ຕຳຫລວດລາວ ສາມາດນຳຈັບຜູ້ຖືກຫາທີ່ທາງການໄທຕ້ອງການຕົວ ແລະ ນຳມອບໃຫ້ຕຳຫລວດໄທ ດຳເນີນຄະດີຕາມລະບຽບກົດໝາຍ

ວັນທີ 30 ພະຈິກ 2022 ນີ້ ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ສປປ ລາວ ໄດ້ສົ່ງຕົວຜູ້ຖືກຫາ ໃຫ້ກອງບັນຊາການຕຳຫລວດແຫ່ງຊາດ ຣາຊະອານາຈັກໄທ ຈຳນວນ 3 ຄົນ. ໃນນີ້ 2 ຄົນ ເປັນຜູ້ຖືກຫາກໍ່ເຫດປຸ້ນຊັບແລ້ວເອົາຕົວມາລີ້ຊ້ອນຢູ່ ສປປ ລາວ ແລະ ເຂົ້າເມືອງບໍ່ຖືກຕ້ອງຕາມລະບຽບກົດໝາຍ 1 ຄົນ.

ການມອບຕົວຜູ້ຖືກຫາຄັ້ງນີ້ຈັດຂຶ້ນທີ່ດ່ານຕຳຫລວດກວດ ຄົນເຂົ້າ-ອອກເມືອງ ຈັງຫວັດໜອງຄາຍ ຣາຊະອານາຈັກໄທ ມີ ທ່ານ ພົນຈັດຕະວາ ແກ່ນຈັນ ພົມມະຈັກ ຮອງຫົວໜ້າກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ສປປ ລາວ ແລະ ທ່ານ ພົນເອກ ສຸລະເຊດ ຫັກພານ ຮອງຜູ້ບັນຊາການຕຳຫລວດແຫ່ງຊາດ ຣາຊະອາອາຈັກໄທ ພ້ອມເຈົ້າໜ້າທີ່ທີ່ກ່ຽວຂ້ອງເຂົ້າຮ່ວມ.

ເຈົ້າໜ້າທີ່ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ສປປ ລາວ ໃຫ້ຮູ້ວ່າ: ໃນວັນທີ 3 ພະຈິກ 2022 ກົມໃຫຍ່ຕໍາຫລວດ ໄດ້ຮັບເອກະສານຂໍຄວາມຮ່ວມມື ຈາກຕໍາຫລວດພູທອນ ພາກ 4 ປະເທດໄທ ກ່ຽວກັບການຂໍຄວາມຮ່ວມມືກວດສອບ, ຕິດຕາມ, ຈັບຕົວຜູ້ຖືກຫາຊື່ ທ້າວ ພັນທະຣັດ ຫານສຸຣີ ຫລື ໂກ້ ເຊື້ອຊາດ-ສັນຊາດ ໄທ ຕຳບົນບ້ານເປັດ, ອຳເພີເມືອງ ຂອນແກ່ນ ແລະ ທ້າວ ຈີຣາວຸດ ທອງສືບສາຍ ເຊື້ອຊາດ-ສັນຊາດໄທ ຕຳບົນທ່ານະ ອຳເພີເມືອງຂອນແກ່ນ ຈັງຫວັດຂອນແກ່ນ ທີ່ຮ່ວມກັນປຸ້ນຊັບ ໂດຍຄົນໃດຄົນໜຶ່ງມີອາວຸດປືນ ໃຊ້ຍິງໃນຂະນະທີ່ກໍ່ເຫດເຮັດໃຫ້ຄົນອື່ນເສຍຊີວິດ. ຈາກນັ້ນ, ກໍໄດ້ເອົາຕົວມາລີ້ຊ້ອນຢູ່ ສປປ ລາວ.

ຜ່ານການສືບສວນ-ສອບສວນ ຂອງເຈົາຫນ້າທີ່ຕຳຫລວດ ສປປ ລາວ ສືບຮູ້ວ່າ: ພວກກ່ຽວທັງສອງໄດ້ເອົາຕົວມາລີ້ຊ້ອນຢູ່ເມືອງໄຊເສດຖາ ແລະ ໃນເວລາ 11:00 ໂມງ ຂອງວັນທີ 3 ພະຈິກ 2022 ຈຶ່ງຈັບຕົວທ້າວ ພັນທະຣັດ ແລະ ທ້າວ ຈິຣະວຸດ ຢູ່ຈອມມະນີ ເມືອງ ໄຊເສດຖາ ນະຄອນຫລວງວຽງຈັນ ໄດ້ສຳເລັດ.

ຂໍ້ມູນ: ໜັງສືພິມ ຄວາມສະຫງົບ