ປີ 2022 ອະນຸຍາດຈັດສົ່ງແຮງງານລາວໄປເຮັດວຽກຢູ່ຕ່າງປະເທດ ຈໍານວນ 43.865 ຄົນ

ທ່ານ ນາງ ອານຸສອນ ຄໍາສິງສະຫວັດ ຫົວໜ້າກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ລາຍງານ ວັນທີ 25 ພະຈິກ 2022 ຜ່ານມານີ້ ວ່າ:

ນັບແຕ່ເດືອນ ພຶດສະພາ ປີ 2022 ເປັນຕົ້ນມາ ກະຊວງແຮງງານ ແລະ ສະຫວັດດີການສັງຄົມ ໄດ້ອະນຸຍາດຈັດສົ່ງແຮງງານລາວໄປເຮັດວຽກຢູ່ຕ່າງປະເທດ ຈໍານວນ 43.865 ຄົນ ໃນນັ້ນ ເພດຍິງມີເຖິງ 24.712 ຄົນ ກວມເອົາ 56,34%. ສະນັ້ນ, ເພື່ອຫລຸດຜ່ອນຄວາມສ່ຽງຂອງແຮງງານເຄື່ອນຍ້າຍ ທີ່ອາດຖືກກົດຂີ່ຂູດຮີດແຮງງານ ເພື່ອເຮັດໃຫ້ແຮງງານເຄື່ອນຍ້າຍມີສະຕິ ແລະ ຮູ້ຈັກການປົກປ້ອງຕົນເອງ ແລະ ໃຫ້ເຂົາເຈົ້າຮູ້ຈັກຂໍຄວາມຊ່ວຍເຫລືອໃນເວລາຈໍາເປັນ ແລະ ໃຫ້ເຂົາເຈົ້າໄດ້ຮັບຜົນປະໂຫຍດ ແລະ ປະສົບການທີ່ດີຈາກການໄປເຮັດວຽກຢູ່ຕ່າງປະເທດ, ທາງກະຊວງແຮງງານ ແລະ ສະຫວັດດີການສັງຄົມ ຈິ່ງໄດ້ຮ່ວມມືກັບອົງການແຮງງານສາກົນ ປັບປຸງປຶ້ມຄູ່ມືຝຶກອົບຮົມກ່ອນການເດີນທາງໄປເຮັດວຽກຢູ່ຕ່າງປະເທດ ເພື່ອເປັນອີກເຄື່ອງມືຫນຶ່ງໃຫ້ແກ່ບໍລິສັດຈັດຫາງານ, ຈຸດບໍລິການຈັດຫາງານ ແລະ ສູນ MRC ໃນການຝຶກອົບຮົມໃຫ້ແຮງງານລາວກ່ອນການເດີນທາງໄປເຮັດວຽກຢູ່ຕ່າງປະເທດ.