ຈັບຕົວຜູ້ກໍ່ເຫດລັກຂ້າງົວປະຊາຊົນ ເຄີຍດຳເນີນຄະດີຍ້ອນຄະດີລັກຊັບມາແລ້ວ 1 ຄັ້ງ
ພັນຕີ ແສງຄຳ ຜົ້ງສາລີ ຮອງຫົວໜ້າພະແນກຕຳຫລວດ ປກສ ເມືອງລອງ ແຂວງຫລວງນໍ້າທາໃຫ້ຮູ້ວ່າ: ວັນທີ 17ກັນຍາ 2022 ຜ່ານມານີ້ ໄດ້ຮັບແຈ້ງເຫດ ຈາກຜູ້ເສຍຫາຍຢູ່ບ້ານຈອມແຈ້ງ ເນື່ອງຈາກພົບວ່າມີງົວອາຍຸ 7 ເດືອນທີ່ລ້ຽງໄວ້ ຖືກຄົນຮ້າຍລັກຂ້າ ເອົາຊີ້ນງົວດັ່ງກ່າວໄປ.
ປກສ ຈຶ່ງໄດ້ສືບຄະດີດັ່ງກ່າວ ແລະ ກັກຕົວຜູ້ກະທຳຜິດໄດ້ 1 ຄົນຊື່ທ້າວ ສະເກາະ ອາຍຸ 22 ປີ ປະຊາຊົນບ້ານດອນແຍງ ເມືອງລອງ.
ຜູ້ກ່ຽວໃຫ້ສາລະພາບວ່າ ຕົນເອງເປັນຜູ້ລົງມືກໍ່ເຫດລັກຂ້າງົວແທ້.
ນອກນີ້ໃນໄລຍະ ປີ 2018 ຜູ້ກ່ຽວເຄີຍໄດ້ພົວພັນຢາເສບຕິດ ແລະ ຖືກດັດສ້າງ ຢູ່ຄ້າຍ ປກສ ແຂວງແລ້ວ 1 ຄັ້ງ, ພາຍຫລັງອອກຈາກຄ້າຍດັດສ້າງ ປີ 2019 ກໍອອກມາເຄື່ອນໄຫວລັກຊັບຕາມບ້ານ ຖືກຄະດີ ແລະ ພົ້ນໂທດອອກມາ.
ການກໍ່ເຫດຄັ້ງນີ້, ຜູ້ກ່ຽວໄດ້ເສບຢາບ້າ ແລ້ວກໍວາງແຜນອອກໄປລັກຂ້າງົວຢູ່ຟາມງົວຂອງປະຊາຊົນ ເພື່ອເອົາໄປຂາຍໃຫ້ໄທບ້ານດຽວກັນ ສຸດທ້າຍຖືກເຈົ້າໜ້າທີ່ນຳຈັບໄດ້.
ປັດຈຸບັນ, ຖືກສົ່ງໄປດຳເນີນຄະດີຢູ່ ປກສ ແຂວງ ຕາມລະບຽບກົດໝາຍ.
