມືສອບສວນເຮັດຜິດກົດ ອາດສົ່ງຜົນຕໍ່ເກມຮອບ 2 ກັບ ອັງກິດ.
ທີມຊາດເຊເນກັລ ພົບກັບບັນໃຫຍ່ຢ່າງເຕັມໆ ເມື່ອສະຫະພັນບານເຕະນາໆຊາດ (FIFA) ລົງມືສອບສວນກໍລະນີທີ່ພວກເຂົາອາດຈະເຮັດຜິດກົດກ່ອນເກມ ໃນການແຂ່ງຂັນບານໂລກ 2022 ຮອບທຳອິດ ນັດສຸດທ້າຍໃນກຸ່ມ A ທີ່ຊະນະ ເອກວດໍ 2-1 ເມື່ອວັນທີ 29 ພະຈິກຜ່ານມາ ເຮັດໃຫ້ອາດຈະສົ່ງຜົນຕໍ່ເກມ ຮອບ 16 ທີມ ທີ່ຈະພົບກັບ ອັງກິດ ໃນວັນອາທິດນີ້.
ຕາມກົດຂອງຟີຟາ ທຸກທີມທີ່ລົງຫລິ້ນໃນບານໂລກ ຮອບສຸດທ້າຍ ຈະຕ້ອງອອກມາຖະແຫລ່ງຂ່າວຕໍ່ສື່ມວນຊົນ ທີ່ ເມນ ມີເດຍ ເຊັນເຕີ ກ່ອນເກມ 1 ມື້ ໂດຍມີ ຜູ້ຈັດການທີມ 1 ຄົນ ແລະ ນັກເຕະໃນທີມມາດ້ວຍ 1 ຄົນ ແຕ່ໃນການຖະແຫລງ ເມື່ອວັນຈັນທີ່ຜ່ານມາປາກົດວ່າ : ອະລິອູ ຊິສເຊ ຜູ້ຈັດການທີມ ຊາດເຊເນກັລ ໄດ້ເດີນທາງມາຖະແຫລງຂ່າວຕໍ່ໜ້າສື່ພຽງຄົນດຽວ ບໍ່ມີນັກເຕະເດີນທາງມາດ້ວຍ ແລະ ໃຊ້ເວລາຕອບຄຳຖາມຜູ້ສື່ຂ່າວຢູ່ປະມານ 40 ນາທີ.
ຈາກກໍລະນີດັ່ງກ່າວຖືວ່າຜິດກົດຟີຟາຈະແຈ້ງ ແລະ ທາງອົງການບານເຕະຢືນຢັນວ່າຈະກວດສອບເລື່ອງນີ້ແນ່ນອນ ໂດຍຖະແຫລງການວ່າ : “ ຄະນະກຳມະການດ້ານວິໄນຂອງຟີຟາ ໄດ້ເປີດການສອບສວນສະຫະພັນບານເຕະເຊເນກັລ ໃນກໍລະນີທີ່ອາດຈະຝ່າຝືນກົດທົ່ວໄປຂອງ ການແຂ່ງຂັນບານ ໂລກ 2022 ທີ່ກາຕ້າ ”.
