ເກີດເຫດຄົນຮ້າຍລັກພະພຸດທະຮູບເກົ່າແກ່ 2 ອົງຢູ່ວັດເກົ້າຍອດ

ວັນທີ 23 ສິງຫານີ້, ເຈົ້າໜ້າທີ່ນິຕິວິທະຍານະຄອນຫລວງວຽງຈັນສົມທົບກັບ ເຈົ້າໜ້າທີ່ ປກສ ກຸ່ມເພຍວັດໄດ້ລົງກວດກາສະຖານທີ່ພຸດທະສິມມາຢູ່ວັດເກົ້າຍອດເມືອງສີສັດຕະນາກນະຄອນຫລວງວຽງຈັນ, ພາຍຫລັງທີ່ມີຄົນຮ້າຍເຂົ້າໄປລັກເອົາພະພຸດທະຮູບເກົ່າແກ່ຂອງວັດຈໍານວນ 2 ອົງ, ເປັນພະທອງສໍາລິດ ປາງຊະນະມານ, ອົງທີ 1 ມີຄວາມສູງ 78 ຊັງຕີແມັດກວ້າງ 35 ຊັງຕີແມັດ, ອົງທີ 2 ມີຄວາມສູງ 23,5 ຊັງຕີແມັດ ກວ້າງ 8 ຊັງຕີແມັດທີ່ເກົ່າແກ່ ແລະ ໄດ້ຮັບການຂຶ້ນທະບຽນ ຈາກກົມມໍລະດົກ ກະຊວງ ຖະແຫລງຂ່າວວັດທະນະທຳ ແລະ ທ່ອງທ່ຽວເປັນທີ່ຮຽບຮ້ອຍແລ້ວ.

ຈາກການສອບຖາມ ພຣະ ວຽງສະຫວັນ ຜູ້ເຫັນເຫດການເວົ້າວ່າ: ໃນຕອນເຊົ້າຂອງມື້ດັ່ງກ່າວໄດ້ເຂົ້າໄປກິນນ້ຳຢູ່ໃນສິມຂອງວັດ ແລະ ພົບເຫັນປະຕູສິມໄຂຜິດປົກກະຕິ, ຈຶ່ງໄດ້ໄປແຈ້ງຕໍ່ເຈົ້າອະທິການວັດ ເພື່ອມາກວດສອບກ່ອນທີ່ຈະພົບວ່າມີພະພຸດທະຮູບເສຍຫາຍ ຈຶ່ງໄດ້ແຈ້ງເຈົ້າໜ້າທີ່ໃຫ້ລົງມາກວດສອບ ແລະ ຕິດຕາມຄົນຮ້າຍມາດຳເນີນຄະດີ.