ຜູ້ຜະລິດລົດຂອງຈີນຕັ້ງເປົ້າຕີຕະຫລາດເອີຣົບ ດ້ວຍ EV ລະດັບ 5 ດາວ
ກຸ່ມຜູ້ຜະລິດລົດໄຟຟ້າ (EV) ຂອງຈີນຕັ້ງເປົ້າເຈາະຕະຫລາດຜູ້ຂັບຂີ່ໃນເອີຣົບ ແລະ ລູກຄ້າອົງກອນຂະໜາດໃຫຍ່ດ້ວຍລົດລາຄາມິດຕະພາບ ທີ່ມາພ້ອມກັບຄວາມໜ້າເຊື່ອຖືດ້ານຄວາມປອດໄພລະດັບສູງ ທັງຍັງພຽບພ້ອມໄປດ້ວຍຄຸນສົມບັດເຕັກໂນໂລຊີຊັ້ນສູງ.
ສຳນັກຂ່າວຣອຍເຕີລາຍງານວ່າ: ໃນໄລຍະບໍ່ເທົ່າໃດເດືອນຜ່ານມາ, ລົດ EV ຂອງຈີນຫລາຍລຸ້ນໄດ້ຮັບຄະແນນດ້ານຄວາມປອດໄພສູງສຸດລະດັບ 5 ດາວ ຈາກສະຖາບັນປະເມີນຄຸນນະພາບລົດໃໝ່ຂອງເອີຣົບ (European New Car Assessment Programme – Euro NCAP) ໂດຍລະດັບ 5 ດາວນັ້ນກຳນົດໃຫ້ລົດມີລະບົບຄວາມປອດໄພສຳລັບກ່ອນ ແລະ ຫລັງເກີດອຸບັດເຫດ ເຊິ່ງເໜືອກວ່າຂໍ້ກຳນົດທາງກົດໝາຍ.
“ບໍລິສັດຜູ້ຜະລິດລົດ EV ຂອງຈີນທຸກແຫ່ງລ້ວນຕ້ອງການຄວ້າລະດັບ 5 ດາວຈາກ EuroNCAP ເພື່ອໃຫ້ສາມາດແຂ່ງຂັນໃນຕະຫລາດເອີຣົບໄດ້” ທ່ານ ໄບຣອັນ ກູ້ ປະທານຂອງ Xpeng ບໍລິສັດລົດໄຟຟ້າຂອງຈີນ ກ່າວ.
ທ່ານ ກູ້ ລະບຸວ່າ: Xpeng ໃຊ້ເວລາ 3 ປີຜ່ານມາ ເພື່ອສ້າງສູນຈຳໜ່າຍ ແລະ ບໍລິການໃນດານມາກ, ໂຮນລັງ, ນອກແວ ແລະ ສະວີເດນ ໂດຍເບື້ອງຕົ້ນເລີ່ມວາງຈຳໜ່າຍ EV ໃນນອກແວແລ້ວ ແລະ ມີແຜນຈະເປີດຕົວລົດຊີດານໄຟຟ້າ P7 ແລະ ລົດສະປອດອາເນກປະສົງ G9 ຢ່າງເປັນທາງການໃນ 4 ປະເທດໃນປີໜ້າ.
ຂະນະທີ່, ທ່ານ ແມກທິວ ເອເວີຣີ ຜູ້ອຳນວຍການສູນວິໄຈແທດແຊມຂອງອັງກິດ ລະບຸວ່າ: ກຸ່ມຜູ້ຜະລິດ EV ຂອງຈີນເນັ້ນໜັກດີວ່າລະບົບຄວາມປອດໄພຂອງລົດມີຄວາມສຳຄັນຫລາຍຕໍ່ຂະບວນການຂາຍ.
ທັງນີ້, ລະດັບ 5 ດາວຂອງ Euro NCAP ຖືກເບິ່ງວ່າເປັນກຸນແຈສຳຄັນໃນການເອົາຊະນະຄວາມກັງວົນຂອງຊາວເອີຣົບກ່ຽວກັບຄຸນນະພາບຂອງລົດທີ່ຜະລິດໃນຈີນ ຫລັງປະສົບຄວາມລົ້ມເຫລວໃນການທົດລອງການຕຳຄັ້ງໃຫຍ່ໃນປີ 2006 ແລະ 2007 ເຊິ່ງສ້າງຄວາມຊົງຈຳວ່າລົດຈາກຈີນບໍ່ປອດໄພ.
