ພຽງ 3 ວັນ ທົ່ວປະເທດມີຜູ້ເສຍຊີວິດຍ້ອນອຸບັດຕິເຫດ 11 ຄົນ ແລະ ບາດເຈັບ 104 ຄົນ

ຕາມການລາຍງານຂອງເຈົ້າໜ້າທີ່ກົມຕຳຫລວດຈະລາຈອນ ໃຫ້ຮູ້ວ່າ: ພຽງ 3 ວັນຜ່ານມາ, ວັນທີ 22-24 ຕຸລາ 2022 ທົ່ວປະເທດມີອຸບັດຕິເຫດເກີດຂຶ້ນທັງໝົດ 63 ຄັ້ງ, ພາຫະນະເປ່ເພທັງຫມົດ 97 ຄັນ, ຄົນໄດ້ຮັບບາດເຈັບ104 ຄົນ ແລະ ເສຍຊີວິດ 11 ຄົນ. ໃນນັ້ນແຂວງທີ່ເກີດອຸບັດຕິເຫດ ແລະ ມີຜູ້ເສຍຊີວິດຫລາຍກວ່າໝູ່ຄື: ນະຄອນຫລວງວຽງຈັນ ເກີດຂຶ້ນ 13 ຄັ້ງ ເສຍ ຊີວິດ 4 ຄົນ, ຫລວງພະບາງ ເກີດຂຶ້ນ 10 ຄັ້ງ ເສຍຊີວິດ 2 ຄົນ, ສາລະວັນ ເກີດຂຶ້ນ 2 ຄັ້ງ ເສຍຊີວິດ 2 ຄົນ, ຈໍາປາສັກ ເກີດຂຶ້ນ 5 ຄັ້ງ ເສຍຊີວິດ 1 ຄົນ ແລະ ແຂວງບໍລິຄໍາໄຊ ເກີດຂຶ້ນ 4 ຄັ້ງ ເສຍຊີວິດ 1 ຄົນ.

ສ່ວນແຂວງທີ່ເກີດອຸບັດຕິເຫດ ແຕ່ບໍ່ມີຜູ້ເສຍຊີວິດຄື: ແຂວງວຽງຈັນ ເກີດຂຶ້ນ 9 ຄັ້ງ, ສະຫວັນນະເຂດ 6 ຄັ້ງ, ໄຊຍະບູລີ, ອຸດົມໄຊ, ຊຽງຂວາງ, ຫລວງນ້ຳທາ ເກີດຂຶ້ນແຂວງລະ 2 ຄັ້ງ ແລະ ແຂວງໄຊສົມບູນ 1 ຄັ້ງ.

ສາເຫດການເກີດອຸບັດຕິເຫດສ່ວນໃຫຍ່ ແມ່ນດື່ມສິ່ງມຶນເມົາແລ້ວຂັບຂີ່ລົດ, ລະເມີດລະບຽບຈະລາຈອນ, ຂັບໄວເກີນກຳນົດ, ເຕັກນິກບໍ່ຮັບປະກັນ ແລະ ອື່ນໆ; ເພື່ອຫລຸດຜ່ອນອຸບັດຕິເຫດຂໍໃຫ້ຜູ້ໃຊ້ລົດໃຊ້ຖະໜົນຈົ່ງມີສະຕິການຂັບຂີ່ພາຫະນະ, ຊອກຮູ້ກົດລະບຽບຈະລາຈອນ, ສໍາຄັນເວລາດື່ມສິ່ງມຶນເມົາຫ້າມຂັບຂີ່ພາຫະນະ, ຄວນໃຊ້ຄວາມໄວຕາມກໍານົດ, ກ່ອນຈະປ່ຽນທິດທາງການສັນຈອນ ແລະ ຊິງຂຶ້ນໜ້າລົດຄັນອື່ນ ຕ້ອງຮັບປະ ກັນຄວາມປອດໄພ ພ້ອມທັງຂັບຂີ່ໂດຍການໃຫ້ກຽດກັນນຳອີກ.