ສະຫວັນນະເຂດ ປະກາດ 17 ບ້ານຂອງເມືອງ ອາດສະພອນ ເປັນບ້ານຢຸດຕິການຖ່າຍຊະຊາຍ
ພິທີປະກາດ 17 ບ້ານໃຫຍ່ 6 ຄຸ້ມບ້ານ ຂອງເມືອງອາດສະພອນ ເປັນບ້ານຢຸດຕິການຖ່າຍຊະຊາຍ (ຊຈສ) ໄດ້ມີຂຶ້ນວັນທີ 24 ພະຈິກ 2022 ທີ່ ຫ້ອງວ່າການເມືອງອາດສະພອນ ໂດຍການເຂົ້າຮ່ວມເປັນປະທານຂອງທ່ານ ນາງ ບຸນທະລັງສີ ຄຳມະນີວົງ ເຈົ້າເມືອງໆອາດສະພອນ, ທ່ານ ຜາລີ ສີບຸນຍາ ຮອງຫົວໜ້າພະແນກສາທາລະນະສຸກແຂວງ, ທ່ານ ອານຸລັກ ຫລວງລາດບັນດິດ ຫົວໜ້າຂະແໜງອະນາໄມສົ່ງເສີມສຸຂະພາບ ພະແນກສາທາລະນະສຸກແຂວງ ພ້ອມພາກສ່ວນກ່ຽວຂ້ອງເຈົ້າຮ່ວມ.
ພາຍຫລັງໄດ້ເຊັນສັນຍາຢູ່ກອງປະຊຸມແລກປ່ຽນບົດຮຽນວຽກງານນໍ້າ, ສຸຂະພິບານ ແລະ ອະນາໄມໃນ ສປປ ລາວ ເພື່ອກ້າວໄປສູ່ການຢຸດຕິການຖ່າຍຊະຊາຍ ປີ 2025 ຄັ້ງວັນທີ 29-30 ກັນຍາ 2022 ທີ່ນະຄອນຫລວງວຽງຈັນ, ເມືອງອາດສະພອນ ໄດ້ຮັບຮອງເອົາຈະປະກາດເປັນເມືອງຢຸດຕິການຖ່າຍຊະຊາຍ ໃນປີ 2024 ການຈັດຕັ້ງປະຕິບັດກິດຈະກຳ ວຽກງານຊຸມຊົນເປັນເຈົ້າການດ້ານສຸຂະນາໄມ ແມ່ນເລີ່ມແຕ່ທ້າຍປີ 2021 ຈົນມາຮອດທ້າຍປີ 2022 ຈຶ່ງໄດ້ມີການປະເມີນ ແລະ ຢັ້ງຢືນເປັນຄັ້ງທີ 2 ຈຶ່ງສາມາດປະກາດເປັນບ້ານຢຸດຕິການຖ່າຍຊະຊາຍໄດ້ອີກ 17 ບ້ານໃຫຍ່ 6 ຄຸ້ມບ້ານ ມີ: ບ້ານ ນາສອງຄອນ, ໄຊໂພນສິມ, ກຸດນໍ້າແລ້ງ, ນາຂາມ, ຕົ້ນໂພສີ, ວຽງໄຊໃຫຍ່, ນາທົ່ມໂຄກ, ນາທົ່ມດົງ, ນາກະປົງ, ຕາດຂາແດງ, ແກ້ງຫີນ, ດົງສານ, ນາປາຄາ, ໂນນຍາງ, ໂນນສະຫວ່າງ, ສິງສະຫວ່າງ, ດົງຫວາຍດິນ, ດົງນ້ອຍ, ນາໜອງເດີ່ນ, ນາໂພ, ນາມົນ, ບຶງພະເໜາະ ແລະ ບ້ານຄຳພູ ທີ່ມີເປີເຊັນການໃຊ້ວິດຖ່າຍ 100% ເຊິ່ງໄດ້ຮັບທຶນຊ່ວຍເຫລືອຈາກໂຄງການ SNV ເພື່ອຈະລົງຈັດຕັ້ງປະຕິບັດວຽກງານຊຸມຊົນເປັນເຈົ້າການດ້ານສຸຂະນາໄມ ໂດຍໄດ້ກະຕຸ້ນໃຫ້ຊຸມຊົນເປັນເຈົ້າການໃນການກໍ່ສ້າງວິດຖ່າຍດ້ວຍທຶນຂອງປະຊາຊົນເອງ ແຕ່ອົງການ SNV ແມ່ນໄດ້ສະໜັບສະໜູນດ້ານງົບປະມານໃຫ້ທີມງານຂັ້ນແຂວງ ແລະ ຂັ້ນເມືອງ ເພື່ອລົງກະຕຸ້ນໃຫ້ປະຊາຊົນມີການປ່ຽນແປງພຶດຕິກຳ ເພື່ອຢຸດຕິການຖ່າຍຊະຊາຍ.
