ບຸນທາດຫລວງປີນີ້ ຫາຍຫ່ວງເລື່ອງປາກົດການຫຍໍ້ທໍ້

ໂດຍ: ທິດກໍ່າ

ບຸນນະມັດສະການພະທາດຫລວງປີນີ້ເພິ່ນຈັດຍິ່ງໃຫຍ່ອະລັງການ ໂດຍເລີ່ມເປີດພິທີເປັນທາງການນັບແຕ່ວັນທີ 4 ຫາວັນທີ 8 ພະຈິກ 2022 ເຊິ່ງມື້ນີ້ກໍເປັນມື້ສຸດທ້າຍ ແລ້ວ ຕອນເຊົ້າຈະມີກິດຈະກຳຕັກບາດ, ຕອນສວາຍມີຕີຄີ ແລະ ພາກຄໍ່າມີວຽນທຽນ ນັບວ່າບຸນທາດຫລວງປີນີ້ຄຶກຄັກ, ມ່ວນຊື່ນ ເອກອ້າງເຕັມໄປດ້ວຍຄວາມງົດງາມ, ສິລະປະວັດທະນະທຳຂອງຊາດແບບຫລາຍສີສັນ ບໍ່ວ່າທາງພຸດທະສາສະໜາ ແລະ ຮີດຄອງປະເພນີທີ່ສືບສານເປັນຕຳນານມາແຕ່ບັນພະບູລຸດສືບທອດກັນມາແຕ່ລະຍຸກແຕ່ລະສະໄໝຢ່າງຍາວນານ.

ໃນສອງສາມປີຜ່ານມາ, ການຈັດງານບຸນນະມັດສະການພະທາດຫລວງເປັນພຽງເຮັດໄປຕາມຮີດຕາມຄອງ ຍ້ອນມີຜົນກະທົບຈາກການແພ່ລະບາດຂອງພະຍາດໂຄວິດ-19, ແຕ່ມາຮອດປັດຈຸບັນ ເຫັນວ່າສະພາບດັ່ງກ່າວໄດ້ຫລຸດຜ່ອນລົງເປັນລຳດັບ ແລະ ປະເທດຊາດຂອງພວກເຮົາກໍໄດ້ເລີ່ມເປີດປະເທດມາແຕ່ກາງເດືອນພຶດສະພາ 2022 ຈົນມາຮອດປັດຈຸບັນໄດ້ມີຫລາຍຢ່າງເລີ່ມມີບັນຍາກາດດີຂຶ້ນ ໂດຍສະເພາະແມ່່ນການຊອກຢູ່ຫາກິນຂອງປະຊາຊົນບັນດາເຜົ່າ ຫລັງໂຄວິດ-19 ເກືອບທຸກຢ່າງເລີ່ມຫວນມາມີບັນຍາກາດໃໝ່ໃນການຟື້ນຟູເສດຖະກິດຂອງລາວເຮົາກ້າວສູ່ໄລຍະຕໍ່ໄປ.

ແຕ່ແນວໃດກໍຕາມ, ສິ່ງທີ່ເປັນຫ່ວງນັ້ນກໍຄືປາກົດການຫຍໍ້ທໍ້ທີ່ອາດຈະເກີດຂຶ້ນໃນປາງບຸນ ເປັນຕົ້ນການສວຍໂອກາດຂຶ້ນລາຄາສິນຄ້າ, ການເກັບຄ່າບໍລິການຝາກລົດບໍ່ໄປຕາມການຕົກລົງຂອງຄະນະກຳມະການຄຸ້ມຄອງງານບຸນ, ບັນຫາລົດຕິດ, ຜູ້ມາທ່ຽວບຸນຍັດແຍ່ກັນ, ພວກສວຍໂອກາດດຶງກະເປົາ, ແຫກກະເປົາ ແລະ ອາດມີປາກົດການຫຍໍ້ທໍ້ອື່ນໆອີກ.

ເຖິງຢ່າງໃດກໍດີ, ເພື່ອຫລີກເວັ້ນປາກົດການຫຍໍ້ທໍ້ຕ່າງໆທີ່ອາດຈະເກີດຂຶ້ນນັ້ນ, ທາງເຈົ້າໜ້າທີ່ເຮົາກໍມີການວາງກຳລັງກຽມພ້ອມເພື່ອຮັບສະຖານະການທີ່ອາດຈະເກີດຂຶ້ນ ແຕ່ອັນສຳຄັນທີ່ສຸດ ໝົດທຸກຄົນຕ້ອງມີສະຕິເປັນເຈົ້າ, ຜູ້ໄປທ່ຽວບຸນຕ້ອງຮັກສາຄວາມປອດໄພຊັບສິນຂອງຕົນເອງໃຫ້ດີ ໂດຍສະເພາະກະເປົາເງິນ, ກະເປົາພາຍ ແລະ ຊັບສິນມີຄ່າອື່ນໆ ຖ້າບໍ່ຈຳເປັນກໍບໍ່ຄວນຖືມາໃນງານບຸນ. ນອກຈາກນັ້ນ ກ່ອນໄປທ່ຽວບຸນຕ້ອງໃສ່ກຸນແຈເຮືອນໃຫ້ດີ, ໃສ່ລັອກ, ໃສ່ໄລກອນປະຕູເຮືອນ, ປະຕູປ່ອງຢ້ຽມຢ່າງຄັກແນ່ດີແທ້ ຕ້ອງແບ່ງກັນຢູ່ແບ່ງກັນໄປມາ ເພາະຄຳວ່າໂຈນບໍ່ມີຄຳວ່າປານີ.

ແຕ່ວັນຜ່ານມາເຈົ້າໜ້າທີ່ເພິ່ນໄດ້ອອກມາຊີ້ແຈງຖະແຫລງໄຂ ແລະ ລາຍງານສະພາບວ່າ ຮັບປະກັນໄດ້ຄວາມສະຫງົບປອດໄພໃນງານບຸນ 100% ທິດກໍ່າໄດ້ເຫັນແນວນີ້ແລ້ວກໍອຸ່ນໃຈ ຫາຍຫ່ວງ ແຕ່ກໍບໍ່ຄວນໝາດ.