ທ່ານ ຣິຊີ ຊູນັກ ໃຫ້ຄຳໝັ້ນພາອັງກິດສູ້ວິກິດເສດຖະກິດ ຟື້ນສັດທາການເມືອງ

ທ່ານ ຣິຊີ ຊູນັກ ນາຍົກລັດຖະມົນຕີອັງກິດ ກ່າວສູນທອນພົດຢູ່ໜ້າທຳນຽບນາຍົກລັດຖະມົນຕີ ເຮືອນໝາຍເລກ 10 ຖະໜົນດາວນິງ ຫລັງເຂົ້າເຝົ້າພະເຈົ້າຊາລທີ 3 ແລະ ໄດ້ຮັບການອະນຸຍາດໃຫ້ຈັດຕັ້ງລັດຖະບານຊຸດໃໝ່.

ໃນຕອນໜຶ່ງຂອງສູນທອນພົດ, ທ່ານ ຊູນັກ ໄດ້ກ່າວຍົກຍ້ອງທ່ານ ນາງ ລິຊ ທຣັສ ອະດີດນາຍົກລັດຖະມົນຕີ ເຖິງຄວາມຕັ້ງໃຈໃນການພັດທະນາຄວາມກ້າວໜ້າຂອງປະເທດ ເຊິ່ງເປັນເປົ້າໝາຍອັນສູງສົ່ງ ເຖິງວ່າຈະເກີດຄວາມຜິດພາດ ແຕ່ບໍ່ໄດ້ມາຈາກຈຸດປະສົງ ຫລື ເຈດຕະນາຮ້າຍ. ພ້ອມຢືນຢັນວ່າ: ທ່ານເຂົ້າມາຮັບຕຳແໜ່ງຫົວໜ້າພັກອະນຸລັກນິຍົມ ແລະ ນາຍົກລັດຖະມົນຕີຄົນໃໝ່ ເພື່ອແກ້ໄຂຄວາມຜິດພາດເຫລົ່ານັ້ນ.

ເສັ້ນທາງການເປັນຜູ້ນຳອັງກິດຂອງທ່ານ ຊູນັກ ຕໍ່ຈາກນີ້ ຖືກເບິ່ງວ່າເປັນເລື່ອງທ້າທາຍ ເພາະທ່ານເຂົ້າມາຮັບຕຳແໜ່ງໃນເວລາທີ່ອັງກິດກຳລັງຜະເຊີນວິກິດຫລາຍດ້ານ ເຊິ່ງທ່ານ ຊູນັກ ຍອມຮັບວ່າ: ສິ່ງເຫລົ່ານີ້ເປັນເລື່ອງຍາກລຳບາກ ແຕ່ທ່ານມຸ່ງໝັ້ນຈະນຳພາອັງກິດຜ່ານຜ່າວິກິດທັງໝົດ ໂດຍການສ້າງຄວາມໝັ້ນຄົງທາງເສດຖະກິດ ແລະ ພ້ອມຈະວາງເລື່ອງຂອງຄວາມເຊື່ອໝັ້ນເປັນວາລະສຳຄັນຂອງລັດຖະບານຊຸດນີ້.

ທັງນີ້, ທ່ານ ຣິຊີ ຊູນັກ ອາຍຸ 42 ປີ ກ້າວຂຶ້ນເປັນນາຍົກລັດຖະມົນຕີຄົນໃໝ່ຂອງອັງກິດ ຕໍ່ຈາກທ່ານ ນາງ ລິຊ ທຣັສ ທີ່ປະກາດລາອອກຈາກແຮງກົດດັນກ່ຽວກັບນະໂຍບາຍເສດຖະກິດ ຫລັງດຳລົງຕຳແໜ່ງພຽງ 45 ວັນ ເຊິ່ງເປັນການດຳລົງຕຳແໜ່ງສັ້ນທີ່ສຸດໃນປະຫວັດສາດ.

ໂດຍທ່ານ ຊູນັກ ຖືເປັນນາຍົກລັດຖະມົນຕີຄົນທີ 2 ໃນສະໄໝຂອງສົມເດັດພະເຈົ້າຊາລທີ 3 ແລະ ເປັນຜູ້ນຳຄົນທີ 3 ຂອງອັງກິດໃນໄລຍະເວລາພຽງ 2 ເດືອນ. ອີກທັງຍັງເປັນນາຍົກລັດຖະມົນຕີອັງກິດທີ່ມີເຊື້ອສາຍອາຊີຄົນທຳອິດ ແລະ ເປັນຜູ້ນຳທີ່ມີອາຍຸນ້ອຍທີ່ສຸດໃນປະຫວັດສາດການເມືອງອັງກິດສະໄໝໃໝ່.