ອິນເດຍ ຍິນດີຊ່ວຍເຫລືອກໍ່ສ້າງສຸກສາລາໃຫ້ແກ່ແຂວງເຊກອງ

ແຫລ່ງຂ່າວຈາກແຂວງເຊກອງລາຍງານວ່າ: ໃນໂອກາດພົບປະກັບທ່ານ ເຫລັກໄຫລ ສີວິໄລ ເຈົ້າແຂວງ ເຊກອງໃນວັນທີ 14 ພະຈິກ 2022, ທ່ານ ດິງກາ ອັດຕະນາ ເອກຄັກຄະລັດຖະທູດວິສາມັນຜູ້ມີອໍານາດ ເຕັມແຫ່ງອິນເດຍ ປະຈໍາລາວ ຢືນຢັນພ້ອມຊ່ວຍເຫລືອກໍ່ສ້າງສຸກສາລາເພື່ອຂະຫຍາຍຕາໜ່າງສາທາລະນະສຸກໃຫ້ປະຊາຊົນບັນດາເຜົ່າແຂວງເຊກອງໄດ້ເຂົ້າເຖິງການບໍລິການຮັກສາສຸຂະພາບຫລາຍຂຶ້ນ.

ທ່ານ ເຫລັກໄຫລ ສີວິໄລ ໄດ້ສະແດງຄວາມຂອບໃຈ ທີ່ຜ່ານມາ, ອິນເດຍ ໄດ້ຊ່ວຍເຫລືອສປປ ລາວ ໂດຍສະເພາະການຊ່ວຍເຫລືອແຂວງເຊກອງ ເປັນຕົ້ນໂຄງການກໍ່ສ້າງໂຮງຮຽນມັດທະຍົມສົມບູນເມືອງກະລຶມທີ່ໄດ້ວາງສີລາລືກກໍ່ສ້າງມາແລ້ວ ຊຶ່ງເປັນການປະກອບສ່ວນສໍາຄັນພັດທະນາການສຶກສາຂອງແຂວງໃຫ້ດີຂຶ້ນເປັນກ້າວໆ.