ຜູ້ແທນລາວເຂົ້າຮ່ວມກອງປະຊຸມລັດຖະມົນຕີທ່ອງທ່ຽວ ແອັກແມັກ ແລະ ກອງປະຊຸມລັດຖະມົນຕີ ທ່ອງທ່ຽວ ກຳປູເຈຍ-ລາວ-ມຽນມາ-ຫວຽດນາມ ທີ່ກໍາປູເຈຍ
ກອງປະຊຸມລັດຖະມົນຕີທ່ອງທ່ຽວຂອບຍຸດທະສາດການຮ່ວມມືດ້ານເສດຖະກິດ ແມ່ນໍ້າອິຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ ຫລື ແອັກແມັກ ຄັ້ງທີ 5 ພາຍໃຕ້ການເປັນປະທານຂອງທ່ານ ດຣ ທອງຄຸນ ລັດຖະມົນຕີກະຊວງທ່ອງທ່ຽວ ແຫ່ງລາຊາອານາຈັກກຳປູເຈຍ ແລະ ກອງປະຊຸມລັດຖະມົນຕີທ່ອງທ່ຽວ ກໍາປູເຈຍ-ລາວ-ມຽນມາ-ຫວຽດນາມ ຫລື CLMV ຄັ້ງທີ 6, ໂດຍການເປັນປະທານຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຖວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ ແຫ່ງ ສປປ ລາວ ໄດ້ຈັດຂຶ້ນໃນວັນທີ 3 ພະຈິກ 2022 ທີ່ແຂວງຊຽມລຽບ, ຣາຊະອານະຈັກກຳປູເຈຍ.
ກອງປະຊຸມໄດເຫັນດີສືບຕໍ່ຮ່ວມກັນຈັດຕັ້ງແຜນປະຕິບັດງານ ເພື່ອຟື້ນຟູການທ່ອງທ່ຽວທີ່ຖືກຮັບຮອງໃນກອງປະຊຸມລັດຖະມົນຕີທ່ອງທ່ຽວອາຊຽນ ໃນຕົ້ນປີ 2022 ທີ່ ຣາຊະອານາຈັກກຳປູເຈຍ ໃຫ້ເກີດເປັນຮູບປະທໍາ, ໂດຍສົມທົບກັບຂະແໜງການທີ່ກ່ຽວຂ້ອງ ລວມທັງຜູ້ປະກອບການທຸລະກິດທ່ອງທ່ຽວ ເພື່ອເຮັດໃຫ້ການທ່ອງທ່ຽວກັບຄືນມາສູ່ສະພາບປົກກະຕິ ແລະ ເພື່ອດຶງດູດນັກທ່ອງທ່ຽວໃຫ້ມາທ່ຽວນັບມື້ເພີ່ມຂຶ້ນ. ພ້ອມນີ້, ຈະສຸມໃສ່ສ້າງຜະລິດຕະພັນການທ່ອງທ່ຽວ ທີ່ມີຄວາມຫລາກຫລາຍ, ສົ່ງເສີມວຽກງານໂຄສະນາການຕະຫລາດ, ມາດຕະຖານການທ່ອງທ່ຽວ, ການທ່ອງທ່ຽວເຊື່ອມຈອດ, ຫັນການທ່ອງທ່ຽວທາງດ້ານດີຈິຕອນ ເພື່ອໃຫ້ນັກທ່ອງທ່ຽວມີຄວາມສະດວກ ໃນການເຂົ້າເຖິງຂໍ້ມູນຂ່າວສານ; ສືບຕໍ່ຮ່ວມມືກັບບັນປະເທດຄູ່ເຈລະຈາ ແລະ ການຮ່ວມກັບ ບັນດາອົງການຈັດຕັ້ງສາກົນ ແນໃສ່ເຮັດໃຫ້ການທ່ອງທ່ຽວອາຊຽນ ມີຄວາມເຂັ້ມແຂງ ແລະ ສ້າງເງື່ອນໄຂ ອໍານວຍຄວາມສະດວກ ໃຫ້ແກ່ການເດີນທາງທ່ອງທ່ຽວໄປ-ມາຫາສູ່ກັນ ມີຄວາມສະດວກຫລາຍຂຶ້ນ.
ນັບແຕ່ມີການແຜ່ລະບາດຂອງພະຍາດໂຄວິດ-19 ຈຳນວນນັກທ່ອງທ່ຽວສາກົນທີ່ເດີນທາງມາຢ້ຽມ ຢາມປະເທດ CLMV ແລະ ການເດີນທາງທ່ອງທ່ຽວ CLMV ດ້ວຍກັນຫລຸດລົງ ເຊິ່ງໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ກໍຄືຜູ້ປະກອບການທຸລະກິດການທ່ອງທ່ຽວຢ່າງໃຫຍ່ຫລວງ. ຈົນມາຮອດ 9 ເດືອນຕົ້ນປີ 2022 ຈຳນວນນັກທ່ອງທ່ຽວສາກົນທີ່ເດີນທາງມາຢ້ຽມ ຢາມປະເທດ CLMV ຊຶ່ງມີຈຳນວນ 3.9 ລ້ານເທື່ອຄົນ ແລະ ການເດີນທາງທ່ອງທ່ຽວ CLMV ດ້ວຍກັນມີຫລາຍກ່ວາ 600.000 ເທື່ອຄົນ ກວມເອົາ 15,7% ຂອງນັກທ່ອງທ່ຽວທັງໝົດ.
ຄະນະຜູ້ແທນລາວ ໄດ້ແຈ້ງໃຫ້ຮັບຊາບວ່າ ໃນໄລຍະຜ່ານມາພວກເຮົາໄດ້ເອົາໃຈໃສ່ເຂົ້າຮ່ວມການປະຕິບັດຮ່ວມກັບປະເທດສະມາຊິກ ໃນຂອບການຮ່ວມມືດັ່ງກ່າວຢ່າງຕັ້ງໜ້າ. ພ້ອມນັ້ນ ກໍມີແຜນການສ້າງກິດຈະກຳການທ່ອງທ່ຽວ, ເທດສະການວັດທະນະທຳຕ່າງໆຢ່າງຫລາກຫລາຍ ເພື່ອຟື້ນຟູການທ່ອງທ່ຽວ ໃຫ້ກັບຄືນສູ່ສະພາບປົກກະຕິໂດຍໄວ, ໂດຍສະເພາະໃນໄລຍະດັ່ງກ່າວນີ້ ລັດຖະບານລາວ ຍັງໄດ້ພັດທະນາໂຄ່ງລ່າງພື້ນຖານ, ສ້າງເສັ້ນທາງແຫລ່ງທ່ອງທ່ຽວ, ສ້າງສິ່ງອຳນວຍຄວາມສະດວກຕ່າງໆ ແລະ ນັບແຕ່ລັດຖະບານລາວ ໄດ້ມີນະໂຍບາຍເປີດການທ່ອງທ່ຽວ ໃນຮູບແບບເຂດການທ່ອງທ່ຽວສີຂຽວ ໂດຍໃຫ້ມີການບໍລິການຂອງ ບໍລິສັດທ່ອງທ່ຽວຂອງລາວເຮົາ, ແລະ ໄດ້ປະກາດເປີດປະເທດເຕັມຮູບແບບຢ່າງເປັນທາງການ ເຫັນໄດ້ວ່າ ໃນ 6 ເດືອນຕົ້ນປີ 2022, ສາມາດຕ້ອນຮັບນັກທ່ອງທ່ຽວສາກົນ 2 ແສນກວ່າເທື່ອຄົນ ແລະ ຄາດວ່າໃນທ້າຍປີນີ້ ຈະມີນັກທ່ອງທ່ຽວສາກົນ ມາທ່ຽວລາວນັບມື້ເພີ່ມຂຶ້ນ.
ໂອກາດນີ້, ໃນກອງປະຊຸມຍັງໄດ້ຮ່ວມກັນທົບທວນແຜນດຳເນີນງານດ້ານການ ທ່ອງທ່ຽວ 5 ປີ 2019-2023 ໃນຂົງເຂດແອັກແມັກ ແລະ ແຜນດໍາເນີນງານດ້ານການທ່ອງທ່ຽວ 2023-2025 ໃນຂົງເຂດ CLMV ແລະ ສືບຕໍ່ຮ່ວມມືກັນຢ່າງແໜ້ນແຟ້ນສຸມໃສ່ສ້າງຜະລິດຕະພັນໃຫ້ຫລາກຫລາຍ, ການແລກປ່ຽນຂໍ້ມູນຂ່າວສານ, ການທ່ອງທ່ຽວຮັບປະກັນຄວາມປອດໄພ, ຊຸກຍູ້ໃຫ້ມີເສັ້ນທາງເຊື່ອມຕໍ່ທາງບົກ ແລະ ສາຍການບິນໂດຍກົງ ໄປຫາເມືືອງທ່ອງທ່ຽວ ທີ່ສຳຄັນ ສົ່ງເສີມການເດີນທາງທ່ອງທ່ຽວໄປມາຫາສູ່ກັນພາຍໃນປະເທດສະມາຊິກໃຫ້ຫລາຍຂຶ້ນ, ເພີ່ມທະວີການຮ່ວມມືພາກລັດ, ພາກເອກະຊົນ ແລະ ພາກສ່ວນທີ່ກ່ຽວຂ້ອງ ແນໃສ່ເຮັດໃຫ້ເກີດຜົນປະໂຫຍດສູງສຸດ ແລະ ພັດທະນາແບບຍືນຍົງ.
