ເຂດເສດຖະກິດພິເສດ ສາມຫລ່ຽມຄຳ ຫ້າມນໍາເອົາອາຫານສຸກ, ໝາກໄມ້ ແລະ ເຄື່ອງດື່ມ ມາວາງຂາຍຊະຊາຍ ຖ້າພົບເຫັນຈະປະຕິບັດມາດຕະການ

ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ອອກແຈ້ງການ ວັນທີ 15 ພະຈິກ 2022, ເຖິງບັນດາຫົວໜ່ວຍທຸລະກິດ, ຜູ້ປະກອບການ, ພໍ່ຄ້າ-ແມ່ຄ້າ, ທັງພາຍໃນເຂດ ແລະ ນອກເຂດຫ້າມນໍາເອົາສິນຄ້າປະເພດ: ອາຫານສຸກ, ໝາກໄມ້ ແລະ ເຄື່ອງດື່ມ ຕ່າງໆໃສ່ທ້າຍລົດໃຫຍ່, ລົດຈັກ, ລົດສາມລໍ້ພ່ວງຂ້າງຕ່າງໆເລາະ ແລະ ວາງຂາຍຊະຊາຍຢູ່ບໍລິເວນແຄມຂອງ, ໜ້າຕຶກ ແລະ ຕາມເສັ້ນທາງຕ່າງໆ ຢູ່ພາຍໃນເຂດເສດຖະກິດພິເສດ ສາມຫລ່ຽມຄຳ ເນື່ອງຈາກວ່າສ້າງຄວາມບໍ່ເປັນລະບຽບຮຽບຮ້ອຍ, ສ້າງຄວາມເປິະເປື້ອນ, ກີດຂວາງການຈະລາຈອນ ແລະ ກະທົບຕໍ່ຜູ້ປະກອບການຢູ່ພາຍໃນເຂດເສດຖະກິດພິເສດ ສາມຫລ່ຽມຄຳ.

ໃນກໍລະນີເຈົ້າໜ້າທີ່ກວດກາພົບເຫັນຈະໄດ້ກ່າວເຕືອນ, ສຶກສາອົບຮົມ ແລະ ປະຕິບັດມາດຕະການຢ່າງເຂັ້ມງວດ.

ດັ່ງນັ້ນ, ແຈ້ງມາຍັງທຸກພາກສ່ວນເພື່ອຮັບຊາບ ແລະ ຈັດຕັ້ງປະຕິບັດຕາມເນື້ອໃນແຈ້ງການສະບັບນີ້ໃຫ້ໄດ້ຮັບຜົນດີ.