ຜູ້ຕິດຢາເສບຕິດຢູ່ເມືອງສິງແຂວງຫລວງນໍ້າທາກວ່າ 900 ຄົນໄດ້ຮັບການບຳບັດ

ແຫລ່ງຂ່າວຈາກ ແຂວງຫລວງນໍ້າທາ ລາຍງານວ່າ: ແຕ່ວັນທີ 4-19 ຕຸລາ 2022 ສູນບໍາບັດຟື້ນຟູຜູ້ຕິດຢາເສບຕິດເມືອງສິງ ໄດ້ສໍາເລັດການບໍາບັດຜູ້ຕິດຢາເສບຕິດ 918 ຄົນ, ຍິງ 122 ຄົນຢູ່ 44 ບ້ານຈາກເປົ້າໝາຍທັງໝົດ 1.145 ຄົນ, ຍິງ 152 ຄົນ. ຂະນະທີ່ທ່ານ ອ່ອນຈັນ ຄໍາພາວົງ ຮອງເຈົ້າແຂວງໆຫລວງນໍ້າທາ ໄດ້ຊົມ ເຊີຍອົງການປົກຄອງເມືອງ, ບ້ານ ແລະ ຄະນະກໍາມະການຕ້ານ ແລະ ສະກັດກັ້ນບັນຫາຢາເສບຕິດເມືອງ ທີ່ໄດ້ເອົາໃຈໃສ່ຈັດຕັ້ງປະຕິບັດ 2 ວາລະແຫ່ງຊາດປາກົດຜົນເປັນເປັນຈິງ ໂດຍສະເພາະເມືອງສິງທີ່ປະສົບຜົນສໍາເລັດ ແລະ ກາຍເປັນແບບຢ່າງໃຫ້ແຂວງກໍຄື ປະເທດລາວ ແນວໃດກໍດີຂໍໃຫ້ສືບຕໍ່ແກ້ໄຂຜູ້ທີ່ຍັງຄ້າງຄາໃຫ້ສໍາເລັດ.

ທ່ານ ສົມພັດ ສໍຈໍາປາ ກອງເລຂາຕ້ານ ແລະ ສະກັດກັ້ນ, ແກ້ໄຂບັນຫາເສບຕິດເມືອງສິງລາຍງານວ່າ: ແຂວງຫລວງນໍ້າທາ ມີຜູ້ຕິດຢາເສບຕິດ 6.189 ຄົນ, ຍິງ 907 ຄົນ. ສະເພາະເມືອງສິງ ມີ 2.419 ຄົນ, ຍິງ 514 ຄົນ ໂດຍຜ່ານມາໄດ້ບໍາບັດ 1,121 ຄົນ, ຍິງ 178 ຄົນ ກວມເອົາ 46,5%ຢູ່ 3 ຈຸດ ຄື ຈຸດບ້ານຫ້ວຍລອງໃໝ່, ບ້ານຫ້ວຍຫອຍ ແລະ ຈຸດບ້ານຫ້ວຍແຂມ; ການແກ້ໄຂບັນຫາຢາເສບຕິດເປັນການປະຕິບັດຕາມ 2 ວາລະແຫ່ງຊາດທີ່ລັດຖະບານວາງອອກ ເຮັດໃຫ້ເມືອງສິງ ກໍຄື ທົ່ວປະເທດລາວ ປອດຜູ້ຕິດຢາເສບຕິດໃນປີ 2023.