ຈີນແຕ່ງຕັ້ງຜູ້ຊ່ຽວຊານສາທາລະນະສຸກ ຮັບຕຳແໜ່ງ ເລຂາທິການພັກປະຈຳປັກກິ່ງ ສົ່ງສັນຍານປັບກົນລະຍຸດດ້ານໂຄວິດ

ສຳນັກຂ່າວ Bloomberg ລາຍງານວ່າ: ຈີນໄດ້ແຕ່ງຕັ້ງທ່ານ Yin Li ຜູ້ຊ່ຽວຊານດ້ານສາທາລະນະສຸກ ອາຍຸ 60 ປີ ຮັບຕຳແໜ່ງເລຂາທິການພັກກອມມູນິດປະຈຳນະຄອນຫລວງປັກກິ່ງ ແທນທ່ານ Cai Qi ອາຍຸ 66 ປີ ເຊິ່ງເປັນຄີແມນເບີ 5 ປະຈຳຄະນະກຳມະການຖາວອນປະຈຳກົມການເມືອງ ໃນຂະນະທີ່ຈີນເລີ່ມສົ່ງສັນຍານຫລຸດຜ່ອນນະໂຍບາຍ Zero-COVID ຫລັງນະໂຍບາຍເຂັ້ມງວດດຶງເສດຖະກິດຂອງປະເທດໃຫ້ຂະຫຍາຍຕົວຊ້າມາເປັນເວລາດົນ.

ປັດຈຸບັນທ່ານ Yin Li ເປັນ 1 ໃນສະມາຊິກໂປລິດບູໂຣ 24 ຄົນ ໂດຍທ່ານເຄີຍຮັບຕຳແໜ່ງເລຂາທິການພັກກອມມູນິດປະຈຳມົນທົນຝູຈ້ຽນນັບແຕ່ປີ 2020-2022 ໂດຍມົນທົນຝູຈ້ຽນຖືເປັນຖານອຳນາດສຳຄັນຂອງທ່ານ ສີຈິ້ນຜິງ ເຊິ່ງເຄີຍປະຕິບັດງານໃນມົນທົນດັ່ງກ່າວນັບແຕ່ປີ 1985-2002.

ທັງນີ້, ທ່ານ Yin Li ມີຜົນງານໂດດເດັ່ນໃນຂະແໜງສາທາລະນະສຸກ ໂດຍທ່ານເຄີຍສຶກສາດ້ານການແກ້ໄຂສາທາລະນະສຸກໃນສະຖາບັນ USSR Academy of Medical Sciences ຂອງຣັດເຊຍໃນປີ 1988-1993 ແລະ ເປັນນັກວິຊາການອາຄັນຕຸກະ (Visiting Fellow) ຂອງ Harvard School of Public Health ໃນໄລຍະປີ 2002-2003 ໂດຍໃນປີ 2003 ນັ້ນ ຈີນໄດ້ຜະເຊີນການແພ່ລະບາດຂອງພະຍາດຊາຣ໌ສ ເຊິ່ງທ່ານ Yin Li ມີບົດບາດສຳຄັນຫລາຍໃນການຊ່ວຍກຳນົດທິດທາງການຮັບມືຕໍ່ພະຍາດລະບາດ ໃນຖານະຮອງຜູ້ອຳນວຍການສຳນັກງານທົ່ວໄປ ສັງກັດກະຊວງສາທາລະນະສຸກ.

ຄວາມຮູ້ຄວາມສາມາດຂອງທ່ານນັ້ນຄາດວ່າຈະເປັນປະໂຫຍດຕໍ່ນະຄອນຫລວງປັກກິ່ງ ເຊິ່ງມີຈຳນວນຜູ້ຕິດເຊື້ອ 404 ຄົນ ໃນວັນທີ 13 ພະຈິກ ເຊິ່ງເປັນລະດັບສູງສຸດໃນຮອບປີ. ໃນຂະນະທີ່ຈີນຫາກໍປະກາດຫລຸດຜ່ອນຂໍ້ກຳນົດໂຄວິດໄປໃນອາທິດຜ່ານມາ ໂດຍການເຄື່ອນໄຫວທີ່ເກີດຂຶ້ນເຮັດໃຫ້ສື່ຄາດຄະເນວ່າ: ການແຕ່ງຕັ້ງເຈົ້າໜ້າທີ່ທີ່ມີຄວາມໂດດເດັ່ນດ້ານສາທາລະນະສຸກໃຫ້ມາຮັບຕຳແໜ່ງສຳຄັນນີ້ ອາດເປັນການສົ່ງສັນຍານວ່າ: ຜູ້ນຳຈີນເຫັນແລ້ວວ່າການເອົາຊະນະໂຄວິດເປັນການຕໍ່ສູ້ໄລຍະຍາວທີ່ຈຳເປັນຕ້ອງມີການວາງກົນລະຍຸດໃໝ່.

ອ້າງອີງ:

https://www.bloomberg.com/…/china-names-sars…

https://www.scmp.com/…/chinas-communist-party-names…