ເກີດເຫດຄົນຮ້າຍ ກວາດຍິງປະຊາຊົນ ທີ່ຮ້ານບັນເທີງໃນ ລັດໂຄໂລຣາໂດ ສະຫະລັດອາເມຣິກາ ເສຍຊີິວິດ 5 ຄົນ ແລະ ບາດເຈັບ 18 ຄົນ
November 21, 2022 - 9:57 AM
ສຳນັກຂ່າວຕ່າງປະເທດລາຍງານວ່າ: ໃນຄືນ ຂອງວັນທີ 19 ພະຈິກ 2022 ທີ່ຜ່ານມາ ເກີດເຫີດຄົນຮ້າຍກວາດຍິງປະຊາຊົນທີ່ຮ້ານ Club Q ເຊິ່ງເປັນຮ້ານບັນເທີງສຳລັບກຸ່ມຄົນຫລາກຫລາຍທາງເພດ (LGBTQIA+) ໃນ ລັດໂຄໂລຣາໂດ ສະຫະລັດອາເມຣິກາ ສົ່ງຜົນໃຫ້ມີຜູ້ເສຍຊີວິດ 5 ຄົນ ແລະ ບາດເຈັບ ຢ່າງໜ້ອຍ 18 ຄົນ.
ເຈົ້າໜ້າທີ່ຕຳຫລວດເປີດເຜີຍວ່າ: ຂະນະນີ້ໄດ້ຄວບຄຸມຕົວຜູ້ຕ້ອງສົງໄສແລ້ວ ເຊິ່ງກຳລັງຢູ່ໃນລະຫວ່າງຂັ້ນຕອນສອບສວນ ແລະ ບໍ່ສາມາດເປີດເຜີຍເຖິງແຮງຈູງໃຈຂອງການເກີດເຫດໃນຄັ້ງນີ້.
ທາງດ້ານເຈົ້າຂອງຮ້ານໄດ້ໂພສຂໍ້ຄວາມຜ່ານເພຈເຟສບຸກວ່າ: ທາງຮ້ານຂໍສະແດງຄວາມເສຍໃຈກັບຜູ້ຖືກເຄາະຮ້າຍ ແລະ ຄອບຄົວ ແລະ ຂໍກ່າວຂອບໃຈລູກຄ້າຜູ້ກ້າຫານຫລາຍຄົນທີ່ພະຍາຍາມຢັບຢັ້ງມືປືນໃນເຫດການທີ່ເກີດຂຶ້ນ.
