ລາຍງານ UN ຊີ້ 8 ປີຜ່ານມາເປັນ 8 ປີ ຮ້ອນທີ່ສຸດແບບບໍ່ເຄີຍເປັນມາກ່ອນ
ວັນທີ 6 ພະຈິກ 2022, ລາຍງານດ້ານສິ່ງແວດລ້ອມສະບັບຫລ້າສຸດ ໂດຍອົງການອຸຕຸນິຍົມວິທະຍາໂລກ (WMO) ໜຶ່ງໃນທະບວງຊຳນັນພິເສດພາຍໃຕ້ອົງການສະຫະປະຊາຊາດ (UN) ຊີ້ວ່າ: 8 ປີຜ່ານມາຖືເປັນ 8 ປີຮ້ອນທີ່ສຸດແບບບໍ່ເຄີຍເປັນມາກ່ອນ ມີການສ້າງສະຖິຕິໃໝ່ເກີດຂຶ້ນໃນທຸກໆປີ.
ລາຍງານຍັງຊີ້ອີກວ່າ: ປັດຈຸບັນ ອຸນຫະພູມສະເລ່ຍຂອງໂລກສູງຂຶ້ນ 1,15 ອົງສາແລ້ວ ເມື່ອທຽບໃສ່ຍຸກກ່ອນອຸດສາຫະກຳ (1850-1900) ແລະ ມີທ່າອ່ຽງເພີ່ມສູງຂຶ້ນທຸກປີໃນໄລຍະທົດສະຫວັດຜ່ານມາ ໂດຍຍັງຫ່າງໄກຈາກເປົ້າໝາຍທີ່ປະຊາຄົມໂລກເຄີຍເຫັນພ້ອມຕ້ອງກັນໃນຂໍ້ຕົກລົງປາຣີ ປີ 2015 ທີ່ຈະຈຳກັດບໍ່ໃຫ້ອຸນຫະພູມສະເລ່ຍໂລກສູງກວ່າ 1,5 ອົງສາ ຖ້າອັດຕາການປ່ອຍແກັສເຮືອນແກ້ວໃນປັດຈຸບັນຍັງບໍ່ຫລຸດໜ້ອຍລົງ ອຸນຫະພູມສະເລ່ຍໂລກອາດເພີ່ມສູງເຖິງ 2,5 ອົງສາ ແລະ ເປັນອັດຕະລາຍຕໍ່ການດຳລົງຊີວິດຂອງສິ່ງມີຊີວິດ.
ລາຍງານສະບັບນີ້ຍັງລະບຸເຖິງສະພາບໂລກລວນທີ່ເກີດຂຶ້ນໃນພາກພື້ນຕ່າງໆທົ່ວໂລກ ນັບແຕ່ວິກິດນ້ຳຖ້ວມໃນປາກິດສະຖານທີ່ຮຸນແຮງ ແລະ ຍາວນານຍິ່ງຂຶ້ນ ມີຜູ້ເສຍຊີວິດຢ່າງໜ້ອຍ 1.700 ຄົນ. ຂະນະທີ່ອີກ 7,9 ລ້ານຄົນກາຍເປັນຜູ້ພັດຖິ່ນ ຕະຫລອດຈົນວິກິດໄຟໄໝ້ປ່າ, ທານນ້ຳກ້ອນຂົ້ວໂລກລະລາຍ, ວິກິດຄື້ນຄວາມຮ້ອນໃນເຂດເອີຣົບທີ່ປົກຄຸມພື້ນທີ່ເປັນວົງກວ້າງ ເຮັດໃຫ້ຫລາຍປະເທດມີອຸນຫະພູມສູງຂຶ້ນເປັນປະຫວັດສາດ ລະດັບນ້ຳໃນແມ່ນ້ຳຫລາຍເສັ້ນຫລຸດລົງຢ່າງຈະແຈ້ງ.
WMO ເຜີຍແຜ່ລາຍງານສະບັບດັ່ງກ່າວນີ້ໃນວັນທຳອິດຫລັງກອງປະຊຸມໂລກຮ້ອນ ຄັ້ງທີ 27 ຫລື COP27 ເປີດສາກຂຶ້ນຢູ່ເມືອງຊາມເອລຊີກ ປະເທດເອຢິບ ໃນວັນທີ 6 ພະຈິກຜ່ານມາ ໂດຍ WMO ຫວັງວ່າລາຍງານສະບັບນີ້ຈະມີສ່ວນເຮັດໃຫ້ບັນດາຜູ້ນຳໂລກໃນກອງປະຊຸມ COP27 ຫລິ່ງເຫັນຄວາມສຳຄັນຂອງວິກິດໂລກຮ້ອນ ແລະ ການປ່ຽນແປງສະພາບອາກາດ ລວມທັງຫັນມາແກ້ໄຂບັນຫາເຫລົ່ານີ້ຢ່າງຈິງຈັງກ່ອນຈະຊ້າເກີນໄປ.
ອ້າງອີງ:
https://public.wmo.int/…/eight-warmest-years-record…
https://www.theguardian.com/…/climate-crisis-past-eight…
https://www.hindustantimes.com/…/last-eight-years-were…
