ຮອງລັດຖະມົນຕີກະຊວງສາທາ ເນັ້ນໃຫ້ໂຮງໝໍແຂວງວຽງຈັນ ຍົກລະດັບຄຸນນະພາບທາງດ້ານວິຊາການປະຕິບັດໄດ້ມາດຖານ 5 ດີ 1 ພໍໃຈ
ເນື່ອງໃນໂອກາດເຂົ້າຮ່ວມພິທີມອບ-ຮັບ ແລະ ເປີດນຳໃຊ້ອາຄານຫ້ອງກວດວິເຄາະຫາເຊື້ອໂຄວິດ-19 ຢູ່ໂຮງໝໍແຂວງວຽງຈັນ ໃນວັນທີ 1 ພະຈິກ 2022 ຜ່ານມາ, ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ໄດ້ມີຄຳເຫັນໂດຍເນັ້ນວ່າ: ໄລຍະຜ່ານມາ ທາງກະຊວງສາທາລະນະສຸກໄດ້ຕິດຕາມ ແລະ ຮັບຮູ້ຕະຫລອດວ່າ ທາງພະແນກສາທາລະນະສຸກ ກໍຄື ໂຮງໝໍແຂວງວຽງຈັນ ໄດ້ມີການປັບປຸງຄຸນນະພາບ, ການບໍລິການ ເຊິ່ງສະແດງອອກຕົວເລກຜູ້ມາໃຊ້ບໍລິການ ແລະ ອັດຕາການນໍາໃຊ້ຕຽງເຫັນວ່າມີລະດັບສູງ, ຫາງສຽງຈົ່ມວ່າຂອງສັງຄົມເຫັນວ່າມີ ໜ້ອຍທີ່ສຸດ ນັ້ນກໍ່ສະແດງໃຫ້ເຫັນວ່າ ຄຸນນະພາບການບໍລິການປິ່ນປົວໄດ້ຖືກຍອມຮັບ ແລະ ໄວ້ເນື້ອເຊື່ອໃຈຈາກສັງຄົມ ໂດຍສະເພາະແມ່ນ ວຽກງານປ້ອງກັນ, ຄວບຄຸມ, ປິ່ນປົວ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ຢູ່ແຂວງວຽງຈັນ ເຫັນວ່າ ເຮັດໄດ້ດີຫຼາຍ, ເຖິງວ່າ ອັດຕາການຕິດເຊື້ອຈະຫຼາຍ ຖ້າທຽບກັບຫຼາຍແຂວງ ເຊີ່ງມາຮອດປະຈຸບັນ ກໍ່ຖືໄດ້ວ່າ ສາມາດໃຊ້ຊີວິດແບບໃໝ່ ໄດ້ຢ່າງເປັນປົກກະຕິ ລວມໄປເຖີງການເປີດຮັບນັກທ່ອງທ່ຽວຕາມນະໂຍບາຍທ່ອງທ່ຽວສີຂຽວໄດ້ຢ່າງເຕັມຮູບແບບ ພາຍໄຕ້ການສຶບຕໍ່ ປະຕິບັດມາດຕະການ ທີ່ຂະແໜງສາທາລະນະສຸກວາງອອກ.
ຄຽງຄູ່ກັບຜົນສໍາເລັດທີ່ຍາດມາໄດ້ນັ້ນ ແຕ່ເມື່ອທຽບໃສ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ-ລັດແລ້ວຍັງມີຫລາຍດ້ານທີ່ຈະຕ້ອງໄດ້ພ້ອມກັນສູ້ຊົນບຸກບືນຕື່ມ ເພື່ອຍົກລະດັບຄຸນນະພາບທາງດ້ານວິຊາການ, ເພີ່ມທະວີຄວາມຮັບຜິດຊອບຂອງພະນັກງານແພດໝໍ, ພະຍາບານ ທັງໝົດ ໃຫ້ສູງຂື້ນ, ຍົກສູງຈັນຍາບັນ, ຈັນຍາທໍາຂອງພະນັກງານແພດໝໍ ໃນການບໍລິການປິ່ນປົວປະຊາຊົນບັນດາເຜົ່າໃຫ້ມີຄວາມເຊື່ອໜັ້ນຕໍ່ວິຊາການໂດຍສະເພາະການປະຕິບັດມາດຖານ 5 ດີ 1 ພໍໃຈຂອງກະຊວງສາທາລະນະສຸກວາງອອກຄື: ການຕ້ອນຮັບດີ, ຄວາມສະອາດດີ, ຄວາມສະດວກດີ, ການບົ່ງມະຕິພະຍາດຊັດເຈນດີ, ປະຕິບັດເຕັກນິກການປິ່ນປົວດີໄວ ແລະ ເຮັດໃຫ້ຄົນເຈັບເພິ່ງພໍໃຈ.
ດັ່ງນັ້ນ, ການສ້າງຄວາມເຂັ້ມແຂງໃຫ້ແກ່ວຽກງານວິເຄາະ, ວິໄຈ, ກວດ ແລະ ບົ່ງມະຕິພະຍາດ ໃຫ້ມີຄວາມທັນສະໄໝຍັງມີເປັນວຽກງານທີ່ຕ້ອງເອົາໃຈໃສ່. ສະນັ້ນ, ການສ້າງຫ້ອງວິເຄາະຂອງໂຮງໝໍແຂວງຄັ້ງນີ້ກໍແມ່ນນິມິດ ໝາຍອັນດີຂອງແຂວງທີ່ຍົກລະດັບຄວາມສາມາດຂອງໂຮງໝໍແຂວງໃນການບົ່ງມະຕິພະຍາດໃຫ້ສູງຂຶ້ນ ໂດຍເປັນຫ້ອງວິເຄາະທີ່ມີເຄື່ອງມື, ອຸປະກອນທັນສະໄໝໄດ້ມາດຕະຖານຄວາມປອດໄພທາງຊີວະພາບສາມາດບົ່ງມະຕິພະຍາດທີ່ເກີດຂຶ້ນໃໝ່ ແລະ ພະຍາດລະບາດຕ່າງໆທີ່ອາດເກີດຂຶ້ນແຕ່ລະໄລຍະເຊັ່ນ: ໂຄວິດ-19 ທີ່ເປັນພະຍາດທີ່ບໍ່ເຄີຍມີມາກ່ອນແຕ່ເຮົາສາມາດບົ່ງມະຕິໄດ້ດ້ວຍເຄື່ອງດັ່ງກ່າວ. ເຊັ່ນເຄື່ອງກວດວິເຄາະ RT-PCR ເຂົ້າໃນການບົ່ງມະຕິພະຍາດ ເຊິ່ງເປັນເຄື່ອງມືວິເຄາະທີ່ສາມາດກວດວິເຄາະພະຍາດໄດ້ຫລາຍຊະນິດ ແລະ ມີຄວາມຊັດເຈນສູງເຮັດໃຫ້ສາມາດບົ່ງມະຕິພະຍາດໄດ້ໄວ ແລະ ຖືກຕ້ອງ ເຊິ່ງຈະຊ່ວຍສະໜັບສະໜູນວຽກວານ 5 ດີ 1 ພໍໃຈ ໄດ້ເປັນຢ່າງດີ.
