ສິງກະໂປຫລຸດຄາດຄະເນ GDP ປີໜ້າ ເບິ່ງເສດຖະກິດໂລກຍັງອ່ອນແອ

ລັດຖະບານສິງກະໂປເບິ່ງເສດຖະກິດໂລກຍັງບໍ່ສົດໃສໃນປີໜ້າ ຈຶ່ງຫລຸດຄາດຄະເນການຂະຫຍາຍ GDP ຂອງປະເທດ.

ວັນທີ 23 ພະຈິກ 2022, ສຳນັກຂ່າວຕ່າງປະເທດລາຍງານວ່າ: ກະຊວງການຄ້າ ແລະ ອຸດສາຫະກຳຂອງສິງກະໂປຄາດຄະເນລວມຍອດຜະລິດຕະພັນພາຍໃນ (GDP) ປີໜ້າ ຈະຂະຫຍາຍຕົວພຽງ 0,5% ເປັນ 2,5% ຫລຸດລົງຈາກການຄາດຄະເນສຳລັບປີນີ້ເຊິ່ງຢູ່ລະດັບ 3,5% ທ່າມກາງສະພາບເສດຖະກິດຂະຫຍາຍຕົວຊ້າທົ່ວໂລກ.

ຂະນະທີ່ຕົວເລກ GDP ປະຈຳໄຕມາດທີສາມເຊິ່ງຫາກໍຜ່ານພົ້ນໄປ ຫລື ລະຫວ່າງເດືອນສິງຫາ-ຕຸລາຜ່ານມາ ຂະຫຍາຍຕົວ 4,1% ເມື່ອທຽບໃສ່ປີຕໍ່ປີ ຕໍ່າກວ່າເປົ້າໝາຍລາຍໄຕມາດຂອງລັດຖະບານສິງກະໂປ ເຊິ່ງກຳນົດໄວ້ໃນລະດັບ 4,4%, ສ່ວນທະນາຄານກາງຂອງສິງກະໂປຄາດຄະເນອັດຕາເງິນເຟີ້ພື້ນຖານຂອງປະເທດຈະຍັງຢູ່ໃນຄ່າສະເລ່ຍ “ລະດັບ 4%” ໃນປີນີ້ ແລະ ຢູ່ລະຫວ່າງ 3,5%-4,3% ໃນປີ 2023.