ທ່ານ ໄບເດນ ປະກາດລະບາຍນ້ຳມັນ 15 ລ້ານບາເຣວ ຫວັງສະກັດລາຄາແພງຂຶ້ນ
ປະທານາທິບໍດີ ໂຈ ໄບເດນ ຜູ້ນຳອາເມລິກາ ຖະແຫລງໃນວັນທີ 20 ຕຸລາ 2022 ວ່າ: ລັດຖະບານຈະລະບາຍນ້ຳມັນຈາກສາງສຳຮອງທາງຍຸດທະສາດ (SPR) ຈຳນວນ 15 ລ້ານບາເຣລ ເພື່ອສະກັດການເພີ່ມຂຶ້ນຂອງລາຄານ້ຳມັນ.
ປະທານາທິບໍດີ ໄບເດນ ຕັດສິນໃຈດັ່ງກ່າວ ຫລັງກຸ່ມປະເທດຜູ້ສົ່ງອອກນ້ຳມັນ (ໂອເປັກ) ແລະ ປະເທດພັນທະມິດ ຫລື ໂອເປັກພລັສ ມີມະຕິຫລຸດກຳລັງການຜະລິດຄັ້ງໃຫຍ່ໃນຕົ້ນເດືອນຕຸລານີ້ ເຊິ່ງສວນທາງຄວາມຕ້ອງການຂອງອາເມລິກາ.
ຜ່ານມາ, ອາເມລິກາພະຍາຍາມກົດດັນຊາອຸດິອາຣະເບຍ ແລະ ໂອເປັກພລັສ ເພື່ອໃຫ້ເພີ່ມກຳລັງການຜະລິດ ເນື່ອງຈາກປະທານາທິບໍດີ ໄບເດນ ກັງວົນວ່າລາຄານ້ຳມັນທີ່ເພີ່ມຂຶ້ນຈະກະທົບຕໍ່ຄະແນນນິຍົມຂອງລັດຖະບານກ່ອນການເລືອກຕັ້ງກາງສະໄໝໃນວັນທີ 8 ພະຈິກນີ້.
ທັງນີ້, ປະທານາທິບໍດີ ໄບເດນ ປະກາດໃນເດືອນມີນາວ່າ: ຈະລະບາຍນ້ຳມັນລວມ 180 ລ້ານບາເຣລ ໃນເດືອນພຶດສະພາ-ຕຸລາ ແລະ ປັດຈຸບັນ ທ່ານໄດ້ມີການລະບາຍນ້ຳມັນແລ້ວຈຳນວນ 165 ລ້ານບາເຣລ ເຮັດໃຫ້ປະທານາທິບໍດີ ໄບເດນ ສັ່ງລະບາຍນ້ຳມັນທີ່ເຫລືອອີກ 15 ລ້ານບາເຣລໃນຄັ້ງນີ້.
