ມຸນ ແຈ ອິນ ຊີວິດລູກຜູ້ລີ້ໄພ ສູ່ຕໍາແໜ່ງຜູ້ນໍາປະເທດ ສ ເກົາຫຼີ
ສິ້ນສຸດຄວາມວຸ້ນວາຍທາງການເມືອງທີ່ຍືດເຍື່ອມາດົນ ພາຍຫຼັງ ສ.ເກົາຫຼີ ໄດ້ຜູ້ນໍາຄົນໃໝ່ຢ່າງເປັນທາງການແລ້ວ ຈາກການເລືອກຕັ້ງເມື່ອວັນ 9 ພຶດສະພາ 2017 ເຊິ່ງທ່ານ ມຸນ ແຈ ອິນ ອາຍຸ 64 ປີ ຈາກຝ່າຍເສລີນິຍົມ ຄືຜູ້ທີ່ໄດ້ຮັບຄະແນນສຽງສ່ວນຫລາຍໃຫ້ຂຶ້ນເປັນປະທານາທິບໍດີຄົນໃຫມ່ຂອງປະເທດ ໂດຍໄດ້ເຂົ້າພິທີສາບານຕົນເປັນປະທານາທິບໍດີ ສ.ເກົາຫຼີ ທີ່ອາຄານລັດຖະສະພາ ໃນນະຄອນຫລວງເຊອຸນ ໃນວັນທີ 10 ພຶດສະພາ 2017 ພ້ອມສານຕໍ່ພາລະກິດໃນການແກ້ໄຂບັນຫາເສດຖະກິດຂອງປະເທດ ລວມທັງດໍາເນີນເລື່ອງການພົວພັນກັບປະເທດຕ່າງໆ ເຊັ່ນ: ອາເມລິກາ, ຈີນ ແລະ ສປປ ເກົາຫຼີ ທ່າມກາງສະຖານະການຄວາມເຄັ່ງຕຶງຢູ່ແຫລມເກົາຫລີທີ່ເພີ່ມຂຶ້ນຕໍ່ເນື່ອງ.
ຈາກການກ້າວມາເປັນຜູ້ນໍາປະເທດຄົນໃຫມ່ ເຮັດໃຫ້ທ່ານ ມຸນ ແຈ ອິນ ໄດ້ຮັບຄວາມສົນໃຈຈາກສັງຄົມໂລກ ແລະ ຕ່າງກໍຢາກຮູ້ວ່າທ່ານ ມຸນ ແຈ ອິນ ເປັນໃຜ, ມາຈາກໃສ ເຊິ່ງບອກໄດ້ເລີຍວ່າປະຫວັດຂອງ ທ່ານ ມຸນ ແຈ ອິນ ຄົນນີ້ບໍ່ທໍາະດາ.
ຈາກລູກຜູ້ລີ້ໄພສູ່ຕໍາແໜ່ງປະທານາທິບໍດີ ມຸນ ແຈ ອິນ ເກີດເມື່ອວັນທີ 24 ມັງກອນ 1953 ຢູ່ເກາະຄໍເຈ ເກາະນ້ອຍໆທາງຕອນໃຕ້ຂອງປະເທດ ສ.ເກົາຫຼີ ກ່ອນຈະຍ້າຍມາອາໄສໃນເມືອງປູຊານ. ພໍ່ແມ່ຂອງທ່ານ ມຸມ ແຈ ອິນ ເປັນໜຶ່ງໃນກຸ່ມຜູ້ລີ້ໄພຊາວ ສປປ ເກົາຫຼີ ທີ່ເດີນທາງມາເລີ່ມຕົ້ນຊີວິດໃຫມ່ຢູ່ ສ.ເກົາຫຼີ ໃນຊ່ວງສົງຄາມ ສປປ ເກົາຫຼີ. ຊີວິດໃນໄວເດັກຂອງທ່ານ ມຸນ ແຈ ອິນ ເປັນໄປດ້ວຍຄວາມລໍາບາກ ພໍ່ເປັນກຳມະກອນໃນຄ່າຍກັກເຊຍເລິກ ສ່ວນແມ່ເປັນແມ່ຄ້າຂາຍໄຂ່ທີ່ຕ້ອງເອົາລູກຊາຍທີ່ຍັງນ້ອຍໆໄປເຮັດວຽກນໍາ, ເຖິງວ່າຈະມີຖານະທຸກຍາກ ທ່ານ ມຸນ ແຈ ອິນ ກໍຍັງໄຝ່ຮຽນຈົນສາມາດເຂົ້າສຶກສາຕໍ່ດ້ານນິຕິສາດ ຢູ່ມະຫາວິທະຍາໄລໃນນະຄອນຫລວງເຊອຸນໄດ້ຈົນສໍາເລັດ ເມື່ອປີ 1972.
ແນວໃດກໍຕາມ, ຫຼັງຈາກເຂົ້າຮຽນໄດ້ບໍ່ດົນ ທ່ານ ມຸນ ແຈ ອິນ ເຊິ່ງເປັນຜູ້ນໍານັກສຶກສາເຂົ້າຮ່ວມປະທ້ວງການປົກຄອງຢ່າງຜະເດັດການຂອງລັດຖະບານ ປາຣກ ຈອງ ຮີ (Park Chung-Hee) ແລະ ໄດ້ຖືກຈັບກຸມ ແລະ ໃຊ້ຊີວິດຢູ່ໃນຄຸກໄລຍະໜຶ່ງ ກ່ອນຈະໄດ້ຮັບການປ່ອຍຕົວ ແລະ ກັບມາສຶກສາດ້ານນິຕິສາດຈົນຈົບ ແຕ່ເນື່ອງຈາກປະຫວັດເຄີຍຕ້ອງໂທດຈາກການຕໍ່ຕ້ານລັດຖະບານ ເຮັດໃຫ້ທ່ານ ມຸນ ແຈ ອິນ ໝົດໂອກາດທີ່ຈະເຮັດວຽກຢູ່ສານ.
ຕໍ່ມາທ່ານ ມຸນ ແຈ ອິນ ຕັດສິນໃຈກັບມາເຮັດວຽກເປັນທະນາຍໃນເມືອງປູຊານ ແລະ ໄດ້ຮ່ວມກັບສະຫາຍ ໂນ ມູ ຍອນ ກ່ອນຕັ້ງບໍລິສັດທະນາຍຄວາມຂຶ້ນ ມຸ່ງເຮັດວຽກເພື່ອຊ່ວຍເຫຼືອດ້ານສິດທິມະນຸດແກ່ປະຊາຊົນ ແລະ ຊົນຊັ້ນແຮງງານ ທັງເຄີຍຮ່ວມກັບທ່ານ ໂນ ມູ ຍອນ ອອກມາເຄື່ອນໄຫວຮຽກຮ້ອງປະຊາທິປະໄຕຢູ່ ສ.ເກົາຫຼີ ຈົນນໍາພາປະເທດເກີດການເລືອກຕັ້ງໃນລະບອບປະຊາທິປະໄຕໄດ້ສໍາເລັດໃນປີ 1987.
ຈາກທະນາຍຄວາມຢູ່ປູຊານ ທ່ານ ມຸນ ແຈ ອິນ ໄດ້ມີໂອກາດສໍາຜັດຊີວິດໃນດ້ານການເມືອງຄັ້ງທໍາອິດພາຍຫຼັງທ່ານ ໂນ ມູ ຮຍອນ ສ່ຽວຂອງທ່ານເລືອກຈະມຸ່ງໜ້າເຂົ້າຫຼິ້ນການເມືອງ ແລະ ໄດ້ຮັບເລືອກຕັ້ງໃຫ້ເປັນປະທານາທິບໍດີ ສ.ເກົາຫຼີ ໃນປີ 2003 ໂດຍທ່ານ ມຸນ ແຈ ອິນ ໄດ້ເຮັດໜ້າທີ່ເປັນທີ່ປຶກສາຄົນສໍາຄັນຂອງປະທານາທິບໍດີດ້ວຍຕໍາແໜ່ງເລຂາທິການປະທານາທິບໍດີຝ່າຍກິດຈະການພົນລະເຮືອນ.
ລະຫວ່າງນັ້ນທ່ານ ມຸນ ແຈ ອິນ ໄດ້ຖືກນັກການເມືອງບາງຄົນວິຈານວ່າເປັນນັກການເມືອງຂີ້ອາຍ ທີ່ເບິ່ງແລ້ວບໍ່ເໝາະສົມຕໍ່ການເຮັດວຽກ ເຊິ່ງຕໍ່ມາທ່ານ ມຸນ ແຈ ອິນ ກໍໄດ້ຍອມຮັບວ່າທ່ານຮູ້ສຶກອຶດອັດ ຄິດວ່າວຽກທີ່ເຮັດຢູ່ນັ້ນບໍ່ເໝາະກັບທ່ານ ແລະ ປຽບວ່າເໜືອນຄົນທີ່ນຸ່ງເຄື່ອງບໍ່ພໍດີກັບຕົວເອງ ມັນເຮັດໃຫ້ທ່ານຄິດວ່າຕົວເອງຄວນກັບໄປເຮັດວຽກເປັນທະນາຍຄວາມຄືເກົ່າ.
ໃນໄລຍະເວລານັ້ນທ່ານ ມຸມ ແຈ ອິນ ໄດ້ເຮັດວຽກຄຽງຂ້າງສະຫາຍເພື່ອຮັບມືກັບບັນຫາຕ່າງໆ ລວມທັງຮັບຜິດຊອບວຽກດ້ານກວາດລ້າງການສຸຈະລິດໃນລັດຖະບານ ຈົນໃນທີ່ສຸດໜ້າທີ່ໃນລັດຖະບານຂອງທ່ານກໍຈົບລົງ ເມື່ອປະທານາທິບໍດີ ໂນ ມູ ຍອນ ຕັດສິນໃຈຈົບຊີວິດການເມືອງຂອງຕົນເອງໃນປີ 2009 ພາຍຫຼັງມີເລື່ອງບໍ່ດີ ແລະ ຖືກສອບສວນເລື່ອງການຮັບສິນບົນ.
ພາຍຫຼັງການເສຍຊີວິດຂອງສະຫາຍເກົ່າ, ທ່ານ ມຸນ ແຈ ອິນ ກໍໄດ້ກາຍມາເປັນຄວາມຫວັງໃຫມ່. ແນວໃດກໍຕາມ ທ່ານຈະຕັດສິນໃຈເດີນໜ້າດ້ານການເມືອງຢ່າງຈິງຈັງ ແລະ ເຂົ້າຮັບສະໝັກເລືອກຕັ້ງເປັນປະທານາທິບໍດີ ສ.ເກົາຫຼີ ໃນປີ 2012 ແຕ່ເສຍໄຊໃຫ້ນາງ ປາຣກ ກິນ ເຮ ເຊິ່ງເປັນທາຍາດຂອງ ປາຣກ ຈອງ ຮີ. ແນວໃດກໍຕາມ ພາຍຫຼັງທີ່ນາງ ປາຣກ ກິນ ເຮ ມີອັນຕ້ອງພົ້ນຕໍາແໜ່ງປະທານາທິບໍດີ ເນື່ອງຈາກເລື່ອງທີ່ບໍ່ດີ ໃນທີ່ສຸດທ່ານ ມຸມ ແຈ ອິນ ເຊິ່ງເປັນໜຶ່ງໃນຜູ້ນໍາໃຫ້ປະເທດກ້າວເຂົ້າສູ່ຄວາມເປັນປະຊາທິປະໄຕ ກໍໄດ້ກາຍມາເປັນຜູ້ນໍາຂອງປະເທດຢ່າງເຕັມພາກພູມ.
ທ່ານ ມຸນ ແຈ ອິນ ໄດ້ໃຫ້ຄໍາສັນຍາຈະແກ້ໄຂບັນຫາຮີບດ່ວນ ເລື່ອງຄວາມທະເຍີທະຍານດ້ານການໃຊ້ອາວຸດນິວເຄຼຍຂອງ ສປປ ເກົາຫຼີ ແລະ ຫວັງຈະຊ່ວຍຫລຸດຜ່ອນຄວາມກັງວົນຕ່າງໆໃຫ້ກັບຈີນ ແລະ ອາເມລິກາ ໂດຍຫຼັງຈາກໄດ້ຮັບໄຊຊະນະໃນການເລືອກຕັ້ງ ທ່ານ ໂດນັນ ທຣໍາ ປະທານາທິບໍດີອາເມລິກາ ໄດ້ໂທມາສະແດງຄວາມຍິນດີກັບໄຊຊະນະໃນການເລືອກຕັ້ງຂອງທ່ານ ມຸນ ແຈ ອິນ ແລະ ເຫັນພ້ອມທີ່ຈະຮ່ວມມືກັນແກ້ໄຂບັນຫາ ສປປ ເກົາຫຼີ ລວມທັງທ່ານ ທຣໍາ ຍັງໄດ້ເຊີນເຂົ້າຢ້ຽມຢາມທໍານຽບຂາວນຳອີກ ຖືວ່າເປັນຈຸດເລີ່ມຕົ້ນອັນດີຂອງການເຮັດໜ້າທີ່ຜູ້ນໍາປະເທດໃນສະພາບກົດດັນຢ່າງເຖິງຂີດສຸດ.
ທັງນີ້ທ່ານ ມຸມ ແຈ ອິນ ຍັງປະກາດຈຸດຢືນຈະແຈ້ງເຖິງການບໍລິຫານປະເທດຢ່າງໂປ່ງໃສ ຊີ້ວ່າເມື່ອເຂົ້າມາຮັບຕໍາແໜ່ງມືເປົ່າກໍຈະຂໍກັບອອກໄປມືເປົ່າເຊັ່ນກັນ.
