“ຕາລີບັນ” ຫ້າມ “ຜູ້ຍິງ” ເຂົ້າສວນເຄື່ອງຫລິ້ນ ໃນເມືອງຫລວງອັບການິດສະຖານ

ລັດຖະບານຕາລີບັນ ເຊິ່ງປົກຄອງອັບການິດສະຖານ ມີຄຳສັ່ງບໍ່ອະນຸຍາດໃຫ້ຜູ້ຍິງ ແລະ ເດັກນ້ອຍຜູ້ຍິງ ໃຊ້ບໍລິການສວນເຄື່ອງຫລິ້ນໃນນະຄອນຫລວງກາບູນ.

ວັນທີ 10 ພະຈິກ 2022, ສຳນັກຂ່າວຕ່າງປະເທດລາຍງານວ່າ: ກະຊວງສິນລະທຳຂອງອັບການິດສະຖານປະກາດໃນອາທິດນີ້ ບໍ່ອະນຸຍາດໃຫ້ຜູ້ຍິງ ແລະ ເດັກນ້ອຍຜູ້ຍິງເຂົ້າໃຊ້ບໍລິການສວນເຄື່ອງຫລິ້ນ ແລະ ເຂົ້າຮ່ວມງານມ່ວນຊື່ນທັງໝົດໃນນະຄອນຫລວງກາບູນ. ການເຄື່ອນໄຫວດັ່ງກ່າວເກີດຂຶ້ນພາຍໃນເວລາພຽງບໍ່ເທົ່າໃດເດືອນ ຫລັງລັດຖະບານຕາລີບັນປະກາດແບ່ງແຍກທາງເຂົ້າ ແລະ ອອກສວນເຄື່ອງຫລິ້ນ ລະຫວ່າງຜູ້ຊາຍກັບຜູ້ຍິງ.

ທັງນີ້, ເນື້ອໃນໃນຖະແຫລງການຂອງກະຊວງສິນລະທຳແຫ່ງອັບການິດສະຖານ ລະບຸພຽງ ຕະຫລອດໄລຍະເວລາ 15 ເດືອນທີ່ລັດຖະບານຕາລີບັນປົກຄອງອັບການິດສະຖານ ໜ່ວຍງານທີ່ກ່ຽວຂ້ອງພະຍາຍາມຈັດລະບຽບ ແລະ ກຳນົດແນວທາງໃຫ້ປະຊາຊົນ ໃນການໃຊ້ບໍລິການສະຖານທີ່ສາທາລະນະຫລາຍແຫ່ງ. ເຖິງຢ່າງໃດກໍຕາມ, ເຈົ້າໜ້າທີ່ຍັງກວດພົບ “ການຝ່າຝືນ ແລະ ບໍ່ປະຕິບັດຕາມ” ບໍ່ວ່າຈະເປັນກໍລະນີຜູ້ຊາຍ ແລະ ຍິງ ໃຊ້ບໍລິການສະຖານທີ່ໂດຍບໍ່ມີການແບ່ງແຍກ ແລະ ການແຕ່ງກາຍບໍ່ຮຽບຮ້ອຍ.

ສ່ວນຜູ້ປະກອບການສວນເຄື່ອງຫລິ້ນຫລາຍແຫ່ງ ວິພາກວິຈານມາດຕະການນີ້ຢ່າງໜັກ ເນື່ອງຈາກແນ່ນອນວ່າ: ສົ່ງຜົນກະທົບຕໍ່ລາຍໄດ້ ແລະ ສະແດງຄວາມກັງວົນວ່າ: ອາດມີການຂະຫຍາຍຄຳສັ່ງໃຫ້ຄວບຄຸມໄປເມືອງແຫ່ງອື່ນໃນອະນາຄົດ.

ນັບແຕ່ກັບຄືນສູ່ອຳນາດປົກຄອງສູງສຸດໃນອັບການິດສະຖານໄດ້ເປັນຄັ້ງທຳອິດໃນຮອບ 20 ປີ ເມື່ອກາງເດືອນສິງຫາປີຜ່ານມາ ຈຸດຢືນ ແລະ ການໃຊ້ນະໂຍບາຍຂອງກຸ່ມຕາລີບັນຕໍ່ຜູ້ຍິງ ແລະ ເດັກນ້ອຍຜູ້ຍິງເປັນບັນຫາທີ່ຫລາຍຝ່າຍທັງພາຍໃນ ແລະ ຕ່າງປະເທດກັງວົນມາຕະຫລອດ.

ເຖິງວ່າສະມາຊິກລະດັບສູງຂອງກຸ່ມຕາລີບັນຢືນຢັນ “ການເຄົາລົບສິດແມ່ຍິງ” ແຕ່ “ຕ້ອງເປັນໄປຕາມເງື່ອນໄຂພາຍໃຕ້ກົດໝາຍຊາຣີອະ” ແລະ ຮອດຕອນນີ້ ນັກຮຽນຍິງລະດັບມັດທະຍົມສຶກສາຕອນປາຍໃນອັບການິດສະຖານຍັງບໍ່ມີໂອກາດໄດ້ກັບເຂົ້າຮຽນຢ່າງຈິງຈັງ.