ຖວທ ແຂວງໄຊສົມບູນ ຫາລືຄຸ້ມຄອງແຫລ່ງທ່ອງທ່ຽວ ພູຫົວໂລ້ນ ນິວຊີແລນເມືອງລາວ ທີ່ດຶງດູດນັກທ່ອງທ່ຽວສ້າງລາຍຮັບໃຫ້ປະຊາຊົນ

ວັນທີ 1 ພະຈິກ 2022 ນີ້, ພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ (ຖວທ) ແຂວງໄຊສົມບູນ ໄດ້ຈັດກອງປະຊຸມປຶກສາຫາລືກ່ຽວກັບການຄຸ້ມຄອງແຫລ່ງທ່ອງທ່ຽວ ພູຫົວໂລ້ນ ບ້ານພູຫົວຊ້າງ ເມືອງອະນຸວົງ ແຂວງໄຊສົມບູນ ໂດຍການເປັນປະທານຂອງ ທ່ານ ທົງສະຫວັນ ໂພສາລາດ ຫົວໜ້າພະແນກ ຖວທ ແຂວງ ພ້ອມພາກສ່ວນກ່ຽວຂ້ອງ ແລະ  ເຈົ້າຂອງດິນເຂົ້າຮ່ວມ.

ທ່ານ ຄຳຜ່ານ ອຸດສີບຸນມີ, ຮອງຫົວໜ້າຂະແໜງທ່ອງທ່ຽວ ໄດ້ແນະນໍາກ່ຽວກັບຂັ້ນຕອນການຈັດຕັ້ງປະຕິບັດການຄຸ້ມຄອງ ແລະ ນຳໃຊ້ພູຫົວໂລ້ນ ເຊິ່ງ ເປັນແຫລ່ງທ່ອງທ່ຽວໜຶ່ງທີ່ມີຄວາມສວຍງາມ, ມີຄວາມເປັນເອກະລັກ ແລະ ກຳລັງເປັນທີ່ນິຍົມຂອງນັກທ່ອງທ່ຽວພາຍໃນ ແລະ ຕ່າງປະເທດ, ເຊິ່ງຖືກຂະໜານນາມວ່າ ເປັນນິວຊີແລນເມືອງລາວ. ສໍາລັບການຄຸ້ມຄອງແຫລ່ງທ່ອງທ່ຽວພູຫົວໂລ້ນ ຕາມແຜນພັດທະນາການທ່ອງທ່ຽວ ແຂວງໄຊສົມບູນ ສຳລັບ ປີ 2021-2025 ຂອງພະແນກ ຖວທ ແຂວງ ໄດ້ກຳນົດເປັນເຂດສະຫງວນ ເພື່ອ ພັດທະນາເປັນສະຖານທີ່ທ່ອງທ່ຽວທີ່ສາມາດດຶງດູດນັກທ່ອງທ່ຽວ ໃຫ້ເຂົ້າມາທ່ອງທ່ຽວ ຢູ່ແຂວງໄຊສົມບູນ ນັບມື້ຫລາຍຂຶ້ນ.

ທັງນີ້ເພື່ອເປັນການປຶກສາລື-ຄົ້ນຄວ້າກ່ຽວກັບການອຳນວຍຄວາມສະດວກໃນການເຂົ້າເຖິງ ແລະ ການຄຸ້ມຄອງສະຖານທີ່ທ່ອງທ່ຽວພູຫົວໂລ້ນ ເຊິ່ງພາສ່ວນທີ່ກ່ຽວຂ້ອງໄດ້ສະເໜີຕໍ່ກັບປະຊາຊົນ ກໍຄືເຈົ້າຂອງພື້ນທີ່ພູຫົວໂລ້ນ ໃຫ້ຊ່ວຍກັນປົກປັກຮັກສາຄວາມສວຍສົດງົດງາມຂອງພູຫົວໂລ້ນນີ້ໄວ້ ພ້ອມທັງຊ່ວຍອຳນວຍຄວາມສະດວກໃນການເຂົ້າເຖິງເສັ້ນທາງໃນການຂຶ້ນໄປທ່ຽວຊົມພູຫົວໂລ້ນ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງຈາກວ່າ ການທ່ອງທ່ຽວເປັນຂະແໜງການທີ່ສາມາດສ້າງລາຍຮັບເປັນ ເງິນຕາຕ່າງປະເທດໄດ້ຈຳນວນມະຫາສານ, ເປັນແຫລ່ງລາຍຮັບທີ່ຍືນຍົງ, ສາມາດສ້າງວຽກເຮັດງານທຳ ແລະ ສ້າງລາຍຮັບໃຫ້ແກ່ປະຊາຊົນທ້ອງຖິ່ນໄດ້ເປັນຢ່າງດີ.

ພ້ອມນີ້, ທ່ານ ຫົວໜ້າພະແນກ ຖວທ ໄດ້ຮຽກຮ້ອງໃຫ້ເຈົ້າຂອງພື້ນທີ່ພູຫົວໂລ້ນ ໃຫ້ຊ່ວຍກັນປ້ອງກັນການບຸກລຸກ, ທໍາລາຍຄວາມສວຍສົດງົດງາມຂອງພູຫົວໂລ້ນ ແລະ ຫ້າມບໍ່ໃຫ້ມີການຈູດຫຍ້າ ທີ່ເປັນການທໍາລາຍຄວາມສວຍງາມຂອງທິວທັດທຳມະຊາດ, ຫ້າມດຸດ ຫລື ສ້າງເສັ້ນ ທາງຂຶ້ນໄປພູຫົວໂລ້ນ ແລະ ຊ່ວຍອຳນວຍຄວາມສະດວກ ໃນການເຂົ້າເຖິ່ງສະຖານທີ່ທ່ອງທ່ຽວໃຫ້ມີຄວາມສະດວກສະບາຍຂຶ້ນກ່ວາເກົ່າ.