ທ່ານ ໄບເດນ ພົບທ່ານ ສີຈິ້ນຜິງ ນອກຮອບກອງປະຊຸມ G20 ແລ້ວ ສອງປະເທດເນັ້ນຍັງຫວັງສ້າງການຮ່ວມມືໄດ້

ປະທານາທິບໍດີ ໂຈ ໄບເດນ ແຫ່ງອາເມລິກາ ໄດ້ພົບປະກັບປະທານປະເທດ ສີຈິ້ນຜິງ ຂອງຈີນ ແລ້ວ ໃນເວລາປະມານ 17:30 ໂມງ ຂອງວັນທີ 14 ພະຈິກ ຕາມເວລາຂອງເກາະບາຫລີ ປະເທດອິນໂດເນເຊຍ (ຫລືປະມານ 16:30 ໂມງ ຕາມເວລາປະເທດລາວ) ໂດຍຖືເປັນຄັ້ງທຳອິດທີ່ທັງສອງຜູ້ນຳໄດ້ພົບປະກັນແບບຕົວຕໍ່ຕົວ ຫລັງຈາກທ່ານ ໄບເດນ ຮັບຕຳແໜ່ງຜູ້ນຳອາເມລິກາມາເປັນເວລາເກືອບ 2 ປີ.

ໃນໄລຍະເລີ່ມຕົ້ນການສົນທະນານັ້ນ, ທ່ານ ໄບເດນ ກ່າວວ່າ: ທ່ານພ້ອມຈະເປີດຊ່ອງທາງການສື່ສານເປັນການສ່ວນຕົວລະຫວ່າງທ່ານ ແລະ ທ່ານ ສີຈິ້ນຜິງ ເພາະເບິ່ງວ່າທັງສອງປະເທດມີຫລາຍບັນຫາທີ່ຈະຕ້ອງຫາລືຕົກລົງກັນ ພ້ອມສະແດງຄວາມເຊື່ອໝັ້ນວ່າ: ອາເມລິກາ ແລະ ຈີນ ຈະສາມາດແກ້ໄຂຄວາມແຕກຕ່າງໄດ້ ລວມທັງຈະສາມາດປ້ອງກັນບໍ່ໃຫ້ການແຂ່ງຂັນລະຫວ່າງກັນນຳໄປສູ່ການສ້າງຄວາມຂັດແຍ່ງ ແລະ ສະແຫວງຫາຫົນທາງໃນການປະສານການຮ່ວມມືເພື່ອແກ້ໄຂບັນຫາຮີບດ່ວນໃນລະດັບໂລກ.

ສ່ວນທ່ານ ສີຈິ້ນຜິງ ກ່າວວ່າ: ປັດຈຸບັນ ການພົວພັນລະຫວ່າງ ຈີນ ແລະ ອາເມລິກາ ຢູ່ໃນສະຖານະການທີ່ທັງສອງຝ່າຍກຳລັງໃຫ້ຄວາມສຳຄັນຫລາຍ ເພາະບໍ່ແມ່ນສະຖານະການທີ່ຈະສ້າງປະໂຫຍດໃຫ້ແກ່ປະຊາຊົນຂອງທັງສອງປະເທດ ລວມທັງບໍ່ແມ່ນສິ່ງທີ່ປະຊາຄົມໂລກຄາດຫວັງໄວ້. ພ້ອມກ່າວວ່າ: ທັງສອງປະເທດຈຳເປັນຕ້ອງຄົ້ນຫາທິດທາງທີ່ຖືກຕ້ອງເພື່ອກ້າວເດີນໄປທາງໜ້າ ແລະ ຍົກລະດັບການພົວພັນໃຫ້ດີຂຶ້ນ.

“ປະຊາຄົມໂລກຄາດຫວັງວ່າຈີນ ແລະ ອາເມລິກາ ຈະສາມາດຮັບມືຕໍ່ການພົວພັນລະຫວ່າງປະເທດໄດ້ຢ່າງເໝາະສົມ, ກອງປະຊຸມຂອງພວກເຮົາຄັ້ງນີ້ດຶງດູດຄວາມສົນໃຈຈາກຄົນທົ່ວໂລກ. ດັ່ງນັ້ນ ພວກເຮົາຄວນປະສານການຮ່ວມມືກັບທຸກປະເທດ ເພື່ອສ້າງຄວາມຫວັງໃຫ້ແກ່ສັນຕິພາບຂອງໂລກ, ສ້າງຄວາມເຊື່ອໝັ້ນຕໍ່ສະຖຽນລະພາບຂອງໂລກ ແລະ ສ້າງແຮງກະຕຸ້ນທີ່ແຂງແຮງເພື່ອການພັດທະນາຮ່ວມກັນ” ຜູ້ນຳຈີນກ່າວ.

ອ້າງອີງ:

https://www.bloomberg.com/…/biden-looks-to-set…

https://edition.cnn.com/…/biden-xi-meeting…/index.html