ກຽມສະຫລອງ ວັນອາຫານໂລກ ວັນ​ສາກົນ ​ແລະ ສັບປະດາ​ແຫ່ງ​ຊາດ ​ເພື່ອ​ລຶບ​ລ້າງ​ຄວາມທຸກ​ຍາກ

ວັນທີ 21 ຕຸລາ 2022 ທີ່ຜ່ານມາ ທ່ານ ເພັດ ພົມພີພັກ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຖະແຫຼງຂ່າວເນື່ອງໃນໂອກາດວັນອາຫານໂລກ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ປະຈໍາປີ 2022 ວ່າ: ຄືດັ່ງທີ່ຮູ້ນໍາກັນແລ້ວວ່າຄວາມທຸກຍາກ ແລະ ໄພອຶດຫິວ ໄດ້ເປັນບັນຫາໃຫຍ່ຂອງໂລກມາເປັນເວລາຫຼາຍສະຕະວັດແລ້ວ ຕະຫຼອດໄລຍະຜ່ານມາ ໂລກຂອງພວກເຮົາຍັງໄດ້ພົບກັບຫຼາຍໆບັນຫາຄວາມຫຍຸ້ງຍາກ ແລະ ສິ່ງທ້າທາຍຕ່າງໆເຊັ່ນ: ການປ່ຽນແປງທາງດ້ານດິນຟ້າອາກາດຂອງໂລກ ໄພພິບັດທາງທໍາມະຊາດ ການລະບາດຂອງພະຍາດ ຄວາມວຸ່ນວາຍທາງສັງຄົມ ເສິກສົງຄາມ ການລະບາດໂຄວິດ-19 ການເພີ່ມຂຶ້ນຂອງລາຄາສິນຄ້າ ນໍ້າມັນ ໄດ້ສືບຕໍ່ສົ່ງຜົນກະທົບໃຫ້ແກ່ປະຊາກອນໂລກເກືອບ 828 ລ້ານຄົນຂາດສານອາຫານ ແລະ ປະສົບກັບຄວາມອຶດຫິວ ເຊິ່ງມີທ່າອ່ຽງເພີ່ມຂຶ້ນໃນແຕ່ລະປີ ປາກົດການດັ່ງກ່າວ ໄດ້ເປັນການເພີ່ມທະວີໃຫ້ມີຄວາມທຸກຍາກ ແລະ ໄພອຶດຫິວຫຼາຍຂຶ້ນ ດັ່ງນັ້ນ ອົງການອາຫານ ແລະ ການກະເສດຂອງສະຫະປະຊາຊາດ ໄດ້ກຳນົດເອົາວັນທີ 16 ຕຸລາ ຂອງທຸກປີ ເປັນວັນອາຫານໂລກ ເລີ່ມແຕ່ ປີ 1980 ເປັນຕົ້ນມາ ແລະ ໄລຍະຕໍ່ມາສະຫະປະຊາຊາດ ໄດ້ກຳນົດເອົາວັນທີ 17 ຕຸລາ ເປັນວັນສາກົນເພື່ອລຶບລ້າງຄວາມທຸກຍາກ ໂດຍເລີ່ມແຕ່ ປີ 1992 ເປັນຕົ້ນມາ ມາຮອດ ປີ 2003 ລັດຖະບານ ແຫ່ງ ສປປ ລາວ ໄດ້ກຳນົດເອົາວັນທີ 17-24 ຕຸລາ ເປັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກ.

ການໂຮມຊຸມນຸມ 2 ວັນດັ່ງກ່າວ ມີຄວາມໝາຍສໍາຄັນຫຼາຍ ບໍ່ສະເພາະແຕ່ແນໃສ່ປູກຈິດສຳນຶກ ແລະ ສ້າງຄວາມຮັບຮູ້ໃຫ້ປະຊາຊົນໃນທົ່ວໂລກ ໄດ້ເຂົ້າໃຈເຖິງຄວາມທຸກຍາກ ແລະ ໄພອຶດຫິວ ເຊິ່ງບໍ່ແມ່ນບາບກຳທີ່ເທວະດາຟ້າແຖນເປັນຜູ້ກຳນົດໃຫ້ ແຕ່ມັນແມ່ນປາກົດການທາງສັງຄົມທີ່ສາມາດລຶບລ້າງໃຫ້ໝົດໄປໄດ້ ແລະ ປຸກລະດົມປະຊາຊາດ ໂດຍສະເພາະ ຜູ້ທຸກຍາກ ອຶດຫິວ ໃຫ້ຮູ້ສຶກວ່າຕົນເອງມີກຽດສັກສີຂອງຄວາມເປັນມະນຸດ ມີເຫື່ອແຮງສະຕິປັນຍາຄືຄົນທົ່ວໄປເທົ່ານັ້ນ ແຕ່ຍັງເປັນການເຮັດໃຫ້ເຂົາເຈົ້າມີກໍາລັງໃຈ ມີຄວາມກ້າຫານ ແລະ ມີຄວາມສາມາດບືນຕົວອອກຈາກຄວາມທຸກຍາກ ແລະ ໄພອຶດຫິວໄດ້ ພ້ອມນັ້ນ ກໍຖືໂອກາດນີ້ ເປັນການສ້າງຄວາມຮັບຮູ້ ແລະ ຮຽກຮ້ອງໃຫ້ທຸກພາກສ່ວນຈົ່ງມີສ່ວນຮ່ວມໃນການຜະລິດສະບຽງອາຫານໃຫ້ມີປະສິດທິພາບ ແລະ ຍືນຍົງ.

ການສະເຫຼີມສະຫຼອງວັນອາຫານໂລກ ຄົບຮອບ 42 ປີ ແລະ ການລະນຶກວັນສາກົນ ເພື່ອລຶບລ້າງຄວາມທຸກຍາກຄົບຮອບ 30 ປີ ໃນປີ 2022 ແມ່ນຢູ່ໃນເງື່ອນໄຂທີ່ທົ່ວພັກທົ່ວລັດ ທົ່ວສັງຄົມ ພວມຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ IX ແລະ ກຳລັງຜັນຂະຫຍາຍຈັດຕັ້ງປະຕິບັດເນື້ອໃນກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແລະ ວຽກງານ 3 ສ້າງທີ່ຫາກໍ່ຜ່ານມານີ້ ດັ່ງນັ້ນ ໃນໂອກາດທີ່ມີຄວາມໝາຍສໍາຄັນນີ້ ກະຊວງກະສິກໍາ ແລະ ປ່າໄມ້ ຮ່ວມກັບອົງການອາຫານ ແລະ ການກະເສດຈະໄດ້ຈັດງານ ເພື່ອສະເຫຼີມສະຫຼອງ ແລະ ລະນຶກ 2 ວັນດັ່ງກ່າວ ພາຍໃຕ້ຄໍາຂວັນທີ່ວ່າ:“ພວກເຮົາພ້ອມກັນກ້າວໄປ ເພື່ອສົ່ງເສີມການຜະລິດ ໂພຊະນາການ ສິ່ງແວດລ້ອມ ແລະ ຊີວິດການເປັນຢູ່ທີ່ດີກວ່າເກົ່າ ສໍາລັບທຸກຄົນ” ແລະ ຄໍາຂວັນທີ່ວ່າ:“ກຽດສັກສີເພື່ອທຸກຄົນ ໃນການປະຕິບັດຕົວຈິງ ຄວາມໝາຍໝັ້ນທີ່ພວກເຮົາໃຫ້ຮ່ວມກັນ ເພື່ອຄວາມຍຸຕິທໍາທາງສັງຄົມ ສັນຕິພາບ ແລະ ໂລກຂອງພວກເຮົາ”.

ພິທີໂຮມຊຸມນຸມໃຫຍ່ຂອງ 2 ວັນດັ່ງກ່າວ ຈະໄດ້ຈັດຂຶ້ນໃນພາກເຊົ້າຂອງວັນທີ 24 ຕຸລາ 2022 ສ່ວນພາກບ່າຍຈະມີປາຖະກະຖາ ແລະ ໃນວັນທີ 25 ຈະມີການຈັດສຳມະນາກ່ຽວກັບ 2 ວັນດັ່ງກ່າວ ພ້ອມນັ້ນ ຍັງຈະໄດ້ມີການຈັດງານວາງສະແດງສິນຄ້າ ແລະ ຈຳໜ່າຍສິນຄ້າກະສິກຳ ເຊິ່ງເລີ່ມແຕ່ວັນທີ 24 ຫາ 28 ຕຸລາ 2022 ທີ່ສະຖາບັນຄົ້ນຄວ້າກະສິກຳ ປ່າໄມ້ ແລະ ພັດທະນາຊົນນະບົດ (ເຂດດົງໂດກ) ສະນັ້ນຂໍເຊີນຊວນບັນດາທ່ານໃຫ້ມາຮ່ວມງານໂຮມຊຸມນຸມ ແລະ ງານວາງສະແດງດັ່ງກ່າວຕາມວັນ ເວລາ ແລະ ສະຖານທີ່ໄດ້ກ່າວມານັ້ນຢ່າງເປັນຂະບວນຟົດຟື້ນ.