IEA ກ່າວວ່າ ປະເທດກຳລັງພັດທະນາຈະໄດ້ຮັບ ຜົນກະທົບຫລາຍທີ່ສຸດຈາກວິກິດພະລັງງານ
ທ່ານ ຟາຕີ ໄບຣອລ ຜູ້ອຳນວຍການບໍລິຫານຂອງສຳນັກງານພະລັງງານສາກົນ (IEA) ອອກມາເຕືອນວ່າ: ກຸ່ມປະເທດເກີດໃໝ່ ແລະ ປະເທດກຳລັງພັດທະນາເປັນກຸ່ມທີ່ຈະໄດ້ຮັບຜົນກະທົບຫລາຍທີ່ສຸດຈາກລາຄາພະລັງງານທີ່ເພີ່ມສູງຂຶ້ນ.
ທ່ານ ໄບຣອລ ໃຫ້ສຳພາດຕໍ່ສຳນັກຂ່າວ CNBC ໃນວັນທີ 25 ຕຸລາວ່າ: “ອາເມລິກາບໍ່ແມ່ນປະເທດທີ່ຈະໄດ້ຮັບຜົນກະທົບຫລາຍທີ່ສຸດຈາກລາຄາພະລັງງານໃນລະດັບສູງ, ແຕ່ເປັນກຸ່ມປະເທດທີ່ນຳເຂົ້ານ້ຳມັນໃນອາຟຣິກາ, ອາຊີ ແລະ ອາເມລິກາລາຕິນ ເພາະລາຄານຳເຂົ້າສູງຂຶ້ນ ແລະ ສະກຸນເງິນອ່ອນຄ່າລົງ”.
ໃນເດືອນພຶດສະພາຜ່ານມາ, ກອງທຶນການເງິນສາກົນ (IMF) ໄດ້ປັບຫລຸດຄາດຄະເນການເຕີບໃຫຍ່ທາງເສດຖະກິດສຳລັບກຸ່ມປະເທດທີ່ນຳເຂົ້ານ້ຳມັນ ໂດຍຄາດວ່າ: ລາຄາພະລັງງານທີ່ສູງຂຶ້ນຈະເພີ່ມແຮງກົດດັນໃຫ້ແກ່ຄວາມທ້າທາຍທາງເສດຖະກິດທີ່ປະເທດເຫລົ່ານີ້ກຳລັງຜະເຊີນຢູ່.
IMF ລະບຸວ່າ: “ລາຄາສິນຄ້າໂພກກະພັນທີ່ສູງຂຶ້ນຈະໄປຊ້ຳຕື່ມບັນຫາທີ່ເກີດຂຶ້ນຈາກເງິນເຟີ້ ແລະ ໜີ້ທີ່ສູງຂຶ້ນ ລວມທັງສະພາບການເງິນໂລກທີ່ເຄັ່ງຕຶງ, ຄວາມຄືບໜ້າທີ່ບໍ່ຕໍ່ເນື່ອງໃນການສັກວັກຊີນປ້ອງກັນພະຍາດໂຄວິດ-19 ແລະ ຄວາມບອບບາງ ແລະ ຂັດແຍ່ງໃນບາງປະເທດ”.
ສ່ວນທາງເອີຣົບກຳລັງປະສົບບັນຫາການຂາດເຂີນແກັສ ເນື່ອງຈາກຣັດເຊຍຫລຸດການສົ່ງແກັສ ເຊິ່ງເຮັດໃຫ້ຫລາຍປະເທດຜະເຊີນວິກິດພະລັງງານກ່ອນເຂົ້າສູ່ລະດູໜາວປີນີ້.
“ພວກເຮົາຢູ່ທ່າມກາງວິກິດພະລັງງານໂລກຢ່າງແທ້ຈິງເປັນຄັ້ງທຳອິດ, ໂລກຂອງພວກເຮົາບໍ່ເຄີຍຜະເຊີນວິກິດພະລັງງານທີ່ຮຸນແຮງ ແລະ ສັບຊ້ອນແບບນີ້ມາກ່ອນ” ທ່ານ ໄບຣອລ ກ່າວ. ຕະຫລາດນ້ຳມັນຈະຍັງຜັນຜວນຕໍ່ໄປຕາບເທົ່າສົງຄາມຣັດເຊຍ-ອູແກຣນຍັງດຳເນີນຢູ່.
