ສັບປະດາສາກົນດ້ານໄຊເບີຂອງສິງກະໂປ (SICW) ຄັ້ງທີ 7 ພາຍໃຕ້ຄຳຂວັນ: “ຮັກສາຄວາມປອດໄພໃນໂລກດິຈິຕອນ”
ໃນລະຫວ່າງວັນທີ 18-20 ຕຸລາ 2022 ນີ້, ອົງການຄວາມປອດໄພທາງໄຊເບີຂອງ ສິງກະໂປ (Cyber Security Agency of Singapore) ໄດ້ຈັດກອງປະຊຸມສັບປະດາສາກົນດ້ານໄຊເບີຂອງສິງກະໂປ (SICW) ຄັ້ງທີ 7 ແລະ ກອງປະຊຸມ ລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 7 ທີ່ ປະເທດ ສິງກະໂປ, ເປັນປະທານໂດຍ ທ່ານ ນາງ JOSEPHINE TEO, ລັດຖະມົນຕີ ກະຊວງຂໍ້ມູນຂ່າວສານ ແລະ ການສື່ສານ ແລະ ລັດຖະມົນຕີຮັບຜິດຊອບດ້ານຄວາມປອດໄພທາງໄຊເບີ ຂອງ ປະເທດສິງກະໂປ ແລະ ຕາງໜ້າກະຊວງ ເຕັກໂນໂລຊີ ແລະ ການສື່ສານ (ກຕສ) ຝ່າຍລາວ ແມ່ນ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ພ້ອມຄະນະເຂົ້າຮ່ວມ, ມີບັນດາລັດຖະມົນຕີດ້ານໄອຊີທີອາຊຽນ ລວມທັງເລຂາທິການໃຫຍ່ອາຊຽນ.
ກອງປະຊຸມດັ່ງກ່າວຈັດຂຶ້ນພາຍໃຕ້ຄຳຂວັນ: “ຮັກສາຄວາມປອດໄພໃນໂລກດິຈິຕອນ: ການມີຄວາມຮັບຜິດຊອບຮ່ວມກັນ” (Digital Security: A shared responsibility) ໂດຍໄດ້ປຶກສາຫາລືແນວທາງ ແລະ ວິທີການຮັບມືຮ່ວມກັບຫລາຍພາກສ່ວນ ເປັນຕົ້ນແມ່ນ ຂະແໜງອຸດສາຫະກຳ, ອົງການຈັດຕັ້ງສາກົນ ແລະ ວິສາຫະກິດຕ່າງໆ ທີ່ນຳໃຊ້ປະໂຫຍດຈາກການຫັນເປັນດິຈິຕອນ ເພື່ອກຽມພ້ອມຮັບມືກັບໄພຄຸກຄາມທາງໄຊເບີທີ່ນັບມື້ນັບເພີ່ມຂຶ້ນເລື້ອຍໆ ໂດຍສະເພາະແມ່ນຄວາມຊັບຊ້ອນທີ່ເພີ່ມຂຶ້ນຂອງການນຳໃຊ້ລະຫັດດິຈິຕອນ (digital domain), ການແກ້ໄຂຂໍ້ຂັດແຍ່ງລະຫວ່າງເຂດພູມສັນຖານໃຫ້ມີຄວາມຍືດຍຸ່ນ, ປອດໄພ ແລະ ຮັບປະກັນໃຫ້ສາມາດຂັບເຄື່ອນປະເທດຊາດກ້າວເຂົ້າສູ່ຍຸກເສດຖະກິດຈິຕອນທີ່ທັນສະໄໝ ແລະ ສະຫງົບສຸກ.
ບັນຫາພົ້ນເດັ່ນທີ່ຍົກເປັນຫົວຂໍ້ບູລິມະສິດໃນການສົນທະນາຮ່ວມກັນຄື: ການເສີມສ້າງຄວາມເຂັ້ມແຂງດ້ານ ການຮ່ວມມືກັບບັນດາຄູ່ຮ່ວມຫລາຍຝ່າຍ ທີ່ແນ່ໃສ່ການເຮັດວຽກຮ່ວມກັນເພື່ອຈັດການກັບໄພຄຸກຄາມທາງໄຊເບີ ລວມເຖິງບັນຫາທີ່ຕິດພັນເປັນຕົ້ນແມ່ນ: 1) ການແລກປ່ຽນທັດສະນະ ແລະ ມຸມມອງດ້ານຄວາມປອດໄພທາງໄຊເບີໃນຍຸກ ປັດຈຸບັນ; 2) ປຶກສາຫາລື ກ່ຽວກັບ ການນໍາໃຊ້ ICTs ໃຫ້ມີຄວາມປອດໄພ ທີ່ລວມເຖິງການພັດທະນາ ບັນດາລະບຽບການ, ນະໂຍບາຍ ແລະ ບັນຖັດຖານ ໃນການຄຸ້ມຄອງໃຫ້ມີຄວາມເຂັ້ມແຂງ; ແລະ 3) ອັບເດດຂໍ້ມູນຂ່າວສານ ກ່ຽວກັບການຈັດຕັ້ງປະຕິບັດບັນດາກິດຈະກຳທີ່ເຮັດຮ່ວມກັນຂອງບັນດາປະເທດສະມາຊິກອາຊຽນ ໂດຍສະເພາະການເຂົ້າຮ່ວມໂຄງການຝຶກອົບຮົມ ASCCE ແລະ AJCCBC ທີ່ແນ່ໃສ່ສົ່ງເສີມການສ້າງຂີດຄວາມສາມາດໃນການປ້ອງກັນການໂຈມຕີທາງໄຊເບີ, ແລກປ່ຽນຂໍ້ມູນຂ່າວສານດ້ານວິຊາການ, ຊອກຫາແນວທາງໃນການແກ້ໄຂບັນຫາຮວ່ມກັນ, ປ້ອງກັນ ແລະ ຮັບມືກັບໄພຄຸກຄາມທາງໄຊເບີ ທີ່ອາດຈະເກີດຂຶ້ນທັງໃນປັດຈຸບັນ ແລະ ໃນຕໍ່ໜ້າ.
