ລັດວິສາຫະກິດສະບຽງອາຫານນະຄອນຫລວງຮັບປະກັນການສະໜອງຊີ້ນຊ່ວງໄລຍະປີໃໝ່ໄດ້ພຽງພໍ

ທ່ານອໍານວຍການລັດວິສາຫະກິດສະບຽງອາຫານນະຄອນຫລວງວຽງຈັນ ໃຫ້ຮູ້ເມື່ອມໍ່ໆນີ້ວ່າ: ເພື່ອຮັບປະກັນການສະໜອງຊີ້ນ ແລະ ສະບຽງອາຫານຕ່າງໆໃຫ້ສັງຄົມໃນໄລຍະສະເຫລີມສະຫລອງບຸນປີໃໝ່ລາວໄດ້ພຽງພໍນັ້ນ, ລັດວິສາຫະກິດຂອງຕົນໄດ້ແຈ້ງໃຫ້ບັນດາຜູ້ປະກອບການລ້ຽງສັດໃນນະຄອນຫລວງວຽງຈັນໄດ້ກະກຽມສັດລ້ຽງປະເພດໝູ, ງົວ, ຄວາຍ ແລະ ສັດປີກແຮໄວ້ເພື່ອສະໜອງໃຫ້ໂຮງງານຂ້າສັດ ສາມາດຕອບສະໜອງຄວາມຕ້ອງການຂອງຕະຫລາດຕ່າງໆທີ່ຈະເພີ່ມສູງຂຶ້ນໃນໄລຍະດັ່ງກ່າວໄດ້ພຽງພໍ ແລະ ສໍາລັບໂຮງງານຂ້າສັດດອນດູ່ເມືອງຫາດຊາຍຟອງທີ່ຢູ່ພາຍໃຕ້ການຄຸ້ມຄອງຂອງລັດວິສາຫະກິດສະບຽງອາຫານກໍຈະໄດ້ເພີ່ມປະລິມານການສະໜອງຊີ້ນປະເພດຕ່າງໆໃຫ້ພຽງພໍ ຕາມຄວາມຕ້ອງການຂອງລູກຄ້າດ້ວຍລາຄາຂາຍສົ່ງຊີ້ນໝູ 19.000 ກີບ, ຊີ້ນງົວ-ຄວາຍ 68.000 ກີບ ແລະ ໄກ່ 19.000 ກີບຕໍ່ກິໂລ. ສ່ວນຄ່າບໍລິການຂ້າ-ຄົວສັດປະເພດໝູ, ງົວ ແລະ ຄວາຍ ແມ່ນມີລາຄາ 40.000 ກີບຕໍ່ໂຕ. ນອກຈາກນີ້ສັດທຸກປະເພດທີ່ນໍາເຂົ້າມາຂ້າຢູ່ໂຮງງານຕ້ອງໄດ້ມີໃບຢັ້ງຢືນການກວດກາສຸຂະພາບຂອງສັດ ເພື່ອຮັບປະກັນຄວາມສະອາດ ແລະ ປອດໄພຈາກພະຍາດຕ່າງໆ.

ທ່ານອໍານວຍການ ກ່າວວ່າ: ປັດຈຸບັນ, ໃນນະຄອນຫລວງວຽງຈັນມີຜູ້ປະກອບການລ້ຽງໝູຫລາຍກວ່າ 100 ແຫ່ງ, ສາມາດສະໜອງຊີ້ນໝູໃຫ້ຕະຫລາດປະມານ 50 ໂຕນຕໍ່ມື້ເທົ່າກັບ 80% ຂອງຄວາມຕ້ອງການຊີ້ນໝູທັງໝົດໃນນະຄອນຫລວງວຽງຈັນ, ສ່ວນໂຮງງານຂ້າສັດຂະໜາດໃຫຍ່ທັນສະໄໝມີ 4 ແຫ່ງ ແລະ ໂຮງຂ້າສັດຂະໜາດນ້ອຍມີປະມານ 30 ກວ່າແຫ່ງ.

ທ່ານອໍານວຍການ ເວົ້າວ່າ: ຊີ້ນໝູແມ່ນສີນຄ້າປະເພດໜຶ່ງທີ່ລັດມີການຄວບຄຸມດ້ານລາຄາຄືບໍ່ໃຫ້ເກີນ 35.000 ກີບຕໍ່ກິໂລ, ແຕ່ບັນຫາມີຢູ່ວ່າ: ປັດຈຸບັນໄດ້ມີກຸ່ມຄົນບໍ່ດີລັກລອບນໍາເຂົ້າຊີ້ນໝູຈາກປະເທດໃກ້ຄຽງທີ່ມີລາຄາຖືກກວ່າ, ຈຶ່ງເຮັດໃຫ້ແມ່ຄ້າຈໍານວນໜຶ່ງຫັນໄປຊື້ຊີ້ນນໍາພວກເຂົາມາຂາຍ, ອັນໄດ້ເຮັດໃຫ້ຜູ້ຜະລິດພາຍໃນປະສົບບັນຫາຍ້ອນລາຄາສູງກວ່າ ແລະ ເຫັນວ່າຜູ້ລ້ຽງໝູຫລາຍລາຍໃນນະຄອນຫລວງໄດ້ຢຸດເຊົາກິດຈະການຂອງຕົນຍ້ອນຫລຸບທຶນ ແລະ ອື່ນໆ.