ຈີນສັ່ງລັອກດາວເຂດຮັ່ນຢາງໃນເມືອງອູ່ຮັ່ນ ຫລັງພົບຜູ້ຕິດເຊື້ອໂຄວິດ 18 ຄົນ
ອູ່ຮັ່ນ ເຊິ່ງເປັນເມືອງຫລວງຂອງມົນທົນຫູເປີຍໃນປະເທດຈີນ ປະກາດລັອກດາວເຂດຮັ່ນຢາງ ເຊິ່ງຕັ້ງຢູ່ໃຈກາງເມືອງ ຫລັງພົບຜູ້ຕິດເຊື້ອໂຄວິດ-19 ຈຳນວນຫລາຍຄົນ.
ສຳນັກຂ່າວບລູມເບິກລາຍງານວ່າ: ເທສະບານເມືອງອູ່ຮັ່ນສັ່ງໃຫ້ປະຊາຊົນໃນເຂດຮັ່ນຢາງປະມານ 900.000 ຄົນຢູ່ພາຍໃນເຮືອນນັບແຕ່ວັນທີ 26-30 ຕຸລາ ແລະ ສັ່ງປິດທຸລະກິດທັງໝົດທີ່ບໍ່ຈຳເປັນ ຍົກເວັ້ນຊຸບເປີມາເກັດ ແລະ ຮ້ານຂາຍຢາທີ່ໄດ້ຮັບອະນຸຍາດໃຫ້ດຳເນີນງານຕໍ່ໄປໄດ້.
ຊາວຈີນຈຳນວນໜຶ່ງໄດ້ໂພສຮູບໃນໂຊຊຽວມີເດຍ ເຊິ່ງສະແດງໃຫ້ເຫັນວ່າ: ເຈົ້າໜ້າທີ່ໄດ້ວາງສິ່ງກີດຂວາງຫລາຍຈຸດໃນເຂດຮັ່ນຢາງ ເພື່ອປ້ອງກັນບໍ່ໃຫ້ປະຊາຊົນອອກນອກເຂດ ໃນຂະນະທີ່ມາດຕະການຫ້າມເດີນທາງເລີ່ມມີຜົນບັງຄັບໃຊ້.
ເທສະບານເມືອງອູ່ຮັ່ນລາຍງານພົບຜູ້ຕິດເຊື້ອໂຄວິດ-19 ໃນເຂດຮັ່ນຢາງ 18 ຄົນ ໃນວັນທີ 25 ຕຸລາ ເຊິ່ງເປັນເຫດໃຫ້ອູ່ຮັ່ນຕັດສິນໃຈສັ່ງລັອກດາວພື້ນທີ່ດັ່ງກ່າວ ໂດຍຕົວເລກດັ່ງກ່າວຖືເປັນຈຳນວນໜ້ອຍເມື່ອທຽບໃສ່ພື້ນທີ່ອື່ນໆທົ່ວໂລກທີ່ເລີ່ມຫັນມາໃຊ້ຊີວິດຮ່ວມກັບໂຄວິດ-19 ສວນທາງກັບຈີນເຊິ່ງຕັ້ງເປົ້າກຳຈັດພະຍາດໂຄວິດ-19 ໃຫ້ໝົດໄປຕາມນະໂຍບາຍໂຄວິດເປັນສູນຂອງປະທານປະເທດ ສີຈິ້ນຜິງ.
