9 ເດືອນແຂວງຈຳປາສັກ ເກີນດຸນການຄ້າ 77 ລ້ານກວ່າໂດລາສະຫະລັດ ແລະ ມີ 24 ປະເທດເປັນຄູ່ຄ້າສຳຄັນ
ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສະຫະກຳ ແລະ ການຄ້າແຂວງຈໍາປາສັກ ກ່າວຕໍ່ກອງປະຊຸມຊຸກຍູ້-ຖອດຖອນບົດຮຽນວຽກການຄ້າພາຍໃນ ທີ່ຈັດຂຶ້ນໃນວັນທີ 15 ພະຈິກ 2022 ວ່າ:ຈາກການເປັນແຂວງທີ່ມີທ່າແຮງຜະລິດສິນຄ້າກະສິກຳເພື່ອສົ່ງອອກ ແລະ ຜ່ານມາໄດ້ມີຄູ່ຄ້ານຳ 24 ປະເທດ, ໃນນີ້ກຸ່ມອາຊຽນ 7 ປະເທດ ແລະ ນອກກຸ່ມອາຊຽນ 17 ປະເທດ.
ສຳລັບ 9 ເດືອນປີນີ້ບັນລຸມູນຄ່າການຄ້າ 548 ລ້ານກວ່າໂດລາສະຫາລັດທຽບໃສ່ໄລຍະດຽວກັນເພີ່ມຂຶ້ນ 76% ແລະ ທຽບໃສ່ແຜນປີໄດ້ 85% ໃນນີ້ມູນຄ່ານຳເຂົ້າສິນຄ້າ 235 ລ້ານກວ່າໂດລາສະຫະລັດ ແລະ ມູນຄ່າສົ່ງອອກ 312 ລ້ານກວ່າໂດລາສະຫະລັດ ໂດຍສິນຄ້າທີ່ສົ່ງອອກຕົ້ນຕໍແມ່ນ ກາເຟ, ຢາງພາລາ, ມັນຕົ້ນ ແລະ ພືດຜັກທີ່ນອນໃນໂຄງ ການ Contract Farming. ເມື່ອສົມທຽບການນຳເຂົ້າ ແລະ ສົ່ງອອກ ຖືວ່າເກີນດຸນການຄ້າ 77 ລ້ານກວ່າໂດລາສະຫະລັດ.
ສ່ວນທ່າແຮງການຜະລິດສິນຄ້າ ODOP ປັດຈຸບັນລວມມີ 33 ຫົວໜ່ວຍ 94 ຜະ ລິດຕະພັນ, ມູນຄ່າການຜະລິດ 41,6 ຕື້ກວ່າກີບ ແລະ ມູນຄ່າຈຳໜ່າຍ 32 ຕື້ກວ່າກີບ ໃນນີ້, ຈຳໜ່າຍໄປຕ່າງປະເທດ 11 ຕື້ກວ່າກີບ ແລະ ຈຳໜ່າຍພາຍໃນ 21 ຕື້ກວ່າກີບ.
