ກຳປູເຈຍ ປັບປຸງ 4  ສັງວຽນບານເຕະ ຊີເກມ ເປັນຫຍ້າແທ້ ຄວາມຈຸ 3,5 ຫມື່ນຄົນ

ຄວາມເຄື່ອນໄຫວການຈັດມະຫະກຳກິລາ ຊີເກມ ຄັ້ງທີ 32 ທີ່ປະເທດກຳປູເຈຍ ເປັນເຈົ້າພາບລະຫວ່າງວັນທີ 5-17 ພຶດສະພາ 2023 ຫລ້າສຸດ ທ່ານ ວັດ ຈຳເຣີນ ເລຂາທິການຄະນະກຳມະການໂອລິມປິກກຳປູເຈຍ ໃນຖານະປະທານຝ່າຍພິທີເປີດ-ປິດ ກິລາຊີເກມ ຄັ້ງທີ 32 ເຜີຍຜ່ານສື່ກຳປູເຈຍວ່າ ຂະນະນີ້ກຳປູເຈຍ ພວມດຳເນີນປັບປຸງສະໜາມຕ່າງໆທີ່ຈະໃຊ້ເປັນສັງວຽນແຂ່ງຂັນຊີເກມ ຄັ້ງທີ 32 ໂດຍມີກຳນົດສຳເລັດພາຍໃນເດືອນມັງກອນ 2023.

ທ່ານ ວັດ ເປີດເຜີຍວ່າ : “ ສຳລັບສະໜາມແຂ່ງຂັນບານເຕະຊາຍ ແລະ ບານຍິງ ຈະໃຊ້ທັງຫມົດ 4 ສະໜາມນຳກັນ ປະກອບດ້ວຍ ສະໜາມກິລາແຫ່ງຊາດກຳປູເຈຍມໍລະດົກເຕໂຊ, ສະໜາມກິລາໂອລິມປິກແຫ່ງຊາດ, ປຣິນ ສະເຕດຽມ ຂອງສະໂມສອນວິສາຂາ ແລະ ສະໜາມກິລາກອງທັບກຳປູເຈຍ ເຊິ່ງຄະນະກຳມະການພວມຊ້ອມແຊມສະໜາມກິລາໂອລິມປິກແຫ່ງຊາດ ລວມເຖິງສະ ໜາມອື່ນໆໃຫ້ໄດ້ຕາມມາດຕະຖານສາກົນຂອງຟີຟາ ສຳລັບຊີເກມ 2023 ໂດຍຈະປ່ຽນຈາກສະໜາມຫຍ້າທຽມ ເປັນສະໜາມ ຫຍ້າແທ້ ລວມເຖິງປັບປຸງໃຫ້ບັນຈຸໄດ້ເຖິງ 35,000 ບ່ອນນັ່ງ ແລະ ລະບົບໄຟຕາມມາດຕະຖານ ”.

ກ່ອນໜ້ານີ້ ກຳປູເຈຍ ຫາກໍຈັດພິທີນັບຖອຍຫລັງ 200 ມື້ ເຂົ້າສູ່ຊີເກມ ໄປເມື່ອວັນທີ 17 ຕຸລາທີ່ຜ່ານມາ ໂດຍຈັດຊີງໄຊທັງຫມົດ 37 ຊະນິດກິລາ 608 ຫລຽນຄຳ.