ເນມາ ພາດລົງສະໜາມໃຫ້ບຣາຊິລຕະຫລອດຮອບແບ່ງກຸ່ມບານໂລກ 2022
ສື່ລາຍງານວ່າ ເນມາ ກອງໜາທີມຊາດບຣາຊິລຈະພາດລົງສະໜາມໃຫ້ກັບ ບຣາຊິລ ອີກ 2 ເກມທີ່ເຫລືອ ໃນຮອບແບ່ງກຸ່ມຂອງບານໂລກ 2022 ຫລັງມີອາການບາດເຈັບຂໍ້ຕີນ ແຕ່ຄາດຈະກັບມາໄດ້ໃນຮອບ 8 ທີມ.
ໂດຍເນມາ ໄດ້ຮັບບາດເຈັບຂໍ້ຕີນຈາກເກມທີ່ ບຣາຊິລ ຊະນະ ເຊີເບຍ 2-0 ບານໂລກ 2022 ຮອບ ແບ່ງກຸ່ມ ກຸ່ມ H ນັດທຳອິດ ເມື່ອວັນທີ 24 ພະຈິກ ແລະ ຕ້ອງຖືກປ່ຽນຕົວອອກໃນນາທີ 75.
ຫລັງການແຂ່ງຂັນມີພາບທີ່ສະແດງໃຫ້ເຫັນວ່າຂໍ້ຕີນຂອງ ເນມາ ນັ້ນບວມຂຶ້ນຢ່າງເຫັນໄດ້ແຈ້ງ ແລະ ມີຫລາຍຄົນກັງວົນວ່າດາວເຕະອາຍຸ 30 ປີ ຈະຕ້ອງຖອນຕົວຈາກບານໂລກ ຄັ້ງນີ້ຫລືບໍ່.
ແນວໃດກໍຕາມ ຕິເຕ ຜູ້ຈັດການທີມຊາດບຣາຊິລ ຢືນຢັນວ່າ ເນມາ ຈະບໍ່ຕ້ອງຖອນຕົວຈາກບານໂລກຄັ້ງນີ້ຢ່າງແນ່ນອນ ຂະນະທີ່ທີມຫມໍ ເຊລເຊົາ ລະບຸວ່າຕ້ອງຖ້າຜົນສະແກນອາການອີກເທື່ອຫນຶ່ງ.
ແນວໃດກໍຕາມຫລ້າສຸດ ອັນເດຣສ ຣາມອສ ຜູ້ສື່ຂ່າວຈາກ ເດີນຣີໂອ ອາສ ລະບຸວ່າ : ເນມາ ຈະບໍ່ຕ້ອງຖອນຕົວຈາກບານໂລກ ແຕ່ລາວຕ້ອງພັກອີກ 2 ນັດ ໃນຮອບແບ່ງກຸ່ມ ແລະ ຈະກັບມາອີກເທື່ອຫນຶ່ງໃນຮອບນ໊ອກເອົາ.
